"Qūpiia kezdesu": AQŞ basşysy Djo Baiden Kievke qūpiia saparmen keldı, al Resei - beihabar

"Qoinyna syr bükken kezdesu".  Aqpannyŋ 20-jūldyzynda AQŞ Prezidentı Djo Baiden "beiseuıt jürıske salyp", tosynnan, jariiasyz-jasyryn Kievke soqty. AQŞ bilıgınıŋ aq şatyryna ainalǧan Aq üidıŋ baspasöz qyzmetı mūndai mälımdemenı aitqan joq.  Olar qūrama ştattar basşysynyŋ resmi saparmen Polşaǧa baryp-qaitatynyn, al Ukrainaǧa bet būrmaitynyn basa habarlaǧan edı.  Kievke sapar asa qūpiia josparmen jasyryn türde jüzege asty. Baiden senbınıŋ qoŋyr keşınde qoǧam nazarynan boi tasalap, jyraqqa kettı. Janyna jurnalister men reporterlerdı ertpedı. Prezident Jeksenbı künı qūlqyn särıde Vaşingtonda boluy tiıs edı. Bıraq Ukraina astanasynan bıraq şyqty. AQŞ basşy Kievke taban tıregen senbınıŋ taŋynda qauıp-qater yqtimaly ūlǧaiyp, qalada dabyl qaǧylyp jatty. Mūndai sapardy, tıptı, AQŞ Ūlttyq qauıpsızdık keŋesınıŋ basşysy  Djon Kirbi joqqa şyǧaryp baqqan edı. Ol Prezidenttıŋ Polşaǧa baryp, kerı qaitatynyn mälımdegen. Degenmen, sapardan bır kün būryn Politico basylymy mūnda bır gäp baryn aŋdaǧan. Olar Baidennıŋ Ukraina şekarasynan jasyryn ötuge mümkındık ızdep jatqanyn jazyp, astyrtyn qadamdardyn sezgen. Bıraq saiasi elitanyŋ köpşılıgı mūndai "jankeştı" äreket Baidennıŋ jeke basyna qauıp töndıretının aityp, mümkın emes dep sanady. Baidennıŋ Kievke sapary, CNN jazǧandai, "qūpiiaǧa toly".  AQŞ prezidentı AQŞ teŋız aviasiiasynyŋ Endrius bazasynan (EST) taŋǧy saǧat 4:15-te ūşady. Reporterlerge öz qūrylǧylaryn alyp jüruge tyiym salynady. Baiden kelgen taŋda Kievtıŋ ortalyǧyndaǧy bırneşe köşede kölık qozǧalysy toqtatyldy.  Bıraq jergılıktı būqaralyq aqparat qūraldary eş qūlaqtandyrylmaidy.  Amerika prezidentınıŋ sapary resmi türde habarlanbaidy. Baidennıŋ keluı turaly alǧaş jazǧan bloger - Mark Feigin. Keiın soqtaly saiasi jaŋalyqty "Qazırgı Ukraina" jurnalisterı ılıp äketıp, Baiden men Vladimir Zelenskiidıŋ Kiev ortalyǧyndaǧy Mihailovskii alaŋynda jürgen videosyn jariialady. Ol Zelenskiimen bırge Mihailovskii şırkeuıne baryp, "Köktegı jüzdıkter" atty batyrlar memorialyna gül şoqtaryn qoidy. Köp ūzamai Baidennıŋ saparyn Zelenskiidıŋ özı rastady, ol AQŞ prezidentımen bırge tüsken fotosuretın jariialady, sodan keiın ǧana baryp Aq üi resmi mälımdemenı maqūldady. Aq üidıŋ mälımdemesınde Baiden "Ukraina demokratiiasyna, egemendıgı jäne territoriialyq tūtastyǧyna myzǧymas ärı talasqa tüspeitın" qaǧidatty maqūldau üşın barǧan dep körsetıledı. Onyŋ Ukrainaǧa körsetıler kömek ülesın keŋeitu mäselesın talqylaityny aitylady.

"Putin özınıŋ şapqynşylyq äreketın bır jyl būryn bastaǧanda Ukrainany oŋai şaǧylatyn jaŋǧaq dep oilady.  Batysyŋ bolsa, qaq jaryldy. Putin o basta küşenıp, tıptı bızden asyp tüsemın dep oilady. Bıraq ol oŋbai qatelestı", — dep jazdy Baiden.

AQŞ prezidentı Ukrainaǧa "asa qajettı qūryl-jabdyqty"jetkızu būiryǧyn jariialady. CNN-nıŋ körsetuınşe, Ukrainaǧa qosymşa berıletın kömek mölşerı 500 million dollarǧa para-par. "Qoldau qorjynynda" (paket) äskeri tehnika, sonyŋ ışınde artilleriialyq oq-därıler, tankke qarsy "Djavelin" keşenderı men gaubisalar toptastyrylady. Baidennıŋ Kievke sapary kezınde äue dabyly üzdıksız zarnap, saqtyq şaralarynan habarlap jatty.  Bıraq Resei zymyrandardyŋ Kiev aspanyn bürkep, äue keŋıstıgın älemtapyraq etkenı jaily derekter tırkelgen joq.

"Adyrna" ūlttyq portaly