Kezekten tys sailau nemese kadrlyq daǧdarys
Soŋǧy uaqytta jūrt «sailau bolady eken» degen gu-gu äŋgımenı jiı aita bastady. Saiasatkerler de sailaudyŋ sözsız bolatynyna boljam jasaidy. Bügın sol sailau häm saiasi kadr mäselesın qauzaimyz...
Kezekten tys Prezident sailauy bola ma?
Prezidenttıŋ qazırgı ökıletı 2020 jyly aiaqtalady. Oǧan da köp qalǧan joq. Äne-mıne degenşe bolady. Degenmen bızde qalai? Sailau jaqyndaǧanda belgılı bır qoǧamdyq ūiym (ol partiia nemese assambleia boluy mümkın), jiyn ötkızıp, Prezidentke qairyla söilep, qiylyp sūraidy. Nenı sūraidy demeŋız, sailaudy kezeksız, merzımınen būryn ötkızıp, «täuekel, taǧy da bır köş bastaŋyz» deidı. Könbesıne bolmaidy. Söitıp, kezeksız sailau bolady, Prezident özge qarsylastarynan äldeqaida basym dauyspen jeŋıp şyǧady. Senbeseŋız, mıne, körıŋız...
1991 jylǧy sailau. N.Nazarbaev 98 paiyz dauys jinady.
1999 jylǧy sailau. N.Nazarbaev 91 paiyz dauys jinady.
2005 jylǧy sailau. N.Nazarbaev 91,15 paiyz dauys jinady.
2011 jylǧy sailau. N.Nazarbaev 95,55 paiyz dauys jinady.
2015 jylǧy sailau. N.Nazarbaev 97,75 paiyz dauys jinady.
Mūny oidan alyp, qyrdan qūrastyryp otyrǧanymyz joq. Osyǧan deiıngı körgenımızdı aittyq.
Sailau demekşı, juyrda bilıktegı «Nūr Otan» partiiasy kezektı sezın ötkızetının habarlady. Partiia töraǧasynyŋ bırınşı orynbasary Mäulen Äşımbaev «Facebook-tegı» jeke paraqşasynda jazdy. Sezd biylǧy jyldyŋ 27-aqpanynda ötedı. Qūrylǧaly berı atauy neşe märte özgergen bilıktegı «Nūr Otan» partiiasyna biyl 20 jyl eken. Sezdı soǧan orai şaqyrypty. Sezd şaqyru turaly qaulyǧa töraǧa Nūrsūltan Nazarbaev qol qoiǧan.
Bälkım, jaŋaǧy kezeksız sailau ötkızu turaly däl osy jiynda söz boluy yqtimal degen boljam da joq emes.
Auys-tüiıs häm kadr tapşylyǧy
Aitpaqşy, sailau jaqyndaǧan saiyn Aqordanyŋ auys-tüiısı de jiılei bastaityn qalypty jaǧdai bar. Būl joly da sol salttan ainyǧan joqpyz. Astanadaǧy aq jaǧalylar öz ışınde auys-tüiıs jasasty.
Jalpy soŋǧy 10-15 jyldyŋ şegınde kadrlyq auys-tüiıs jaŋa oiynşylarsyz ötetınıne eldıŋ de, Elbasynyŋ da közı üirengen.
Aqordadaǧy kadrlyq daǧdarystyŋ bastalǧanyna bıraz uaqyt boldy. Sondyqtan auys-tüiıs te özara oryntaq almasumen ǧana şektelıp jür. Būl joly da solai boldy. Kreslo auystyrdy, keŋse auystyrdy, mındet auystyrdy. Boldy, osymen bıttı. Bälkım äzırşe...
Sondai saiasi rokrivkalyq auys-tüiıstıŋ bırı Syrtqy ıster ministrlıgınde oryn aldy. Künı keşe ǧana emes ärine. 2018 jyldyŋ 26-jeltoqsanynda Elbasy Nūrsūltan Nazarbaev su jaŋa Syrtqy ıster ministrın taǧaiyndau turaly būiryqqa qol qoidy.
Qairatty qyzmetsız qaldyra ma?
Söitıp ekı jyl boiy atalǧan ministrlıktıŋ ekı tızgın, bır şylbyryn qolynda ūstaǧan Qairat Äbdırahmanov qyzmetınen bosatyldy.
Al, Qairat Qūdaibergenūly bosatqan kresloǧa osyǧan deiın QR qorǧanys jäne aeroǧaryş önerkäsıbı ministrı qyzmetın atqarǧan Beibıt Atamqūlov jaiǧasty.
Memleket basşysy qol qoiǧan jarlyqta Qairat Äbdırahmanov basqa qyzmetke auysuyna bailanysty ministrlık qyzmetınen bosatyldy delıngen. Degenmen, Qairat Qūdaibergenūlynyŋ qandai qyzmetke taǧaiyndalǧanyn estıp-bılmedık.
Köp jūrt kütpegen taǧaiyndau ne üşın kerek bolǧanyn qazır däp basyp aitu qiyndau. Sebebı, Syrtqy ıster ministrlıgı synǧa qalatyndai qatelık jasai qoiǧan joq. Qairat Äbdırahmanov bastaǧan vedomstvo öndırıp jūmys ıstemese de, ökpe artatyndai kemşılık te jasaǧan joq.
Endı ekı-üş künde Qairat Qūdaibergenūly qyzmetınen alynǧanyna tūp-tura bır ai bolady. Qairat Qūdaibergenūly osydan tura ekı jyl aldynda ministr bolyp taǧaiyndalǧanda eleŋ etpegen el-jūrt, ol kısı ornyn bosatqanda da bülık etken joq.
Basta aitqanymyzdai Elbasy jarlyǧynda Qairat Äbdırahmanov basqa qyzmetke auysuyna bailanysty ministrlık qyzmetınen bosatyldy delıngen. Alaida qandai qyzmetke auysqany turaly resmi aqparat berılgen joq. Bır aiǧa juyq uaqyt bolsa da Äbdırahmanov älı jaŋa kreslosyn tappaǧan sekıldı.
Salystyrmaly türde aitqanda ükımettegı jas kadr sanalatyn Äbdırahmanovty qyzmetsız qoimaityny sözsız.
Jas kadr dedık qoi...Qairat Qūdaibergenūly 54 jasta. Qazaqstannyŋ onyşny Syrty ıster ministrı. «Qūrmet», «Parasat» ordenderın, bırneşe merkelık medalderdı keudesıne taqqan. İzrail, Avstriia, Sloveniia sekıldı bırqatar memlekette elşı bolǧan.
Osyǧan deiın ülken lauazymdy qyzmetter atqarǧan basşynyŋ jaŋa mındetke taǧaiyndalar uaqyty jaqyn dep bılemız. Osydan ekı jyl būryn Erlan Ydyrysov ta Syrtqy ıster ministrı qyzmetınen jeltoqsan aiynnyŋ soŋynda bosatylǧan.
Sodan ekı aidai jūmyssyz jatqan Erlan Äbılfaiyzūly aqpan aiynyŋ ortasynda Qazaqstan Respublikasynyŋ Ūlybritaniia jäne Soltüstık İrlandiia Qūrama Koroldıgındegı Tötenşe jäne Ökılettı Elşısı qyzmetıne taǧaiyndalǧan bolatyn.
Osy qisynǧa qarasaq, Qairat Äbdırahmanov ta jaqyn künderı elşılık qyzmetke kırısuı mümkın.
Tüiın. Sonymen sailau turaly sybys qanşalyqty ras söz? Sailau bola ma? Bolsa ol qandai sailau bolmaq? Köptıŋ köŋılındegı saual osy. Endı äne-mıne degende, būl sūraqtardyŋ da jauaby aitylyp qalar... Aqorda jaqqa qūlaǧymyz eleŋdeulı...
«Adyrna» ūlttyq portaly
