Aqtöbe qalasynda tūratyn türme qyzmetkerı Jandarbek Äbışev ekı adamdy qūtqaryp qaldy. Qūtqaruşy kelemın degenşe körşı üidıŋ iesı äielı men enesın pyşaqtap ülgerıptı.
«Mektep oquşysy özı men otbasyna qauıp tönıp tūrǧanyn aityp, kömek sūraǧan kezde ärıptesımız Jandarbek Äbışev äielıne dereu polisiia men jedel järdem şaqyrudy tapsyryp, özı oqiǧa ornyna barady. Äielın ūryp-soǧyp, keiın pyşaqtaǧan körşısın körıp, bırden onyŋ qolyndaǧy suyq qaruyn tartyp aldy. Qolyn qaiyryp, dalaǧa alyp şyqqan kezde polisiia qyzmetkerlerı men jedel järdem de jettı. Küdıktı S.Myrzabekov ūstaldy», - dedı Aqtöbe oblysy boiynşa QAJ departamentınıŋ aǧa inspektory Ainūr Tabuktinova.
QAJ departamentınıŋ habarlauynşa otbasyndaǧy ūrys-kerıs töbeleske ūlasyp, 37 jastaǧy äiel men 58 jastaǧy onyŋ anasy pyşaq jaraqatymen auruhanaǧa tüstı. Ekeuı de bırneşe pyşaq jaraqatyn alyp, em qabyldap jatyr. «Oqiǧa boiynşa Qylmystyq kodekstıŋ «Adam öltıruge oqtalu» babymen qylmystyq ıs qozǧalyp, tergeu jürıp jatyr. Aqtöbe oblysy boiynşa QAJ departamentınıŋ KA-168/3 mekemesı öz qyzmetkerınıŋ beijai qaramai, jedel kömek körsetkenın ülgı etedı. Ol ekı adamdy ajal auzynan aman alyp qaldy», - dedı Ainūr Tabuktinova.
"Adyrna" ūlttyq portaly
