Şalqarda adam qolynan mert bolǧan jasöspırım Mirasbek Däuletiiardyŋ ölımı qaladaǧy qylmystyq ahual men oquşylardyŋ toptasyp töbelesuı siiaqty qordalanǧan mäselelerge qoǧam nazaryn qaita audardy.
Qaŋtardyŋ 28-ı künı tuystary men synyptastary Aqtöbe oblysynyŋ Şalqar qalasyndaǧy mūz aidynynda "pyşaq jaraqatynan qaza tapqan" jasöspırım Mirasbek Däuletiiardy aqtyq saparǧa şyǧaryp saldy. Marqūmnyŋ otbasy Şalqar qalasyndaǧy Baisalbaev köşesınde tūrady. Būl yqşamaudannyŋ el arasynda "Maiak" degen beiresmi atauy bar. Mirasbek osy audandaǧy Idırıs Ürgenışbaev atyndaǧy mektepke byltyr Aqtöbedegı oblystyq sport internatynan auysyp kelgen.
MEZGILSIZ ÖLIM
Mirasbek Däuletiiardyŋ ölımınen soŋ Şalqardaǧy №6 mekteptıŋ 10-synyp oquşysy qamauǧa alynǧan. Küdıktı – el arasynda "Rabochii gorodok" dep atalatyn yqşamaudannyŋ tūrǧyny. Polisiianyŋ mälımetıne säikes, bır-bırıne jalǧasyp jatqan ekı audannyŋ joǧarǧy synyp oquşylary qaŋtardyŋ 26-sy künı saǧat 18.00 şamasynda Şalqar kölınıŋ şetındegı mūz aidynynda şekısıp qalady.
Şalqar kölındegı mūz aidyny. Aqtöbe oblysy, 28 qaŋtar 2019 jyl.
Sol jerde 10-synyp oquşysy Mirasbek Däuletiiardyŋ sol jaq keudesıne pyşaq sūǧylady. Därıgerlerdıŋ aituynşa, qansyrap jatqan jasöspırımdı belgısız bıreuler audandyq auruhana janyna qaldyryp ketken. Qaqpa aldynda es-tüssız jatqan jasöspırımdı kezdeisoq adamdar auruhanaǧa süiep kırgızgen.
Şalqar audandyq auruhanasy bas därıgerınıŋ emdeu-profilaktikalyq jūmystar jönındegı orynbasary Esenǧali Köpenov Azattyqqa:
- Qaŋtardyŋ 26-sy künı saǧat 19.00 şamasynda öte auyr jaǧdaida jasöspırım bala jetkızıldı. Bızge tüskende jaǧdaiy öte auyr boldy. Qan qysymy müldem bolmady. Sol jaq keudesınde şanşylyp-tüirelgen jaraqat baiqaldy. Şūǧyl türde reanimasiialyq şaralar jürgızıldı, soǧan qaramastan jasöspırım bala 15-20 minut aralyǧynda qaitys bop kettı, - dedı.
Mirasbek Däuletiiardyŋ äleumettık jelıde jariialaǧan suretı.
Auruhana tösegınde tılge kelmesten üzılgen Mirasbek Däuletiiar nauryz aiynda 16 jasqa tolar edı. Otbasyndaǧy üş ūldyŋ ortanşysy juyrda sport şeberlıgın qorǧamaq bop jürgen. Mirasbektıŋ synyp jetekşısı Almas Izbasqan oquşysynyŋ audandyq jäne oblystyq deŋgeidegı jarystardan jülde alyp jürgen boksşy ekenın aitady.
- Mirasbek qaŋtardyŋ 27-sı künı audandyq jarysqa qatysuy kerek bolatyn. Qaŋtardyŋ 26-sy künı keşkılık qaraly habar jettı. Ol eşqaşan jaman qylyqtarymen közge tüsken emes. Tärbielı otbasynyŋ balasy edı, - deidı synyp jetekşısı.
Qaŋtardyŋ 28-ı künı ūlynyŋ janazasyna qatysyp, köŋıl aita kelgenderge Mirasbektıŋ anasy Aigül: "Balamdy öltırgender ädıl jazasyn alsyn!" dep dauys qyla jylap jatty.
Şalqar audanynyŋ prokurory Aron Äbılovtıŋ aituynşa, būl oqiǧaǧa bailanysty Qylmystyq kodekstıŋ "kısı öltıru" baby boiynşa ıs qozǧalǧan. Küdıktı jasöspırım qazır audandyq ışkı ıster bölımı janyndaǧy izoliatorda qamauda otyr.
TÖBELESTIŊ TÜP SEBEBI NE?
Azattyq tılşısı barǧanda küdıktı oqyǧan №6 mektepte jan-jaqty tekseru jürıp jatty. Işkı ıster bölımı qyzmetkerlerı mektep mūǧalımderınen küdıktı oquşy men kısı ölımın közımen körgen üş kuä turaly mınezdeme alyp, audandyq bılım bölımı janynan qūrylǧan jūmys toby tärbie jūmysynyŋ qūjattaryn teksere bastaǧan.
№6 mektep direktory mındetın atqaruşy Äliia Ospanova (oŋ jaqta) mektep jūmysyn teksere kelgen ışkı ıster bölımı qyzmetkerın qūjattarmen tanystyryp otyr. Şalqar, Aqtöbe oblysy, 28 qaŋtar 2019 jyl.
- Mūz aidynyndaǧy oqiǧadan soŋ küdıktı retınde №6 orta mektebınıŋ tört oquşysy ūstalǧan bolatyn. Keiın onyŋ üşeuı oqiǧa kuägerı retınde bosatyldy. Olardyŋ barlyǧy da 10-synyp oquşylary, - deidı №6 mektep direktorynyŋ mındetın atqaruşy Äliia Ospanova.
Ūzaq uaqyt audandyq bılım bölımınde ädısker bolǧan Äliia Ospanova Şalqar mektepterındegı oquşylardyŋ audan-audanǧa, odan qaldy tuǧan jyldaryna qarai top-topqa bölınıp, şekısıp qalatyndaryn aŋǧarypty.
Şalqar qalasynyŋ körınısı. Aqtöbe oblysy, 28 qaŋtar 2018 jyl.
Şalqar – qaq ortasyn temırjol bölıp jatqan şaǧyn qala. Mirasbek Däuletiiar qalanyŋ jergılıktı jūrt "Köl jaq" dep ataityn bölıgınde pyşaqtalǧan. Būl audan – temırjoldyŋ oŋtüstık-batysynda.
Aty-jönın atamaudy sūraǧan şalqarlyq oquşynyŋ Azattyqqa aituynşa, temırjoldyŋ soltüstık-şyǧys bölıgındegı üş audan "Maiak", "Rabochii gorodok" pen "Eron" dep atalady. Atalmyş audandardyŋ jastary arasynda mūndai qaqtyǧystar būrynnan bar deidı tūrǧyndar. Alaida mūny resmi organdar – audandyq prokuratura men audandyq bılım bölımı joqqa şyǧarady.
Şalqar audandyq bılım bölımınıŋ basşysy Abzal Äbdıkov. Aqtöbe oblysy, 28 qaŋtar 2019 jyl.
- "Şalqardyŋ balalary audan-audanǧa bölınıp töbelesedı eken, būrynnan berı töbelesıp jürgen, keşegı töbeles – sonyŋ jalǧasy eken" degen beker äŋgıme. Bız ışkı ıster bölımımen bailanysyp otyrmyz. Olar bır küdıktınıŋ üstınen ıs qozǧalǧanyn, toptasa töbelesudıŋ bolmaǧanyn, qylmys aldyn ala söz bailasu arqyly jasalmaǧanyn aitty, - deidı audandyq bılım bölımınıŋ basşysy Abzal Äbdıkov.
Aqtöbe oblystyq ışkı ıster departamentı bala tärbiesı üşın bırden-bır jauapty tūlǧa "ata-ana" dep sanaidy. Departament jasöspırımder arasyndaǧy qylmysty bılım beru mekemelerı, polisiia men ata-ananyŋ bırlesken äreketı arqyly ǧana azaituǧa bolady dep mälımdep keledı.
Şalqardaǧy jasöspırımder qaqtyǧysy oblys ortalyǧy Aqtöbege de tän qūbylys. Jergılıktı polisiia biyl qaŋtardyŋ 10-y künı Aqtöbedegı eskı zirat aumaǧynda bolǧan 40 şaqty oquşynyŋ töbelesın älı de tekserıp jatqanyn habarlady. Qaladaǧy tört mekteptıŋ oquşylary töbelesıp, jergılıktı universitettıŋ bırınşı kurs studentı jaraqat alǧan būl oqiǧadan soŋ Qylmystyq kodekstıŋ "Būzaqylyq" baby boiynşa ıs qozǧalǧan.
Resmi aqparatqa säikes, 2018 jyly Aqtöbe oblysynda jasöspırımder 146 ret qylmys jasaǧan. Onyŋ ekeuınde jasöspırımder kısı öltırgen.
"Azattyq" radiosy
