Bıyl kúzde kezekten tys prezıdent saılaýyn ótkizýdi Toqaev 1 qyrkúıektegi joldaýynda usyndy, dep habarlaıdy «Adyrna» tilshisi.
"Qazaqstan Respýblıkasy Prezıdentiniń kezekten tys saılaýy 2022 jyldyń 20 qarashasyna taǵaıyndalsyn. Qazaqstan Respýblıkasynyń Ortalyq saılaý komıssııasy kezekten tys prezıdenttik saılaýdy uıymdastyrý men ótkizýdi qamtamasyz etsin" delingen prezıdent jarlyǵynda.
Saılaýǵa nebári 9 kún qaldy. Saıası naýqan aldynda óńirlerdiń daıyndyǵy qyzý. Bul qatarda Almaty qalasy da bar.
Esterińzge salamyz, Almatyda 4 qarashadan beri 531 saılaý ýchaskesi ashylǵan. Almatylyqtar saılaý ýchaskelerine 2GIS jáne Yandex Maps kartasy qosymshalarynyń kómegimen bara alady.
Daýys berý oryndary kartada belgilenedi, buny Almaty qalasynyń aýmaqtyq saılaý komıssııasynda eskergen. Aýmaqtyq saılaý komıssııasynyń tóraıymy Janna Asanova ÓKQ brıfınginde kezekten tys prezıdenttik saılaý aldyndaǵy megapolıstegi aǵymdaǵy jaǵdaı týraly egjeı-tegjeıli aıtyp berdi.
«Saılaý ýchaskeleriniń meken-jaılary kórsetilgen tolyq tizimi «Vechernıı Almaty» jáne «Almaty aqshamy» gazetteriniń baspa nusqalarynda, olardyń saıttarynda, sondaı-aq Almaty qalasy ákimdiginiń saıtynda jarııalanǵan», - dedi J.Asanova.
Sonymen qatar, Almatyda óz saılaý ýchaskesin tekserý úshin «1315» biryńǵaı nómir quryldy. Barlyq uıaly baılanys operatorlarynyń abonentteri úshin qońyraý shalý tegin. Call-ortalyqtyń jumys ýaqyty – demalys kúnderin qosqanda kún saıyn 8.00-den 20.00-ge deıin.
Almaty qalasy ákimdiginiń «Open Almaty» qoǵamdyq qabyldaý saıtynda jáne bilim basqarmasynyń memlekettik qyzmetter portalynda saılaýshylar tizimderinen ózińizdi tekserýge múmkindik beretin servıs qoljetimdi.
«Bizdiń saılaýshylar tizimderi turaqty tirkeý qaǵıdasy boıynsha jasalǵan. Ákimdikter saılaýshylar tizimin tapsyrǵan kezde bizdiń Almaty qalasynda saılaýshylar sany 1 mıllıon 170 myńnan asty. Saılaý ýchaskelerine barlyǵy 11 myńnan astam esepten shyǵarý kýálikteri tapsyryldy», - dedi Almaty qalalyq aýmaqtyq saılaý komıssııasynyń tóraıymy Janna Asanova.
Ol esepten shyǵarý kýáligi ne úshin kerektigin túsindirdi.
«Shartty túrde men Almatyda tirkelgem, daýys berý kúni Tarazda bolýdy josparlap otyrmyn. Mundaı jaǵdaıda men óz quqyǵymdy paıdalaný úshin óz ýchaskeme baryp, daýys berý quqyǵyn paıdalaný úshin esepten shyǵarý talonyn alýym kerek», - dep túsindirdi J.Asanova.
Búginde barlyq saılaý ýchaskeleri saılaý jáshikterimen, memlekettik rámizdermen jabdyqtalǵan. Barlyq ýchaskelik komıssııalar kandıdattar týraly aqparattyq materıaldarmen, sondaı-aq saılaýshylardy qyzyqtyratyn ádistemelik quraldarmen qamtamasyz etilgen. Bul rette kandıdattar týraly aqparattyq materıaldardy úgit materıaldarymen shatastyrmaý kerek. Óıtkeni olar ózderi jasaıdy. Barlyq saılaý ýchaskelerinde barlyq aqparat biryńǵaı formatta.
«Qazirgi tańda saılaý ýchaskeleriniń mekenjaılaryn tanymal 2GIS, Yandex Maps qosymshalaryna engizý jumystary júrgizilýde. Jumys aıaqtalýǵa jaqyn. Saılaý kúni jaqyndaǵan kezde kez kelgen saılaýshy óz saılaý ýchaskesiniń geolokaııasyn taba alady», - dedi J.Asanova.
Zaǵıp saılaýshylar úshin arnaıy trafaretterdiń daıyndalatynyn aıtty. Sondaı-aq erekshe qajettilikteri bar adamdarǵa arnalǵan buryshtar jabdyqtalady: beınerolıkter, aqparattyq materıaldary bar aýdıo rolıkter jáne múgedekter arbasyna kirýge arnalǵan keńeıtilgen oryndar.
