Belgılı qoǧam qairatkerı, käsıpker Arman Şoraev "Jaŋa Qazaqstannyŋ" qandai boluy kerektıgıne toqtalyp, Qazaq elı bilıkten naqty qandai özgerıster kütetının aitty. Būl turaly "Adyrna" ūlttyq portaly jazady.
"Sanaǧa salmaq salmaǧan sailau öttı. Jeŋımpaz anyq. Ärı qarai ne bolmaq?! Men jaŋa Qazaqstandy körudı armandaimyn. Barlyq adam zaŋ aldynda bırdei bolatyn ädılettı, jaŋa Qazaqstan.Onda sudia bolu barynşa qūrmettı ärı jauapty. Sebebı, sudia eşkımge täueldı emes. Prezidentke de, sot töraǧasyna da täuelsız. Özınıŋ ar-ojdany, halyqqa bergen antynan basqaǧa alaŋdary joq. Jaqsylyǧy mol jaŋa Qazaqstanda kenttık jäne oblystyq äkımderden bastap barlyǧyn halyq sailaidy. Demek, olar qarapaiym halyqtyŋ igılıgı üşın jūmys ısteidı, biudjet aqşasyn ūrlamaidy. Eşkımge qajetı joq mega jobalardyŋ ornyna barynşa sapaly ärı arzan bılım oşaqtary men tamyljyǧan saiabaqtar, saiasy mol skverler, tep-tegıs, ainadai jaltyrap jatqan jol salady. Bal külkılı balalar bala baqşaǧa, mektepke tegın barady. Zaman talabyna sai sapaly jäne laiyqty bılım alady. Bılım oşaqtarynda tegın ärı dämdı taǧamnan tatady. Barlyq jerde de. Tıptı, şalǧaidaǧy şaǧyn auyldarda da", - dep jazdy Şoraev.Arman Şoraevtyŋ aituynşa, biudjetten aqşa ūrlau Otanǧa opasyzdyq jasaumen teŋ.
"Jaŋa älemde ana bolu öte qūrmettı ärı paidaly. Öitkenı, bırınşı baladan keiın otbasy jeŋıldetılgen paiyzben ipoteka aluǧa qūqyly, ärı ipoteka 30 paiyzǧa azaiady. Törtınşı säbiden keiın ipotekalyq qaryzdan bırjola bosatylady. Jaŋa Qazaqstanda biudjetten aqşa ūrlau Otanǧa opasyzdyq jasaumen teŋ. Sol sebeptı qataŋ jazalanady. Memlekettık qyzmetker bolu qūrmettı, bıraq, olar bai emes. Memlekettık qyzmetker barlyq jaǧdaimen qamtamasyz etılgen, söite tūra özıne eşqaşan Bentli satyp alyp, aumaǧy üş gektar jerge säulettı villa sala almaidy. Onda studentter joǧary oqu oryndar tegın oqidy ärı naqty bılım alady. Jeke universitetter dep atalatyndardyŋ köpşılıgı jabylady. Ile ūmytylady. Jaŋa Qazaqstanda balalar üiı men qarttar üiı bolmaidy. Öitkenı, qariialar men balalardy tastap ketu qolaisyz ärı tiımsız. Barşa azamattar memlekettık tıldı meilınşe jaqsy bıledı ärı qūrmetteidı. Qazaq tılın jetık meŋgeru üşın barlyq esık aşyq, tıl bılgender artyqşylyqqa ie. Kölıktı tünde aşyq qaldyra alasyz jäne oǧan alaŋdamaisyz. Ömır süru deŋgeiı öte joǧary bolǧandyqtan, bıreudıŋ mülkın ūrlau arqyly ömır sürudıŋ eş qajetı joq. Kez-kelgen jūmysşy, küzetşı, qūrylysşy, jürgızuşı jäne basqa mamandyq ielerı jaqsy jalaqy almaq. Jaŋa Qazaqstanda käsıpkerler öz esep şottaryndaǧy myŋǧyrǧan milliondardyŋ sany emes, jūmys oryndarynyŋ sanyn maqtanyş köredı",- deidı Arman Şoraev.Şoraevtyŋ paiymdauynşa, elımızde jemqorlyq tübımen joiylsa, şeteldık investorlar elımızge investisiia qūiuǧa kezekke tūrady.
"Älemnıŋ tükpır-tükpırınen milliondaǧan turister bızdıŋ eldıŋ didaryn körsek dep dämetedı. Olai bolatyn sebebı, ejelgı ertegılerdegıdei jaqsy da jaily qonaq üiler salynǧan. Keremet tabiǧat, şaǧyn aviasiialyq ūşaqtar, tegıs joldar, qauıpsız orta kımdı bolsyn qyzyqtyrmai qoimaidy. Onda barlyq damyǧan elderdıŋ investorlary bızdıŋ elımızge investisiia salu üşın kezekke tūrady. Sebebı, jemqorlyq ta, ūry şeneunık te joq. Al, ädıl zaŋ jekemenşık qūqyǧyn jäne onyŋ myzǧymas berıktıgın qorǧaidy. Onda kölık keptelısı bolmaidy, qalalardyŋ üstındegı qara tütın joq. Zaŋsyz qūrylystar būzylǧan, onyŋ ornyn gül kömkergen saiabaqtar men ajarly alaŋdar basqan. Jaŋa Qazaqstanda tūru paidaly ärı tiımdı. Auyl tūrǧyndary öz elın ǧana emes, jer şarynyŋ jartysyn qajettı önımdermen qamtamasyz etedı. Jastar bır-bırın süiıp qosylady. Olar tūraqty tabysqa kenelgen ärı qanaǧatty bıledı. Jaŋa Qazaqstanda öte käsıbi äsker bar. Sondyqtan, körşıler közın alartady degen qorqynyş joq. Onda azamattar şet elderdegı eŋ jaqsy sybaǧany ızdemeidı. Özderınıŋ kök tüstı tölqūjattarymen maqtanady. Osyndai tölqūjaty bar adam älemnıŋ kez-kelgen elınde qalauly jäne vizasyz qonaq esebınde",- deidı käsıpker.
"Adyrna" ūlttyq portaly
