Reseidıŋ Tula oblysy Efremov qalasynyŋ soty mektepte soǧysqa qarsy suret salǧan oquşy Maşanyŋ äkesı Aleksei Moskalevtı 2 jylǧa bas bostandyǧynan aiyrdy. Oǧan Qaruly Küşterdı qaita-qaita «qaralady» degen aiyp taǧylǧan, dep habarlaidy “Adyrna” ūlttyq portaly.
Er adam ata-ana qūqyǧynan aiyrylmaq. Al qyzdy balalar üiıne jıberdı. Būl Resei Federasiiasynda keŋestık kezeŋnen bergı 37 jyl ışınde saiasi sebeptermen balany jalǧyz basty ata-anadan alyp ketu oqiǧasy bırınşı ret bolyp otyr.
2022 jyldyŋ säuırınde suret sabaǧynda Maşa Moskaleva balany reseilık zymyrandardan qorǧaityn ukrain jalauy bar äieldıŋ suretın salǧan. Surette «Ukrainaǧa daŋq!» jäne «Soǧysqa jol joq» dep jazylǧan.
Qyzyn jalǧys tärbielep otyrǧsn Alekseidıŋ aituynşa, suret pänınıŋ mūǧalımı qyzdy salǧan suretıne bola qorqytqan. Odan keiın polisiia kelıp, barlyq balanyŋ mälımetın jazyp alǧan. Aleksei mektepke kırerde, polisiia kütıp alyp, aty-jönın sūraǧan, bıraq jalǧyzbasty äke basqa esımdı aityp, qūtylyp ketken körınedı.
“Qyzym: «Äke, polisiia menı ūstap ala jazdady, men suret saldym», - dep tynysy tarylyp, üige jügırdı. Qyzym qorqyp ketken, men kelesı künı mektepke kelıp, ony sabaq bıtkenşe kütemın dep uäde berdım», - dep jazdy OVD-İnfo Alekseidıŋ sözderın.
Kelesı kün Aleksei uäde etkendei, mektepke kelıp, ekı saǧattai qyzyn kütıp otyrǧan. Direktor dälızge şyǧyp, ony körgen boida dereu polisiiaǧa habarlasqan jäne Maşany sabaqtan şyǧaryp, äkesıne qyzy salǧan sol surettı körsetken.
«Balany synyptan şyǧaryp, tūtqyn siiaqty dälızge alyp şyqqany qandai ūiat! Olar maǧan: «Balaǧa ne üiretıp jatqanyŋdy qara! Ol ne salǧan?» dedı. Al men : «Soǧysqa, qantögıske qarsy, onyŋ nesı aiyp?» dedım. Olar hattama jasap, kuägerlerdı – mūǧalımderdı şaqyrdy, qol qoidy. Bızdı kölıkke otyrǧyzyp, terroristerdı jetelep bara jatqandai alyp kettı. Bız polisiia bastyǧy Andrei Aksenovke keldık. Ol maǧan balany tärbieleu turaly därıs oqydy”,- dedı Aleksei.
Aleksei Moskalev 1 nauryzda Odnoklassniki saitynda Elenovkadaǧy Bucha tūrǧyndary men tūtqynǧa alynǧan ukraindyqtardyŋ öltırıluı turaly pıkırlerı üşın äskerdı qaita-qaita «qaralau» turaly qylmystyq ıs boiynşa ūstaldy. Istıŋ qozǧaluyna qandai tüsınıkteme sebep bolǧanyn Tergeu komitetı qylmystyq ıs boiynşa öz baiandamasynda naqtylaǧan joq. 2 nauryzda Moskalevtı üiqamaqta jıberdı.
Sodan keiın qamqorşylyq organdary Maşany kämeletke tolmaǧandarǧa arnalǧan ortalyqqa apardy. Sot Moskalevty üiqamaqqa şyǧarǧannan keiın de, qyzyn ortalyqtan şyǧarmaǧan.
Prokuratura qarsaŋynda Moskalevke jalpy rejimdegı koloniiada 2 jyl öteudı sūrady. Sot er adamnyŋ ısın bır kün būryn qarap, ükımdı jariialady. Sudia Anton Malikov Moskalevtı 2 jylǧa bas bostandyǧynan aiyrdy.
Mediazona agenttıgınıŋ habarlauynşa, Moskalev ükımdı jariialau üşın äkelınbegen. Onyŋ qaida ekenı belgısız. Sottyŋ baspasöz hatşysy Olga Diachuk Moskalevtyŋ ükım jariialanǧan qarsaŋda tünde üiqamaqtan qaşyp ketkenın aitty.
