2022 jyldyń 2 qarashasynda Astana qalasy A.Seıdimbek atyndaǵy №54 mektep-lıeıde «Qarashańyraq» ulttyq tárbıe berý mektebiniń uıymdastyrýymen, Astana qalasy Tilderdi damytý jáne arhıv isi basqarmasynyń qoldaýymen Ult ustazy Ahmet Baıtursynulynyń 150-jyldyǵyna oraı elorda mektep oqýshylary arasynda "El búginshil, meniki erteń úshin" atty shyǵarmashylyq saıysy ótti, dep habarlaıdy "Adyrna" ulttyq portaly.
Taǵylymdy is-sharany belgili jýrnalıst, alashtanýshy, phD doktory Alma Saılaýqyzy júrgizdi.
Alash ıdeıasyn jańǵyrtqan ıgi is-sharany Astana qalasynyń Tilderdi damytý jáne arhıv isi basqarmasynyń basshysy Sáken Esirkep quttyqtaý sózben ashyp berdi.
«Biz uly tulǵalarymyzdy árqashan da ulyqtaýymyz kerek. Olardyń ómir joldarynan taǵylym alyp, jas urpaqtyń boıyna darytyp, nasıhattaı berýimiz kerek. Ult ustazy Ahmet Baıtursynuly óziniń sanaly ǵumyrynda zamannyń qıyndyǵyna qaramastan tutas ǵylymı ınstıtýttar, akademııalar jasaıtyn dúnıeni jalǵyz ózi jasap ketti. Til biliminiń negizin qalady, álipbıimizdi jasady, qalamgerligi, ǵalymdylyǵymen qatar qaıratkerligi de ult tarıhynan oıyp oryn aldy. Ahmet Baıtursynuly óz eńbekterinde tutas adamzattyq qundylyqtardy bárinen joǵary qoıdy. Sondyqtan da ol ómirsheń, eshqashan ólmeıdi. Bıyl Ult ustazynyń mereıtoıy halyqaralyq deńgeıde toılandy. Qalamyzda kóshege, mektepterge Ahmet Baıtursynulynyń esimi berilip, eskertkishter ornatylyp jatyr. Bıylǵy jyldyń sońynda Astana qalasy ákimdiginiń uıytqy bolýymen Ankara qalasynda da Alash arysyna arnap eskertkish boı kóteredi dep josparlap otyrmyz. Árıne mundaı ister quptarlyq, degenmen eń bastysy Ult ustazynyń bizge amanattap ketken ósıetterin oryndaýymyz qajet-aq. Búginde elorda mektepteri arasynda ótip jatqan ónegeli sharamyz da osy uly maqsatty alǵa qoıyp, óskeleń urpaqtyń boıynda Alash rýhyn oıatyp, otansúıgishtikke tárbıelep jatqany qýantarlyq jaǵdaı. Árıne, Ahmet Baıtursynulynyń óleńderin oqyp, mysaldaryn aıtýmen qatar ony osyndaı teatrlandyrylǵan qoıylym arqyly kórsetý balalarǵa erekshe áser qaldyryp, ónege bereri sózsiz. Búgingi taǵylymy mol sharaǵa sáttilik tileımin. Qatysýshylar ónerlerińiz órge júzsin! Shara joǵary deńgeıde ótedi dep senemin», - dedi Sáken Esirkep.
Jas urpaqtyń boıyna rýh syılaǵan sharaǵa kelgen jurtqa «Shabyt» óner ýnıversıtetiniń 1 kýrs stýdenti, dástúrli ánshi Aızııa Ótebaly «Sálem, Qazaqstan» termesimen jyr shashty. Elorda bıler keńesiniń múshesi, batagóı qarııa Ótegen Aıshýaquly 100-ge jýyq talanttar jınalǵan saıys qatysýshylaryna sáttilik tilep, aq batasyn berdi.
Ahmet Baıtursynuly: «Árkim ózi jaqsy biletin nársesin synaýy kerek» demekshi, saıysta M.S.Nárikbaev atyndaǵy KAZGIýÝ ýnıversıteti, Teaching professor, tarıh ǵylymdarynyń kandıdaty Izathan Medeshova, Elorda bıler keńesiniń múshesi, ardager ustaz, tarıhshy Qajymurat Násıuly, Astana qalasy Tilderdi damytý jáne arhıv isi basqarmasy basshysynyń orynbasary Aıgerim Moldabaeva, Astana qalalyq Bilim basqarmasynyń ádiskeri Álııa Jańabaeva jáne «Qara shańyraq» ulttyq tárbıe berý mektebiniń jetekshisi Turar Sáttarqyzy syndy óz salasynyń bilgir mamandary, asyl ustazdary men ult janashyrlary ádil-qazylyq etip, Alash amanatyn arqalaǵan jas daryndarǵa ádil baǵasyn berdi.
Kelesi sóz kezegi «Bilimge baýlýdyń belsendi ádisi – oıyn-saıahat, oıyn-qoıylym» dep birneshe jyl boıy tarıh pánin jastardyń sanasyna tyń ádispen tıimdi sińirip kele jatqan búgingi bas tóreshi Izathan Belqojaqyzyna berildi.
«Ultqa jany ashyǵan ustazymyzdyń mereıtoıyna ózindik úles qosýǵa kelip otyrǵan barshańyzǵa raqmet. Osyndaı is-sharanyń bastamashysy bolǵan «Qara shańyraq» ulttyq tárbıe berý mektebine óte rızamyn. Óz tájirıbemde stýdentterge tarıhty qoıylym arqyly tanytýdy 2013 jyldan bastap edim. Mysaly, jylda 1-kýrs stýdentterin tarıhı oryndarǵa aparamyn, ǵylymı, ádebı eńbekterdi oqytamyn, osynyń nátıjesinde zertteý júrgizemiz. Iaǵnı tarıhı derekke súıenip túrli taqyrypta teatrlandyrylǵan qoıylymdar qoıamyz. Búgin mine «Qara shańyraq» ulttyq tárbıe berý ujymy muryndyq bolyp, elorda mektepteri arasynda osyndaı shyǵarmashylyq saıystyń bolaıyn dep jatqanyna qýanyp otyrmyn. Ekinshi jaǵynan qobaljydym... Óıtkeni, tarıhı qoıylym kórsetý ońaı emes. Qatysýshylardyń barlyǵy mektep oqýshylary. Olardyń akterlik qabiletteri shyńdalmaǵan. Dese de, eń bastysy olar da júrek bar. Eger de tarıhı málimetterdi balalar júreginen ótkizip, boılaryna sińirse, olarda jasandylyq bolmaıdy. Tarıhty sahnalyq qoıylym arqyly jetkizý óte nátıjeli dúnıe. Biz stýdentterimizdiń memlekettik emtıhanda esse jazǵan kezde baıqaımyz. Oqýshy óziniń alǵan málimetin ertegi emes, áńgime emes, argýment arqyly jınaıdy. Iaǵnı teorııalyq argýmentaııa faktilik argýmentaııamen jalǵasyn tabady. Búgingi jastardy aýdıtorııaǵa tyǵyp alyp, uzyn-sonar lekııalar oqýdyń esh qajeti joq. Olar ótken tarıhty kózben kórip, qolymen ustap, tanýy kerek», - dep Izathan Belqojaqyzy óziniń júrekjardy lebizin bildirdi.
Aıta keteıik, atalmysh shyǵarmashylyq saıystyń basty ereksheligi - elordanyń 100-ge tarta talantty mektep oqýshylary Ult ustazynyń ómiri men shyǵarmashylyǵynan teatrlandyrylǵan qoıylym kórsetti. Saıysqa Ahmet Baıtursynuly atyndaǵy №48 mektep-lıeı, Muhtar Áýezov atyndaǵy №86 mektep-gımnazııa, Qadyr Myrza Áli atyndaǵy «BINOM SCHOOL» mektep-lıeıi, №60 mektep-lıeı, Abaı Qunanbaıuly atyndaǵy №87 mektep-gımnazııa, Názir Tórequlov atyndaǵy №35 mektep-lıeı, №88 mektep-lıeı, Jumeken Nájimedenov atyndaǵy №93 mektep-lıeı, Sáken Seıfýllın atyndaǵy №80 mektep-gımnazııasy, №24 orta mektep, Aqseleý Seıdimbek atyndaǵy №54 mektep-lıeı jáne Ahmet Baıtursynuly atyndaǵy «BINOM SCHOOL» mektep-lıeıi qatysty. Osylaısha Ahmet babamyzdyń ósıetine adaldyq tanytyp, Alash murasyn izdeýshi 12 bilim ordasynan kelgen daryndy oqýshylar búgingi shyǵarmashylyq básekede baq synasty.
«Búgin eńseli elordamyzdyń mektepteri arasynda erekshe bir saıys ótkeli otyr. Bul saıystyń basty maqsaty - uly ustaz, ultty rýhanı kóterýge kóp kúsh jumsaǵan Alash qaıratkeri Ahmet Baıtursynulynyń aǵartýshylyq baǵyttaǵy muralaryn óskeleń urpaqqa nasıhattaý, jas urpaqty otansúıgishtikke, ana tilin, ulttyq qundylyǵyn qurmetteýge tárbıeleý. Aıta keterligi, Ahmet Baıtursynulynyń tulǵalyq bolmysyn ashýda mundaı sahnalyq qoıylymdarǵa negizdelgen shyǵarmashylyq saıystar joǵymyzdy túgendep, jas urpaqqa ótkenimizdi tanytary sózsiz», - dep atap ótti shara uıymdastyrýshysy, «Qarashańyraq» ulttyq tárbıe berý mektebiniń jetekshisi Turar Sáttarqyzy.
Saıysqa oqýshylaryn qýana-qýana qatystyrýǵa nıet bildirgen jańashyl ustazdar «Qalamyzda buryn-sońdy mundaı shyǵarmashylyq saıys ótkizilmegenin alǵa tartyp, uıymdastyrýshylarǵa sheksiz alǵystaryn bildirdi.
Atalmysh saıys 2 bólimdi qamtydy.
1-bólim: «Ultqa qyzmet – ár qazaq balasyna mindet» atty sahnalyq qoıylym dep ataldy. 100-ge jýyq talanttar jınalyp, baq synasqan shyǵarmashylyq saıysta barlyq mektepten jınalǵan oqýshylar A.Baıtursynulynyń shyǵarmalarynan (mysal (aýdarma), maqala, pýblııstik týyndy, óleń) ózderine unaǵan týyndyny tańdap, qoıylym qoıdy. Qoıylym A.Baıtursynulynyń ómirlik maqsatyn, ustanymyn, kózqarasyn, sińirgen eńbegin ashyp kórsetýge baǵyttaldy. Qazylar alqasy taqyryptyń ózektiligi, akterlik sheberligi, sahnalyq obraz, dıkııa, t.s.s. krıterııler boıynsha jas talanttardy baǵalap, ádil tóreshilik etti.
2-bólim: «Ult ustazyna hat» dep ataldy. Saıysqa qatysýshy oqýshylar 1-bólimdegi kóterilgen jaıttyń mańyzy men búgingi zamandaǵy kórinisi týraly monolog oqyp, Ult ustazyna tolǵanysqa toly hat joldady. Hatta qazirgi qoǵamdy alańdatqan máselelerdi kóterip, táýelsiz eldiń búgingi urpaǵy retinde bolashaqqa qatysty óz usynystary men maqsattaryn jetkizdi. Qazylar alqasy monologty kreatıv, aldyńǵy qoıylymmen baılanystylyǵy, usynystyń ózektiligi, t.s.s. krıterııler boıynsha baǵalady.
Taǵylymdy da tartysty ótken saıysta qazylar alqasy júzden júırik, myńnan tulpar jeńimpazdardy anyqtap, júldegerlerdi belgili sýretshi Gúlnazym Ómirzaqtyń ulttyq naqyshtaǵy kartınalarymen jáne aǵash sheberlerine arnaıy jasatqan qazaqı kýboktarmen, dıplomdarmen jáne alǵyshattarmen marapattady.
Bas júldeni Abaı Qunanbaıuly atyndaǵy №87 mektep-gımnazııasy qanjyǵasyna baılady.
I oryndy Jumeken Nájimedenov atyndaǵy №93 mektep-lıeıi ıelendi.
II oryn Názir Tórequlov atyndaǵy №35 mektep-lıeıge buıyrdy.
Al III oryndy Ahmet Baıtursynuly atyndaǵy «BINOM SCHOOL» mektep-lıeıi aldy.
Kórermenderdiń júreginen oryn tapqan Muhtar Áýezov atyndaǵy №86 mektep-gımnazııasy «Kórermen kózaıymy» arnaýly nomınaııasymen marapattaldy.
Sonymen qatar shyǵarmashylyq saıysqa qatysqan 100-ge oqýshylardyń barlyǵyna alǵys hattar tabystalyp, komandalaryna kitaptar salynǵan «Qazaqsha sóıleıik» ekoshoperleri tartý etildi.
Sondaı-aq urpaqqa Alash ıdeıasyn nasıhattap, osyndaı ónegeli sharaǵa daıyndaǵan ustazdar da marapattan tys qalmady. «Úzdik ustaz» nomınaııasyn №24 orta mekteptiń muǵalimi Janel Tynymbaıqyzy Kalmanova marapattaldy.
Qalǵan ustazdardyń barlyǵy Astana qalasy Tilderdi damytý jáne arhıv isi basqarmasynyń arnaýly alǵys hattaryna ıe boldy.
Shara sońynda qatysýshylar shyǵarmashylyq saıystyń ádil ári ashyq ótkenin atap ótip, uıymdastyrýshylarǵa shynaıy rızashylyqtaryn bildirdi jáne aldaǵy ýaqytta mundaı ıgi bastamalar jalǵasyn tapsa degen tilekterin jetkizdi.
Zarına Áshirbek,
"Adyrna" ulttyq portaly
