Áskerde ózine qol jumsaǵan sarbazdyń ish kıiminen basqa adamdardyń bıomaterıaldary tabyldy, dep jazady “Adyrna” ulttyq portaly.
ZTB habarlaýynsha, 2022 jyly 19-tamyzda Jambyl oblysyndaǵy shekara bóliminde boryshyn ótep júrgen atyraýlyq 18 jastaǵy Bekbol Mırash óz-ózine qol jumsaǵan. Istiń mán-jaıyn anyqtaý barysynda, bıologııalyq saraptama nátıjesi jigittiń aýyz qýysy men ish kıiminen birneshe adamnyń bıomaterıaldarynyń (sháýet) izi tabylǵanyn anyqtady. Bul týraly marqumnyń isimen aınalysyp júrgen advokat Serjan Pralıev aıtty.
«Men bul málimdemeni jasaýǵa májbúrmin. Sebebi tergeýde qysym bar jáne kóp nárse eskerilmeıdi. Sondyqtan bul jaǵdaıǵa qoǵamnyń nazaryn aýdartpasaq bolmaıdy. Tıisti adamdar jigittiń ólimine naǵyz kinálilerdi teksergisi kelmeıdi. Bastapqyda Mırash qyzymen urysyp ózine qol jumsaǵanyn alǵa tartty. Alaıda bul rastalǵan joq, sebebi onyń sóz baılasqan qyzy buqaralyq aqparat quraldary arqyly suhbat berip, onymen aralary durys ekenin aıtty. Artynsha bólim komandıriniń kúsh kórsetkeni málim boldy»,- dedi Pralıev.
Osylaısha advokat Mırashtyń óliminde zorlyq áreketi sıpattalǵanyn alǵa tartyp otyr. Al Tergeý isi osy derekti nazarǵa almaı, isti «laýazymyn asyra paıdalanǵan» degen bappen jalǵastyrmaqshy eken.
Aıta keteıik, osyǵan deıin qaıtys bolǵan jigittiń otbasy onyń óliminiń resmı derekterine senbeı, ádil tergeýdi talap etken bolatyn. Al Ulttyq qaýipsizdik komıteti ázirge bul iske qatysty resmı málimdeme jasaǵan joq.
"Adyrna" ulttyq portaly
