Ult ustazy Ahmet Baıtursynuly: "Ult jumysy úlken jumys, úlken jumysqa kóp jumysker kerek" dep edi. Joǵalyp bara jatqan ulttardyń qatarynan emes, joǵarlap bara jatqan ulttardyń qatarynan kóriný úshin jan alyp, jan berip, el úshin emirene eńbek etý lázim. Osy maqsattyń oryndaýshylary bas qosqan "Ulttyq qundylyqtar akademııasy" qoǵamdyq birlestiginiń alǵashqy ǵylymı keńesi Almatyda ótti.
QR Oqý-aǵartý birinshi vıe mınıstri Sholpan Tańatqyzy onlaın formatta sóz sóılep, mınıstrdiń quttyqtaýyn jetkizdi. Ol "Bala tárbıesiniń alańdaýshylyq týǵyzyp otyrǵanyn, bul baǵytta isteler istiń kóp ekenin" tilge tıek etip akademııa qyzmetine sáttilik tiledi.
Pedagogıka ǵylymdarynyń doktory, professor Berikjan Aıtqululy búgingi qoǵamnyń eń ózekti máselelerin jipke tizip, ony sheshý úshin birlese júıeli ári naqty jumys isteýge shaqyrdy.
Pedagogıka ǵylymdarynyń doktory, professor Orazbaeva Faýzııa apaıymyz ulttyq kodymyz bolǵan qazaq tiliniń mán-mańyzy, hal-kúıi, qoldanysy men máseleleri, saqtaý men damytý joldaryna baǵa berip, utymdy usynystaryn aıtty.
Odan keıin sóz alǵan Qazaqstan Pedagogıkalyq ǵylymdar akademııasynyń prezıdenti Asqarbek Qusaıynov, Qazaqstannyń Eńbek eri Aıagúl Tóreqyzy, qoǵam qaıratkeri, ǵalym Asyly Osman, t,b ult janashyrlary men Baıanólgeı, Táshkenttegi qandastarymyz aýyr júk pen amanat arqalaǵan jańa qoǵamdyq uıymǵa tilek pen usynystaryn aıtty.
Kúrmeýi qıyn, kúrdeli máseleleri kún saıyn kóbeıip bara jatqan qazaq qoǵamynyń ulttyq rýhy men sanasyn oıatyp, urpaq tárbıesine halyqtyq qundylyqtardyń meılinshe molyraq paıdalanylýy men nasıhattalýyna dáneker bolyp, memlekettik saıasatta ulttyq ıdeologııanyń iske asýy, bilim mazmunyn ulttyq sıpatta baıytý, t.b baǵyttarda júıeli jumys isteýge bilek sybana kirisken akademııa jumysynyń sátti, tabysty bolýyna tilektespiz!
"Adyrna" ulttyq portaly
