Redakııamyzǵa Pavlodar oblysy Pavlodar aýdanyna qarasty Jańa qala aýylynan 200 adam qol qoıǵan hat kelip tústi. Olar Jańaqala aýylyndaǵy Grıgorevka orta mektebiniń dırektory Koltaı Kalelhanulynyń jumystan shyǵarylǵanyna narazy.
Aýyl turǵyndarynyń aıtýynsha, aýdan ákimi Aleksandr Babenko, kúzden beri mektep dırektorynyń qyr sońyna túsip, qýdalaýǵa ushyratqan. Koltaı Kalelhanuly bul aýyldaǵy toǵyz jyldyq mektepte dırektor bolyp qyzmet atqarǵaly bes jyl boldy. Osy aralyqta bilim sapasyn aldyńǵy qatarǵa qoıa bildi. Qazir Grıgorevka orta mektebi bilim berý sapasy jaǵynan Pavlodar aýdanyndaǵy eń úzdik mekeme. Bıylǵy oqý jylynan bastap mektep tolyqtaı memlekettik tilge kóshti. Álbette, bul dırektordyń jeke bastamasy emes. Oblys ákiminiń tapsyrmasymen bolǵan. Alaıda, aýdan ákimi Aleksandr Babenkoǵa aralas mekteptiń qazaqsha bilim berýge kóshkeni unamaǵan sekildi. Onyń ústine, mektepte ótetin barlyq resmı sharalardyń tek memlekettik tilde júrgiziletini, dırektordyń tek qana qazaq tilinde baıandama jasaıtyny tipten tóbe shashyn tik turǵyzǵanǵa uqsaıdy. Aýyldaǵy bir-eki ózge ult ókilderin aldyǵa salyp qoıyp, dırektordyń ústinen oblysqa domalaq aryzdy qarsha boratty. Áıtse de, oblys ákimdigi negizsiz hattarǵa nazar aýdarmaǵan soń toqtaǵan edi. Endi, aýdan ákimi dırektordyń ózine shuqshııa bastady. Aýdandyq bilim bólimi arqyly qaıta-qaıta tekserý júrgizip, qaıta-qaıta bólimge shaqyryp túk jumys istetpeı qoıdy, deıdi aýyl turǵyndary. Mekteptiń bilim berý júıesinen esh kemshilik taba almaǵan soń basshyǵa ańdý salǵan. Sondaǵy tapqany 9 jáne 23 qarasha kúnderi mektep dırektory jumys ornynda bolmaǵan. 9-qarashada emhanaǵa barǵany jóninde anyqtamasy bar, dırektordyń. Al, 23-qarasha kúni bir saǵatqa keshigińkirepti. Onyń ózinde jer taıǵaq bolyp ázer jetken. Eske sala keterligi, Jańa qala aýyly oblys ortalyǵynan 40 shaqyrym jerde. Al, mektep dırektory jumysqa Pavlodar qalasynan óz kóligimen qatynap jumys isteıdi. Ol úshin mektep dırektoryna aqsha tólemeıdi. Pavlodar aýdandyq bilim bóliminiń basshysy Sáken Maıdısarov, ótken 28-qarasha kúnimen buıryq shyǵarady. Buıryqta Eńbek kodeksiniń 52-baby, 1-tarmaǵy, 8 tarmaqshasy, dep kórsetilgen. Keıin bul buıryq ózgerip, 4-jeltoqsanmen qaıta shyǵypty. Aýdandyq bilim bóliminiń ózi de eki ottyń ortasynda qalyp, sharasyz kúı keship otyrǵanyn aıtqany bar. Jalpy, Pavlodar aýdanynda 5-6 mektepte basshy joq. Nege ekeni belgisiz, dırektorlar «óz erikterimen» ketip jatyr. «Óz erikterimen» ótinish jazbaǵandaryna, Koltaı sekildi qyspaqqa almaǵandaryna kim kepil. Grıgorevka mektebiniń dırektoryn ornynan alyp tastaýyna Jańa qala aýylynyń jurty qarsy, ári narazylyq tanytyp jatyr. 200 adam qol qoıyp oblys ákimi Bolat Baqaýovqa hat jazǵan. Oblys ákimdiginen nátıje shyqpasa Memlekettik qyzmet isteri jáne sybaılas jemqorlyqqa qarsy is-qımyl agenttigine, odan qala berdi Prezıdent Ákimshiligine shaǵym joldaımyz deıdi, aýyl turǵyndary.
Taqyrypqa tuzdyq.
Aıtpaqshy, ótkende 22-24 qazan aralyǵynda QR Prezıdent ákimshiligi, Mádenıet jáne sport mınıstrligimen birlesip Pavlodar oblysynyń jergilikti atqarýshy organdaryndaǵy QR til týraly zańnamasynyń saqtalýyna tekseris júrgizgen bolatyn. Tekserý nátıjesi boıynsha, Pavlodar aýdany ákiminiń apparaty shyǵys qujattaryn rásimdeýde memlekettik tildi qoldanbaıtyny anyqtalǵan. Pavlodar aýdany ákiminiń apparatynda 19 hattyń qosymshalary tek orys tilinde berilgen. Pavlodar aýdany ákimi apparatynyń konkýrstyq qujattamalary, apparattyq jınalystarynyń hattamalary, tártiptik komıssııalarynyń hattamalary jáne atalǵan aýdan apparatynyń uıymdastyrý jáne ishki saıasat bólimderiniń barlyq qujattary orys tilinde júrgiziledi eken. Osylaısha, til zańnamasyndaǵy 8-baptyń óz deńgeıinde oryndalmaýyn kórsetip otyr, delingen tekserýshilerdiń hattamasynda. Bul aýdan basshysy A. Babenkonyń memlekettik tilge salqyn qaraıtyndyǵynyń dáleli. Orys tilin bilmeıtin mamandy qyzmette qýdalaýǵa ushyratý aýdan ákimine jaqsy ataq ápermeıtin tirlik. Onsyz da qoǵamda muǵalimniń bedeli tómen deımiz. Aýyldy jerde bilimdi maman joq deımiz. Barǵan kadrdy aıdaǵanǵa kónip, aıtqanyna júrmegeni úshin jumystan qysqarta bersek, aýyl biliminiń sapasynan ne nátıje kútemiz.
Ońǵar Qabden, Kereký
