«Qarty bar eldıŋ – qazynasy bar» deidı dana halqymyz. Ūlystyŋ ūly künı – Nauryz merekesıne orai, QR Prezidentınıŋ Is Basqarmasy men vedomstvolyq baǧynysty ūiymdary elordadaǧy «Şarapat» äleumettık qyzmet körsetu ortalyǧynda qaiyrymdylyq şarasyn ötkızdı.
İgı ıs-şara aiasynda Is Basqarmasynyŋ qyzmetkerlerı Qarttar üiınde tūryp jatqan üş jüzden astam adammen kezdesıp, Nauryz merekesımen qūttyqtady, olardyŋ tūrmys jaǧdaiymen tanysty. Köŋılın köterıp, äŋgıme düken-qūrdy.
– Qadırlı qariialar, aǧa-apalar! Sızderdı Nauryz meiramymen şyn jürekten qūttyqtaimyz. Elımızdıŋ damuyna sızderdıŋ sıŋırgen eŋbekterıŋız zor dep bılemız, ony joǧary baǧalaimyz. Sızderge zor densaulyq, ūzaq ǧūmyr, amandyq tıleimız. Ärdaiym köŋılderıŋız köterıŋkı bolsyn! – dedı QR PIB Ūiymdastyru-baqylau jäne kadr jūmysy bölımı meŋgeruşısınıŋ orynbasary Şolpan Jūmaǧūlova.
QR PIB Medisinalyq ortalyǧy basşysynyŋ orynbasary Liudmila Biurabekova da aǧa buyn ökılderıne ūjymnyŋ merekelık ızgı tılegın jetkızdı.
– Köktemnıŋ osynau äsem de şuaqty merekesı – Nauryz meiramymen Sızderdı şyn jürekten qūttyqtaimyn! Barşaŋyzǧa myqty densaulyq, amandyq pen bar jaqsylyqty tıleimın! – dedı Liudmila Biurabekova.
«Şarapat» ortalyǧynda zeinet jasyndaǧy jalǧyz basty qariialardan bölek, arnaiy kütımdı qajet etetın I, II toptaǧy mügedek azamattar tūrady. Olar Memlekettık küzet qyzmetı orkestrı qoiǧan merekelık konserttı tamaşalap, quana qol soqty.
Orkestr qūramyndaǧy Aizat Qarabekova, Asylhan Şalqarov, Erkebūlan Sərsenbekov, Gülsım Myrzabekova, Bauyrjan Nūrmūhanov syndy halyqaralyq jäne respublikalyq baiqaulardyŋ jüldegerlerı öz önerlerın ortaǧa saldy. Qariialardyŋ jastyq şaǧynan syr şertetın syrly änder oryndalyp, kümbırlegen küi tartyldy.
Odan keiın Nauryz dastarhany jaiyldy. Ūlystyŋ ūly künınde qariialarǧa mol dastarhan äzırlep, syi-qūrmet körsetuge Is Basqarmasyna qarasty QR Prezidentınıŋ Äkımşılıgı men Ükımetınıŋ äkımşılık ǧimarattary direksiiasy, Memlekettık rezidensiialar direksiiasy, Medisinalyq ortalyq auruhanasy jäne Materialdyq-tehnikalyq qamtamasyz etu basqarmasynyŋ Äkımşılık ǧimarattar direksiiasy atsalysqanyn aita ketken jön.
Osy igılıktı şaraǧa arnap QR Prezidentı Is Basqarmasy qyzmetkerlerı özderınıŋ jeke qorynan kıtap jinap äkelgen bolatyn. Kıtaptar «Şarapat» ortalyǧynyŋ kıtaphanasyna tapsyryldy. Ortalyqta tūratyn adamdardyŋ qajetıne orai, basqa da syi-siiapattar jasaldy.
