Depýtat bolsam, kabınetime kamera, tipti dybys mıkrofondaryn ornatyp, táýlik boıy jumys isteýge daıynmyn — Anas Ahatuly

13700
Adyrna.kz Telegram

QR Parlamentiniń Májilisi men barlyq deńgeıdegi máslıhattar saılaýynyń ótýine de sanaýly apta qaldy. Osy oraıda «Adyrna» ulttyq portaly «Aýyl» partııasynyń jumysymen tanysyp, partııa tóraǵasynyń orynbasary Anas Ahatulynan suhbat alǵan edi.

— Anas Ahatuly, qazirgi Májilistegi irikteý úderisin qalaı baǵalaısyz?

— Bul jerdegi basty jańalyq - aralas saılaý júıesiniń engizilýi. Buǵan deıin de elimizde majorıtarlyq júıe bolǵan, biraq onyń birshama kemshiligi bar edi. Ol kezde qalaýly mandatyna qol jetkizgen tulǵanyń depýtattyq qyzmeti  halyq kóńilinen shyqpaǵan jaǵdaıda oǵan baǵa berý, keri shaqyrtyp alý nemese kúmán keltirý máselelerin uıymdastyrý qıyn edi. Saılaýshylardyń oǵan ýaqyty da joq bolatyn. Bul-bir. Ekinshisi, jeke tulǵa usynysy úlken strategııalyq baǵdarlamadan emes, onyń óz salasyna jaqyn jeke kózqarasynan týyndaıtyn. Ekonomıkanyń qaı salasy bolmasyn júıeli túrde usynys jasaý bir adamǵa qıynǵa soqty. Elimizde buǵan deıin bolǵan majorıtarlyq saılaý júıesiniń negizgi eki kemshiligi osy.

Bul júıeden soń biz proporıonaldy júıege kóshtik. Onyń da jaqsylyǵymen qatar kemshiligi boldy. Saıası partııa – baǵdarlamasy bar ınstıtýt. Bul jerde, onyń tizim boıynsha ótken kandıdat qyzmetin atqara almaı jatsa basqa adammen almastyrýǵa múmkindik týdy. Iaǵnı, proporıonaldy saılaý júıesinde depýtattyń Parlament Májilisindegi jumysyn naqty baǵalaý, tez arada jaýap berý, áreket etý jaqsy iske asty. Proporıonaldy júıeniń tıimdiligi osy. Bul júıedegi kemshilik – partııalyq ustanymy, naqty bir partııanyń quramynda joq jeke tulǵalar – qoǵam belsendileri, qaıratkerler saıası ómirden shettep qaldy. Bıylǵy júrgizilgen aralas saılaý júıesi osy olqylyqtyń ornyn toltyrdy. Endi saıası  partııalar – ınstıtýt, qoǵamdyq birlestikter – uıym retinde jumys isteı alady. Jeke tulǵalar bir okrýg arqyly saılanyp, óz baǵdarlamasyn usyný múmkindigine ıe boldy. Eki júıe qosyndysy osyndaı tamasha múmkindik týdyryp otyr.

— «Aýyl» partııasy baǵdarlamasynyń qandaı ereksheligi bar?

— «Aýyl» partııasy – udaıy aýyl sharýashylyǵy, aýyl turǵyndary máselesin kóteretin partııa. Biz bul baǵytymyzdan taımaımyz. Bizdiń ár saılaý saıyn usynatyn baǵdarlamamyzdyń basym bóligi osy aýyl taqyrybyna, aýyl sharýashylyǵyna arnalady. Qaladaǵy elektoratqa da usynarymyz barshylyq. Bizdiń negizgi maqsat – aýylda turatyn 40% halyqtyń múddesin qorǵaý. Bıylǵy baǵdarlama «Aýyl tórge shyqsyn!» dep ataldy. Osynyń aldyndaǵy saılaýda máslıhattan oryn aldyq. Biraq májiliske áli jete almaı kelemiz. Aýyl  halqynyń máseleleri sonaý Parlament, Májilis minberinen aıtylýy tıis. «Aýyl tórge shyqsyn!» deýimizdiń syry osynda. Baǵdarlama negizi 4 bólikten turady. Bizdiń búkil oblys,  aýdan, mono qalada ókilderimiz bar. Turaqty jumys istep turǵan saıası partııa bolǵandyqtan, usynys ta udaıy túsip turady. Jumys barysynda elektoratpen kezdesemiz. Ózekti máselelerdi qoıyn dápterge túrtip alamyz. Kóptegen usynys iske asyrylyp ta jatyr. Biraq solardyń eń ózekti degenderiniń kúrmeýi áli sheshilgen joq.  Qordalanǵan másele óte kóp. Biz barlyq agrobıznes nysanyn salyqtan bosatý kerek dep esepteımiz. Adam aýylda qalýy úshin aýylǵa qatysy bar barlyq bıznes túrine jaǵdaı jasalýy qajet. Iaǵnı, halyq tabysynyń basym bóligin qaladan emes aýyldan tabýy tıis. Azyq-túlik qaýipsizdigi degen taqyryp ta óte ózekti. Partııa májiliske ótetin bolsa, zańnamalyq turǵyda qandaı naqty qadamdar jasaıtynymyzdy baǵdarlamada túıindep, kórsettik.

— Jeke óz basyńyz depýtat bolyp saılansańyz, ne isteısiz? Atqarar isińiz qandaı bolmaq?

— Aýylsharýashylyǵy salasynda jumys istegenime 22 jyl boldy. Ustanymym – táýlik boıy tynymsyz jumys isteý. Qazir sózden iske kóshý kerek. Sońǵy kezderi halyq Májiliske, Úkimetke, bılikke senbeıtin boldy. Depýtat bolsam,  kabınetime kamera, tipti dybys mıkrofondaryn ornatyp, táýlik boıy ashyq jumys isteýge ázirmin. Ol ne úshin kerek?                  Birinshiden, óz-ózimdi tártipke salamyn. Májiliske ótken adam soǵan laıyq bolýy kerek. Buqara múddesi úshin tynymsyz eńbek etýi tıis. Májilistegi depýtattyq qyzmettiń qas qaǵym sáti de zaıa ketpeý kerek. Zań kóp, sheshilmegen másele odan da kóp. Ol solardyń bárin kúsh-jigerin salyp sheshýi tıis. Ózime bir sekýndty da bos jibermeý degen tártip ornatý jáne onyń bárin halyqpen bólisý tynymsyz eńbek pen ashyqtyqty qajet etedi. Men tańerteń jumysqa kelgennen, keshke jumystan shyqqanǵa deıin tolyǵymen ashyq bolamyn. Halyq kabınettegi búkil jumys barysyn esh kedergisiz kóre alatyn bolady. Oǵan daıynmyn. Bizde artyq sóz joq. Bárimiz adal eńbektiń adamymyz. Táýlik boıy tynymsyz eńbek etýge daıynbyz. Óz basym odan qoryqpaımyn, ýaıymdamaımyn da.

— Aýyldyń eń basty máselesi ne dep oılasyz? Ne isteý qajet?

— Biz eń basty qundylyǵymyz –jerimizdi saqtaýymyz kerek. El yrzyǵyn sonyń bergen nesibesi arqyly,  munaısyz da, gazsyz da eseleı alamyz. Ár qazaqstandyq aýyl sharýashylyq jerlerin tıimdi paıdalanyp, sodan túsken paıda arqyly dáýletin arttyrýy kerek. Eń basty maqsat – osy. Sondyqtan da aýyldy damytý – kezek kúttirmeıtin mańyzdy másele. Jer eńbek etemin degen ár qazaqstandyqqa esh kedergisiz tııýi kerek. Olar qajetti jabdyq satyp alý úshin tómen paıyzdy nesıege qol jetkizip, ózine tıesili jerdi óte tıimdi bıznes túrine aınaldyrýy tıis. Qala adamy aýylǵa ekonomıkalyq múdde, ekonomıkalyq yntalandyrý bolǵanda ǵana aǵylady. Ol úshin aýyl ınfraqurylymy jaqsy, turmysy túzý, agrobıznestiń ekonomıkalyq tıimdiligi óte joǵarǵy bolýy shart. Qalalyqta eger aýylda bıznes ashsam, qalaǵa qaraǵanda 5, bolmaǵanda 2-3 ese artyq paıda tabamyn degen oı týyndaýy kerek jáne oǵan jaǵdaı jasalýy tıis. Kóp máseleniń sheshilmeýine zańnamalyq shekteýdiń kóptigi sebep. Aýyldy turalatyp turǵan basty máselesi – osy. Bizdiń mindet – solardyń barlyǵyn túzetý.

— Parlamenttik saılaýǵa az ǵana kún qaldy? Osy ýaqyt aralyǵynda jáne aldaǵy ýaqytta «Aýyl» partııasy qandaı sharalar ótkizbek?

—Bizdiń partııa atynan saılaýǵa partııalyq tizimmen 25, bir mandattyq júıemen 8 adam túsedi. Úgit-nasıhat barysynda 5000-ǵa jýyq is-shara ótedi.  Syn bar, synaýshy bar. Onsyz bolmaıdy. Olarmen de jumys istep jatyrmyz. Kóbi bizdi parlamenttik partııa dep oılaıdy. Syn da soǵan baılanysty bolady. Biz Parlamentke jete almaı júrmiz. Osy joly Májiliske ótsek, naqty isimizdi kórsetemiz. Jumysymyz jalǵasyp jatyr. 300 myńǵa jýyq partııalasymyz aýylda turady. Olar – eńbek adamdary, sharýalar, kásipkerler. Solardyń ózderi aýyldarǵa kóp jaqsylyq jasaıdy. Osy úgit-nasıhat barysynda Qazaqstannyń barlyq aýyly qamtylady. Qazir jumysymyz oıdaǵydaı júrip jatyr.

— Kandıdattardyń ishinde kimdi laıyq dep atap óte alasyz?

— Bólip-jara almaımyn. Barlyǵy laıyq, óz jeke, dara  oryndary bar jandar. Bir maqtanatynym – naǵyz óndiriste júrgen, qoǵamdyq jumystarda óte belsendi adamdar jáne kóbisi aýyl azamattary.

— «Aýyl» partııasynyń áleýetin qalaı baǵalaısyz?

— «Aýyl» partııasynyń áleýeti joǵary. Aýyl – eldiń asyraýshysy. Elge eń birinshi toqshylyq kerek. Ony beretin – aýyl. Sondyqtan partııa aýyl turǵyndarynyń da, fermerlerdiń de múddesin qorǵaýǵa mindetti. Májiliste biz jeńýge múddelimiz jáne saılaýshylarymyzǵa senimdimiz. Aýyl máselesi sheshilsinshi degen ár azamatty bizge daýys berýge shaqyramyz.

— Opponent partııalarǵa aıtaryńyz bar ma?

— Bireýdi aq, bireýdi qara demeımiz. Básekeles partııalarǵa teń qaraımyz. Ár partııa ádil saılaýǵa shaqyrsyn, ádil ótýine kúsh salsyn, qadaǵalasyn! Saılaý ádil ótsin! Ádildik jetsin, ádilet saltanat qursyn!

— Suhbattasqanyńyzǵa rahmet!

Materıaldyń aqysy «Aýyl» HDPP saılaý qory qarajatynan tólendi.

Tapsyrys berýshi: «Aýyl» HDPP;

«Aýyl» HDPP saılaý qory qarajaty esebinen tólendi

Pikirler