Keniialyq atletter Qazaqstan azamattyǧyn aldy

Qazaqstan jeŋıl atletika federasiiasy Keniia elınıŋ bes adamyna "sporttyq azamattyq" räsımdeu şarasyn bastap kettı, - dep habarlaidy Vesti.kz tılşısı. Ūiym ökılderınıŋ aituynşa, tört sportşy - Nora Djeruto, Karolin Kipkirui, Deizi Djepkimei, Şedrak Koech jäne olardyŋ bapkerı Kennet Kepiego Rotich 2018 jyly jeltoqsanda Qazaqstan azamattyǧyn aldy. 2019 jyldan bastap atletter Şyǧys Qazaqstan oblysy qūramasynyŋ atynan öner körsetetın bolady. "Sonymen qatar, olar "Altai Atletiks" klubynyŋ müşelerı.  Qazırgı uaqytta federasiia "sporttyq azamattyqty" räsımdeu şaralaryn bastap kettı. Olardy Halyqaralyq jeŋıl atletika federasiiasy (IAAF) öz erejelerıne sai tırkeitın bolady. IAAF reitingıne säikes qazırgı uaqytta Nora Djeruto 3000 metrge kedergılermen jügıru boiynşa ekınşı orynda tūr, al Karolin Kipkirui - bes myŋ metrge jügıruden segızınşı orynda, on şaqyrymǧa jügıruden bırınşı oryn, üş myŋ metrge jügıruden ekınşı orynda. Öz kezegınde Deizi Djepkimei üş myŋ metrge jügıruden onynşy orynda", - delıngen federasiianyŋ resmi jauabynda. Jeŋıl atletikada soŋǧy ötken Qazaqstan bırınşılıgınde ŞQO atynan bes keniialyq sportşy öner körsettı. Elımızdıŋ bas bapkerı Grigorii Egorov atletterdıŋ qazaqstandyq azamattyǧyn alǧanyn rastady. Alaida män-jaiymen bölısuden bas tartty. Aita keteiık, Rotich "Altai Atletiks" klubynda bapker-menedjer qyzmetın atqarady.