Üskırık aiaz şarpyǧan qystyŋ közı qyrauda jylusyz otyrǧan jūpyny üilerge tonnalap tegın kömır tüsırıp ketetın qaiyrymdy jandardy kezdestırıp pe edıŋız? Tıptı, senbeitın de şyǧarsyz. Al ilanǧannan künnıŋ özınde mūndai ızgılıktı adamdarǧa erekşe taŋdanyspen alǧys jaudyryp, aiaǧyna jyǧyla saluyŋyz bek mümkın. Nege deisız ǧoi? Öitkenı, sız de, bız de myna qoǧamda qaitarymsyz qaiyrymdylyq jasaityn şyn mänındegı jomarttarǧa şölırkep jürmız. Bızdıŋ qoǧamnyŋ mūndai aŋsaryn älgı jaqsylyq jasaǧyş jymysqylar jaqsy bıledı jäne osy osaldyǧymyzdy ūtymdy paidalanady. Olar bır qaraǧanda ǧana osyndai qaiyrymdy, osyndai meiırban. Qai kezde de būlar tūrmysy tömen otbasylarǧa erekşe qamqor, jan-jaqty janaşyr körıngısı keledı. İgı ısıne iılıp, salǧan jerden jat senımnıŋ soiylyn soǧyp şyǧuyŋyz op-oŋai mūndaida. Sondyqtan, asyqpaŋyz, aptyqpaŋyz, olar – bızdıŋ jüregımızdı materialdyq mūqtajdyqty öteumen jıbıtıp, ızgılıkpen ızıne ertkısı keletın jat aǧym ökılderı. Bügınde älem nazary saf dınımızge syzat tüsırgen terrorizmdı toqtatuǧa auyp tūrǧanda iek astyndaǧy İehova kuägerlerınen köresındı körmesımızge kım kepıl?! Sol sebeptı ata dınımızge üş qainasa sorpasy qosylmaityn qauıptı aǧymnyŋ aq-qarasyn ajyratyp, jurnalistık közqaraspen zertteu jasaudy jön sanadyq.
Baiqaisyz ba, qazırgı qoǧam qauıptıŋ qaidan tuatynyn tarazylai almai qalady keide. Sebebı, saǧatyna san myŋdap qūiylatyn aqparattar tasqyny adamdy öresınen jaŋyldyryp, būrys pen dūrysty baǧamdaudan ajyratyp barady. Daqpyrttyŋ ışınen derek ızdep, ala-qūlanyŋ arasynan aqiqatty arşu – qiynnyŋ qiyny. Ǧalamtor betındegı qyzyldy-jasyldy älemnen, jekelegen müdde men jasyryn maqsaty aralasqan aqparattardan, dın atyn jamylǧan jymysqy toptardan bızdı tek ışkı ūlttyq ūstyn, eŋbekpen jinaǧan şynaiy bılım ǧana qūtqarady. Alaida jetpıs jyl boiy saltanat qūrǧan qūdaisyz qoǧam halyqty ata saltynan ajyratyp jıberdı. Ūlttyq tanym taryldy. Tılınen, dınınen jerıgen materialist ūrpaq qalyptasa bastady.
Egemendık alǧannan keiıngı el arasyndaǧy dıni keŋıstık älsız, syrtqy aǧymdardyŋ yqpalyna jyǧyla salatyn solqyldaq edı. Däl osy tūsta mūhittyŋ arǧy betınen «İehova kuägerlerı» degen jaŋa, jat aǧym jüzdegen dıni toptarmen bırge Qazaqstanǧa keldı. Atauy da, kımge kuägerlık etetını de tüsınıksız beimälım senım ielerı elımızdegı eŋ köp tūrǧyndar şoǧyrlanǧan Almaty qalasynyŋ maŋaiynda missiiasyn jürgızdı. Būlardyŋ eŋ basty artyqşylyǧy – aiyna bır ret türlı tüstı ärı qymbat qaǧazda «Küzet mūnarasy» degen jurnal şyǧaruy. Mūndai jeke basylymy bar dıni aǧymdar älemde öte sirek. Arysy, jekelegen paraqşalar taratyp, bırdı-ekılı kıtaptar ǧana şyǧaruy mümkın. Al İehova kuägerlerınde mūndai emes. Būlar el arasynda erınbei ügıt aitumen qatar, mazmūny jetık, maqsaty aiqyn, söilemderı aina-qatesız jazylǧan, körkem suretterı öte äserlı kıtaptar bastyrady.
Jat aǧymnyŋ maqsaty, mındetı, bır sözben aitqanda, basty missiiasy osy basylymdarda baiqalady. Desek te, «Küzet mūnarasy» jurnalynyŋ mazmūnynan tüpkı maqsatyn aŋǧaru öte qiyn. Dıni sauaty joq, ūlttyq dıŋgegı solqyldaq adam üşın türlı tüstı jurnal ruhani şamşyraq tärızdı körınedı. Täŋırdıŋ kuägerımız deitın atalmyş top ūltty bolmysynan aiyryp, öz müddelerıne jyǧu üşın neşe türlı ädıstı qoldanady. Aldymen, olar uaǧyzdaryn köşe-köşenı aralaumen, qarapaiym adamdardy äŋgımege tartyp, qamqorlyq tanytumen jürgızedı. Jaqsy kiıngen, qymbat kölıktegı däulettı jandarǧa jolai qoimaidy. Kerısınşe, jūpyny kiımdegı qara jūmysşylarmen, materialdyq kömekke zäru tūrǧyndarmen tıldesedı. Kezdestırgen adamy qarsylyq tanytyp, balaǧattauǧa deiın barsa da dörekı mınez tanytpai, qarabaiyr sözdersız, körkem söilep, meiırımdı jüzben äŋgıme-düken qūruǧa tyrysady.
Mūndaǧy maqsat – özderın qūdaidyŋ sözın söilep tūrǧandai körkem äser qaldyru ärı sol jūmsaq mınezı arqyly adamnyŋ sanasyn baurap alu. Atap öteiık, İehova kuägerlerınde materialdyq mäsele köterılgen emes. Ügıt jürgızu üşın olar qarjy aiamaidy. Mynadai älemdık daǧdarys qyspaqqa alyp tūrǧan zamanda jurnaldary da sapaly, kıtaptary da körkem. Sapasy da öte qymbat qaǧazdar. İehova kuägerlerınıŋ negızgı erekşelıgı, tıldesetın adamyn ritorikalyq sūraqtar arqyly bauraidy. Iаǧni, jauaby da, sūraǧy da ügıtke toly söilemder qoldanady. Mäselen, olar köşede kezıkken kez kelgen janǧa: «Myna ömırdıŋ mänı nede ekenın bılesız be? Qūdaiǧa senesız be? Qaiyrymdy ıster jasaisyz ba? Qūdaidan qorqasyz ba? Aqyret künıne daiynsyz ba?» – degen syŋaida bırneşe sūraq qoiu arqyly tosynnan oi salyp köredı.
Qarasaŋyz, būl sūraqtar ata dınımızde de maŋyzdy. İehovalyqtar qarapaiym adamnyŋ köŋılın osyndai jalpylama sūraqtarmen özıne qaratady. Olar jergılıktı qazaqtardyŋ tanymyn, tüsınıgın, közqarasyn, ūlttyq salt-dästürın, tūtas mädenietın tereŋ zerttegen. Sol sebeptı de eŋ bırınşı jürektı qozǧaityn saualdar qoiyp, qoian-qoltyq aralasuǧa, emen-jarqyn syrlasuǧa saŋylau ızdeidı. Ekınşı jäne üşınşı kezekte ǧana İsa paiǧambardyŋ (s.ǧ.s) ömırınen mysaldar keltırıp, ızgılıktı ıstermen adamnyŋ köŋılın bosatuǧa küş salady. Būl aralyqta adam islamdaǧy dünietanymynan ajyrap, Qūran aiattaryndaǧy adamgerşılık qaǧidattaryn, soŋǧy paiǧambarymyz Mūhammedtıŋ (s.ǧ.s) jaqsylyq jasau jolyndaǧy hadisterın jat aǧymnyŋ jön-joralǧylarymen auystyra bastaidy.
Osylaişa İslam men İehova kuägerlerınıŋ arajıgın ajyrata almai qalǧan delqūly bırtındep atadan qalǧan ruhani dıŋgegınen qol üzedı. Bızdıŋ zertteuımızşe, jat aǧymnyŋ jolyna op-oŋai tüsıp ketudıŋ saldary dıni ūqsastyqta jatyr. Jymysqy toptyŋ ökılderı «Kielı kıtap hikaialary», «Izgılık habary» syndy kıtaptardy üzdıksız bastyrady. Mūnda kädımgı Qūran Kärımdegı paiǧambarlar qissasy tügeldei derlık baiandalǧan. Alaida olar kıtapta Mūhammedke (s.ǧ.s) mülde juymaidy jäne moiyndamaidy. Älgı kıtaptardy oqyǧan adam soŋǧy paiǧambarymyzdyŋ esımın ūmytyp, qaiyrymdylyq ıs, meiırbandylyq, ızgılık, keşırım, jylaǧandy jūbatu, sürıngendı süieu sekıldı İsanyŋ (s.ǧ.s) igı amaldaryna bas iıp ketuı yqtimal. Rasynda da, İehova kuägerlerınıŋ kıtaptary men jurnaldary bır qaraǧanda tügel ızgı amaldarǧa toly. Olar är sözın meilınşe qazaqtyŋ saltyna, dästürıne, mädenietıne jaqyndastyryp, ūqsastyryp aitady.
Qūdaidyŋ aspan men jerdı alty künde jaratqany, Adam ata (s.ǧ.s) men Haua ananyŋ alma jegen oqiǧasy, Nūh paiǧambardyŋ (s.ǧ.s) kemesı, jaiyn jūtqan Jünıstıŋ (s.ǧ.s) ömırı, Mūsa (s.ǧ.s) men Perǧauyn zamany İehova kuägerlerı bastyrǧan kıtaptarda jan-jaqty baiandalady. Olar mūny joqqa şyǧarmaidy jäne būlardy därıpteidı. Alǧaş iehovalyqtarmen tanysqan adam osy ūqsastyqty janyna jaqyn qabyldap, qauıptı aǧymnyŋ ileuıne tez arada ketıp qaluy kädık. Barşamyzǧa mälım, ata dınımızde de däl osy oqiǧalar aitylady jäne moiyndalady. Arbalǧan adam osy ūqsastyqtardy tarazylaimyn dep şyrmauǧa tüsedı. Sonymen bırge, būlar qaiǧyrǧannyŋ köŋılın aulau, qinalǧannyŋ janynan tabylu, ruhani jäne materialdyq kömek körsetu belgılerıne basymdyq beru arqyly mūsylmanşylyqty ūstanǧan halyqqa jaqyndauǧa talpynady.
Sonymen, äŋgımege tartyp, müddesıne jyǧudyŋ ekınşı joly – basylym. Būl turaly äŋgıme bölek. Öitkenı, halyq arasynda eŋ köp zardap şegetınder «Küzet mūnarasy» jurnalynyŋ yqpalymen jüzege asqan. Ügıt taratuşylardyŋ qoldarynda mındettı türde kıtap toly qorjyn bolady. Eger sız olarmen qai tılde söilesseŋız de qiyndyq tudyrmaidy. Olar qazaq jäne orys tılıne jetık. Kıtaptary da ekı tılde basylǧan. Eŋ qauıptısı, basylymdardaǧy köz toidyratyn ädemı dizain, ne emle, ne stilistikalyq qatesı joq qazaq tılındegı tartymdy taqyryptar bırden bauraidy. Äsırese, basylymdary meilınşe balalardyŋ tılıne beiımdelıp jazylǧan. Al suretterı ertegı älemınen syr şertıp tūrǧandai äser qaldyrady. Baspalarynda arnaiy suretşılerı de bar sekıldı. Kördıŋız be, jat aǧym babalar amanatyn arqalaǧan balalardy qyzyqtyruǧa köşken.
İehovalyqtardyŋ uaǧyzyn jürgızetın «Küzet mūnarasy» jurnaly aiyna bır ret basylady. Bas taqyryptyŋ astynda: «İehova qūdaidyŋ patşalyǧyn jariialaidy», – degen ūran söz jazylǧan. Qazaqstandaǧy ūlt mädenietıne aşyqtan-aşyq soqqy jasap, osylai tüsınıksız ūran söz jazyp qoiǧan jurnaldyŋ ışkı mazmūny da tügel terıs piǧyldy tu etedı. Olar halyqtyŋ arasynan tuyndaityn kökeikestı saualdardy äu bastan bıledı. Sondyqtan da, jurnaldyŋ är betınde eŋ maŋyzdy saualdarǧa jauap ızdeidı. Jauap pen sūraqty jai söilemdermen qūrai salmai, türlı mazmūnda qūpiialap, elıktıre tüsedı.
Ärine, älemnıŋ barlyq memleketınde bölımşesı bar dıni ūiymǧa qai-qaisymyz da: «Sızderdı kım qarjylandyrady?» – degen sūraq qoiatynymyz anyq. Ruhani ortalyqtarynda jauapty qyzmet atqaratyn ökılderı būl saualdyŋ tuyndaitynyn baiaǧydan bıledı. Bärıne jauaptary daiyn. Qūdai jolyndaǧy sadaqamen jinalǧan qarajat ekenın aityp, tanbai tūryp alady. İslamda da sadaqanyŋ orny erekşe ärı Alla razylyǧyna bölenudıŋ bır joly osy. İehovalyqtar da sadaqa beru mäselesın mümkındıgınşe mūsylmanşylyqqa jaqyndatyp körsetkısı keledı. Nätijesınde, halyqty ūqsastyq arqyly orǧa jyǧudy közdeidı.
Jat aǧym basşylyqqa Kielı kıtap jazbalaryn alady. Ökınıştısı, būlar düniejüzındegı ekı milliard mūsylmannyŋ qasiettı Qūran Kärım kıtabyna köz jūmyp qaraidy. Mūnyŋ sebebın özderı de tüsındıruden qaşqaqtaidy. Bıraq halyqtyŋ nazaryn özderıne audaru üşın bızdıŋ saltymyzdy, tılımızdı, mädenietımızdı, senımımızdı jan-jaqty qoldanady. Mäselenki, «Küzet mūnarasy» jurnalyndaǧy keibır maqalalarǧa köŋıl bölseŋız, oidan qūralǧan oqiǧalardy jiı kezdestıresız. Äŋgımelerındegı keiıpkerlerdıŋ esımın qazaqşa taŋdap alyp, mümkındıgınşe ūlttyq tanym-tüsınıgımızge sai etuge tyrysady. Atalǧan jurnaldyŋ kezektı bır sanynda «Jürektı syzdatqan qaiǧy-mūŋ» degen äŋgıme basylǧan. Qaiǧynyŋ qara körpesın jamylǧan Naǧima esımdı qazaq qyzdyŋ şynymen de taǧdyry auyr. Ata-anasy jol apatynan ajal qūşyp, soŋynan qyzy qaiǧyǧa batady.
«Dūrysyn Qūdai bıledı ǧoi, qalqam. Jylamaşy». Būl – asqar taudai äkesınıŋ közın körgen dosynyŋ jūbatu sözı. Oqiǧadan adamdardyŋ mäŋgı ömır sürmeitının, ölımnıŋ bar ekenın bılemız. Qarapaiym ūǧym bolǧanmen, osy äŋgımenıŋ özegıne de iehovalyqtar öz qūdaiyn qosyp qoiady. Maqalanyŋ mänınen ūqqqanymyz – qaiǧyny basu üşın tek İehova qūdaiy ǧana qol ūşyn sozady-mys. Jat aǧym ökılderı ne sebeptı jurnaldaǧy keiıpkerlerdıŋ esımın qazaqşalady? Maqsaty tüsınıktı. Töl mädenietımızdı myqtap meŋgergen olar ana tılımız arqyly ışten ırıtpekşı. Jurnaldyŋ «Isterıŋdı kım qarjylandyrady?» degen bölıgınde: «Ūiymnyŋ qarajaty dūrys qoldanylady. Bızde qyzmetıne aqy alatyn dınbasylar joq. Kuägerler üime-üi uaǧyzdaǧandary üşın aqy almaidy jäne kezdesu ötkızetın jailarymyz öte qarapaiym», – dep jazylǧan.
Ne ūqtyŋyz? Olar salǧan jerden öte qarapaiym körıngısı keledı. Būl – bır. Ekınşı, mınezın mümkındıgınşe körkem ūstaidy. Tüptıŋ-tübınde maqtamen bauyzdap tüsıredı. Üşınşı, qoǧamda jūpyny otbasylarǧa qol ūşyn sozu arqyly halyqtyŋ jüregın jıbıtudı közdeidı. Milliondaǧan dana türlı tüstı kıtap, jurnal basyp şyǧaryp, jüzdegen memleketterde ǧibadathana salu, tabiǧi apat alǧan üilerge qol ūşyn sozu bır ǧana sadaqadan jinalǧan qarajat emes. Būl – tört. Esıŋızde bolsyn, olar bärın ızgılıkpen şeşemız dep şımırıkpei aitady. Qazaqşaǧa öte sudai jäne basylymdary da memlekettık tılde aina-qatesız basylady. Būl – bes.
«Sender amerikandyq sektasyŋdar ma?» Jurnaldyŋ közge bırden tüsetın alǧaşqy betınde, sonymen bırge, ǧalamtordaǧy saittarynda osyndai saualdy ülken qarıptermen berıp qoiǧan. Būl – halyqtyŋ kökeiındegı eŋ negızgı saual. Olar būl mäselenı aldyn ala eskerıp, ädeiılep özderıne engızıp qoiǧan siiaqty. Al endı jauabyna üŋılıp köreiık: «İehova kuägerlerı öz ıs-şaralaryn 230-dan asa el men aumaqta atqarady. Qai elde tūryp jatqanymyzǧa qaramai, AQŞ ne adami basqa ökımetke emes, İehova qūdaiy men İsa Mäsıhke şyn berılgenbız», – dep özderınıŋ missiiasyn taiǧa taŋba basqandai aiqyn körsetedı.
İehovalyqtardyŋ bas basqarmasy Niu-İork qalasynda ornalasqan. Alaida olar uaǧyzdarynda özge eşbır dındı eskermei, İsa paiǧambardyŋ ızbasary retınde ügıt jürgızedı. Oǧan dälel jylda İsany (s.ǧ.s) eske alu keşı. Dälırek aitsaq, ölgen künın atap ötedı. Jalpy, aptasyna ekı ret kezdesu ūiymdastyrady. Olar ortada şeŋber qūryp tūra qalady da, muzykalyq aspaptardy qoldanu arqyly än salady. Ännıŋ mätını İehova qūdaiyn madaqtauǧa arnalǧan. Kezdesuge kıruge eşkımge tyiym salynbaǧan. Tıptı, būl dındı ūstanbasaŋyz da emın-erkın enıp, jön-joralǧylaryna qatysa beruıŋızge bolady. Būl arqyly olar aşyqtyqty qamtamasyz etıp, aqiqatty süigen syŋai tanytady. Şyn mänınde olai emes.
Bügınde İehova kuägerlerı älemnıŋ 240 elınde bar. Künnen-künge būlardyŋ qatary tolyǧyp barady. Tıptı, jurnaldary men onlain betterınde osy dıni aǧymǧa kırgenderdıŋ sany da anyq jazylypty. Izgılıkpen ızıne ertetınder 8 million 220 myŋ 105 adamdy qūraidy. Jyl saiyn İsa Mäsıhtı eske alu keşıne 20 millionǧa juyq adam qatysady. On ekı aida 10 million şamasynda tegın kıtaptar taratylyp, ügıt-nasihat jūmystary jürgızıledı.
Eŋ ökınıştısı, «Küzet mūnarasy» jurnalynyŋ tūp-tūnyq qazaq tılınde basyluy. Bızdıŋ tıldık tūrǧyda jürgızgen zertteuımız nätije bermedı. Bır bılerımız, İehova kuägerlerı – qazaqşaǧa sudai, öte sauatty jazylǧan jurnaly bar jalǧyz jat dıni aǧym. Qazaqstandaǧy özge qai dıni ūiymdardy alyp qarasaq ta, ne qazaqşaǧa, ne orysşaǧa şorqaqtyq tanytyp, tıl, söileu tūrǧysynan aqsap jatady. Al mynalarda mūndai kemşılık atymen joq. Sonda iehovalyqtar qazaq tılın qaidan, qalai, qaşan üirengen? Olardyŋ bızdıŋ elge kelgenıne 20 şaqty jyl öttı. Az uaqytta tıl meŋgeruı mümkın emes. Auyzekı üirense de, jurnaldaǧydai jatyq jazatyn deŋgei jat aǧym ökılderınde qalyptasa qoiǧan joq. Demek, būlar bızdıŋ otandyq tılşılerdı tartqan sekıldı. Ärine, būl taqyryp qozǧalyp körmegen jäne «Küzet mūnarasy» jurnalynyŋ qazaqşasyn kımder jazatyny eşkımdı qyzyqtyrmaidy da. Köbıne, İehova kuägerlerınıŋ tılı emes, taratatyn ziiandy aǧymy turaly jan-jaqty aitylyp keldı.
Jurnalda: «İehova kuägerlerı turaly sız ne bılesız?» – dep saual tastaidy. El arasynda aitylatyn özderıne qatysty terıs aqparattarǧa senbeuge şaqyrady. Olardyŋ aituynşa, İehova – qūdaidyŋ özıne bergen esımı. Soraqysy – jat aǧym özderınıŋ qataryna sonau Nūhtan bastap Ybyraiym, Ysqaq, Jaqyp, Jüsıp, Mūsa jäne Däuıt paiǧambarlardy qosyp alǧandyǧy. İehovalyqtar Adam ata men Haua anany tüp atamyz ben tüp anamyz dep aitady. Älbette, būl dūrys. Sonymen bırge, eldı adastyru üşın aqşaǧa ermeitındıkterın, qarapaiym ǧana qūdaidyŋ qūldary ekendıkterın sözben ǧana emes, ıspen däleldep baǧady. Eŋ qyzyǧy, būlar hristiandyq baǧytqa da moiynsūnbaidy. Hristiandardaǧy üştık turaly ılımge üzıldı-kesıldı qarsy. Jaratqan iemız – jalǧyz Qūdai dep jar salady. Allanyŋ esımın İehova dep şatqan qauıptı aǧym ökılderı Qazaqstanda da qyzmetın jalǧastyryp jatyr.
Alǧaşqy on jylda būlar özımızdıŋ Almaty oblysyna qarasty Eŋbekşıqazaq audanynda dıni ügıt jürgızdı. Esık qalasynda Qazaqstan boiynşa bas ǧimaraty ornalasty. Niu-İorkte basylǧan taza qazaq tılındegı gazet-jurnaldary men kıtaptary osy Esık qalasynan taratylatyn. Keiınnen Almaty qalasyna köşırıldı. Bügınde bırneşe oblys ortalyqtarynda İehova kuägerlerınıŋ ǧibadathanalary bar.
Olar da bır Qūdaiǧa syiynudy nasihattaidy. Olar da ölımnen keiın ömırdıŋ baryn aitady. Alaida Allanyŋ ämırınen alys, islamǧa ūqsastyq ızdeudı kezektı bır ädıs retınde tüsınedı. Olar da sadaqa berudı süiedı. Mūqtaj jandarǧa qol ūşyn sozady. Dälel retınde keltırsek, soŋǧy on şaqty jyl boiy olar Almaty qalasynda jäne onymen şektesetın körşıles audandarda köşe-köşelerdı aralap, tegın kıtaptar taratty. Tūrmysy tömen otbasylarynyŋ balalaryn kiındırıp, qystyq kömır-suyn tüsırıp berıp jürdı. Äitpese, iehovalyqtar Qūrandy da, soŋǧy paiǧambarymyz Mūhammedtı de mülde moiyndamaidy. Halyq köbıne osy ūqsastyqtar arqyly arandap qaluy äbden mümkın.
Olardyŋ dındegı eŋ öreskel qatelıkterı – tozaqty joqqa şyǧaruy. Oǧan dälel retınde özderınıŋ Kielı kıtabyndaǧy «Eremiia» degen tarauşany keltıredı. Onyŋ 7:31 degen aiatynda: «Qūdaidyŋ özı adamdardy otqa örteu men azaptaudy ämır etpegen, jüregıne tüiıp, oiyna da almaǧan», – dep jazylypty-mys. İehovalyqtar osy bır söilem arqyly manadan berı madaqtaǧan jalǧyz Qūdaiyn jüregı bar jannyŋ qataryna qosyp qoiady. Sonymen bırge, sonşa süiıspenşılık pen meiırımge toly Qūdaidyŋ tozaqty jaratyp, adamdardy azaptauy mümkın emes dep sendıredı. Alaida būlar qaita tırıludı, aqyret künın moiyndaidy jäne ol sätte Qūdai laiyqty dep tapqandaryna ǧana soŋyra jan bıtıredı-mıs.
İehovalyqtar taǧdyrdy tügel joqqa şyǧarady. Adam öz taǧdyryna özı qojalyq etetının olar «Küzet mūnarasy» jurnalynda aşyq jazady. Qazaqtyŋ jazmyşyn, peşenesın, maŋdaiǧa jazylǧanyn moiyndaudan körkem türde bas tartady. Kördıŋız be, olar qarsylyqtaryn eşuaqytta dörekı türde aşyqtan-aşyq bıldırgen emes. Tek tüiınderdı körkem jolmen şeşuge ūmtylady. Ata dınımızben taǧy bır ūqsastyǧy – müsınge tabynudy joqqa şyǧaru ärı Qūdaidyŋ aldynda bärınıŋ teŋdıgı. Sondai-aq, būlar saiasatta beitaraptyq tanytyp, betegeden biık, jusannan alasa bolyp körınıp baǧady. Bır qaraǧanda, özderın jergılıktı zaŋǧa baǧynǧyş, qūlaqkestı Qūdaidyŋ qūlyndai körsetedı. «Qūdai jalǧyz, sondyqtan şynaiy dın de jalǧyz bolu kerek. Ol ılım Taurat, Zabur jäne Injılmen säikes kelse ǧana şynaiy dın bola alady», – deidı iehovalyqtar. Mūnyŋ alǧaşqy söilemı İslamǧa jat emes, alaida ekınşı sözınde oqyrmanyn adastyryp äketedı. Iаǧni, Alladan tüsken tört kıtaptyŋ töresın, tolyqtyrylǧan jäne özgertılmeitın, är ärpın perışte küzetetın Qūrandy öz qatarlaryna qospaidy.
Dıni sauaty joq adamǧa özderın: «Mūsylmanbyz», – dep tanystyratyn qauıptı aǧymnyŋ adamy Qūran turaly da habardar. Dese de, Qūrannyŋ Taurat, Injıl, Zaburdy joqqa şyǧarmaityn aiattaryn alady da, İsanyŋ Injılıne būryp äketedı. Eŋ jaman jerı, būlar İslam dınıne Qūrannan būryn tüsırılgen üş kıtaptyŋ özgertılgenın äşkerelegenı üşın aiyp taǧady. İehova kuägerlerı qan beruge, qan aluǧa qarsy. Saiasi nauqan kezınde sailauǧa qatysuǧa jol bermeuge tyrysady. Äskeri qyzmettı, Otan aldyndaǧy mındettı ūnatpaidy. Memlekettık meiramdardy toilaudy künä dep bıledı. Är uaǧyzynda qaru ūstauǧa qarsy ügıt jürgızedı. Ata Zaŋǧa, Eltaŋbaǧa, Änūranǧa bas imeidı. Bır sözben aitqanda, būlar qazaqtyŋ saltyna syzat tüsırıp, ǧasyrlar boiǧy asyl senımın aiaqasty etudı qolǧa alǧan. Osy jolda jat aǧym ökılderı ızgılıktı, qarapaiymdylyqty, qaiyrymdylyqty qoldanady.
İehova kuägerlerınıŋ tarihyna jügınsek, 1870 jyly Niu-İork qalasynda qūrylǧan. Rassel esımdı azamat dınnıŋ negızın qalapty. Alaida ruhani jetekşısınıŋ sözı men ısı basqa, azǧyndyqqa ergen adam eken. Keiınnen aǧymdy Rutterfold degen şyraqşy basqarady. Äu bastan tüsınıksız baǧytta qūrylǧan terıs aǧymda rasynda da şynaiy senım joq. Ne hristiandyqqa, ne mūsylmanşylyqqa, ne buddizmge bas imeitın iehovalyqtar qandai maqsatty közdep jürgenın özderı de bılmei qalady. Olar bırde Qūdaidyŋ qyzmetşısımız dese, bırde saiasi sebepterın de jasyrmai ıs-äreket arqyly körsetıp qoiady. Düniejüzılık ekı soǧystyŋ sebepterın, saiasi partiialardyŋ teke-tıresın İsa paiǧambardyŋ jıberıp otyrǧan jazasymen bailanystyrady.
İehovalyqtar qazırgı taŋda qanatyn keŋge jaiǧan. Qauıp sol. Äsırese, «Küzet mūnarasy» jurnaly arqyly myŋdaǧan qazaqtyŋ sanasyna terıs ideia qūiyp jatyr. Negızınen, mūndaida jas balalar zardap şegedı. Şyny kerek, bızdıŋ islamda körnekı qūraldar, ata dınımızdı ardaqtaityn oqu qūraldary azdyq etıp tūr. Onyŋ ışınde balalardyŋ tılıne laiyqtalǧan, jeŋıl mazmūndaǧy, tüsınuge qolaily körkem surettı islam ädebietı jetkılıksız. Olar da osy osaldyqty öz maqsattaryna paidalanyp, üstı-üstıne sapaly qaǧazben körnekı kıtaptar bastyruda. İehova qūdaiyn nasihattaǧan är mätınnıŋ soŋynda olar balalarǧa arnap, taza qazaq tılınde tapsyrmalar ūsynady. Sūraqtar qoiady. Söitıp, äŋgımelerden alǧan äserdı neşe türlı saualdarmen pysyqtaidy. Jurnaldyŋ «Talqylauǧa arnalǧan sūraqtar» degen tarauynda: «İsanyŋ tuǧan künı ne sebeptı 25 jeltoqsanda toilanady?», «Jalǧan dınnen şyqqan soŋ özıŋe ne dep saual qoiasyŋ?» – degen qitūrqy saualdar jetkılıktı. Baiqadyŋyz ba, sūraqtarynyŋ astarynda da İehovadan özgenıŋ bärın jalǧan dınnıŋ sanatyna jatqyzyp tūr.
2011 jyly bekıtılgen QR Dıni qyzmet jäne dıni bırlestıkter turaly Zaŋynda missionerlık baǧyttaǧy toptarǧa jyl saiyn tırkeuden ötu mındetteldı. Atalǧan zaŋnyŋ 9-babynda: «Dıni ädebiettı, dıni mazmūndaǧy özge de aqparattyq materialdardy, dıni maqsatty zattardy tek qana ǧibadat üilerınde dıni bılım beru ūiymdarynda, tūraqty üi-jailarda taratuǧa jol berıledı», – dep körsetılgen. Alaida iehovalyqtardyŋ köşe-köşenı aralap, körnekılıkke toly dıni jurnaldaryn taratyp jürgenın jiı baiqaimyz. Sonymen bırge, osy zaŋda: «Qaiyrymdylyqty jüzege asyru kezınde dıni qyzmetke tartu maqsatynda Qazaqstan Respublikasy azamattyrynyŋ, şeteldıkter men azamattyǧy joq adamdardyŋ materialdyq täueldılıgın paidalanuǧa jol berılmeidı», – delıngen. Būl – 10-baptyŋ ekınşı tarmaǧy. İehova kuägerlerı būl bapty da belden basyp otyrǧan syŋaily. Tūrmysy tömen üilerdı ädeiı ızdep, materialdyq kömekke tartu arqyly ügıt jürgızuın qoiar emes.
TÜIIN:
Bız zertteu maqalamyzda iehovalyqtardyŋ tarihyna toqtalǧan joqpyz. Oqyrmanǧa ol onsyz da tanys. Bız İslam men İehovany mümkındıgınşe qatar qoiyp, jat aǧymnyŋ jarǧa jyǧatyn qauıptı ıs-äreketterın tızbeleuge tyrystyq. Taldauǧa, aq-qarasyn ajyratuǧa küş saldyq. Bügınde halyq ızgılıkpen ızıne ertetın aǧymnyŋ terıs uaǧyzyn ata dınımızge ūqsastyryp aituynan köp zardap şegedı. Sondyqtan, bız de mümkındıgınşe sol ūqsastyq faktorlaryn maqalamyzǧa özek etıp alyp, halyqty böten dınnıŋ körkem de körnekı qazaq tılınde şyǧatyn basylymdaryna eltıp qalmauǧa şaqyrdyq. Ökınıştısı sol, iek astyndaǧy İehovany qazaq tılınde nasihattap otyrǧan özımızdıŋ qandastarymyz ekendıgı. Öitkenı, jat aǧymnyŋ jurnalyndaǧy jatyq ta körkem tıldı qauıptı nasihattardy arnaiy mamandar, qalamy ūşqyr jurnalist iaki bılıktı, söilem qūrauǧa jüirık filologtyŋ jazǧany ap-aiqyn aŋǧarylady. Abailaŋyz, tozaqty joqqa şyǧaryp, Alla sözın aiaqqa taptaǧan terıs aǧymnyŋ tyrnaǧyna ılıgıp ketpeŋız.
Quanyş TŪNǦATAR
