Memleket basshysy Qasym-Jomart Toqaev Ana men bala ulttyq ǵylymı ortalyǵyna bardy. Bul týraly Aqorda jazdy, dep habarlaıdy «Adyrna» tilshisi.
Qasym-Jomart Toqaev aldymen ortalyqtaǵy Smart synyptyń jumysymen tanysty. Em alyp jatqan balalar oqýdan qol úzip qalmaýy úshin «Aqyldy synyp» uıymdastyrylǵan. Munda mektep baǵdarlamasyna sáıkes matematıka, tarıh jáne basqa da pánder oqytylady.
Prezıdent respýblıkanyń ár óńirinen kelip, em alyp jatqan balalarmen áńgimelesti. Memleket basshysy jetkinshekterdiń tezirek saýyǵyp ketýine tilektestik bildirdi.
Prezıdentke balalar bólimshelerinde 351 bala em alyp jatqany týraly baıandaldy. Bıyl bul jerde 18 myńǵa jýyq bala emdelgen.
Qasym-Jomart Toqaev ortalyqtaǵy balalardy Jańa jyl merekesimen quttyqtap, barlyǵyna syılyq úlestirdi.
