Qazaq qazaq bolǵaly otbasylyq qundylyqtardy dáripteýdi kún tártibinen túsirgen emes. «Otan – otbasynan bastalady» degen támsilge súıensek otbasy irgeli memleket bolýdyń alǵysharty retinde aldyńǵy orynda júredi.
Otbasy qundylyqtaryn dáripteý isi keshegi Keńestik Soıalıstik respýblıkalar odaǵy shaǵynda da qatardan qalys qalmaǵan. Sol kezderde pedagog Anton Makarenko aıtqan «Siz ulyńyzdy nemese qyzyńyzdy tek qana ózińizdiń ata-analyq qýanyshyńyz úshin ǵana dúnıege ákelip, tárbıelep jatqan joqsyz. Sizdiń otbasyńyzda jáne sizdiń basshylyǵyńyzda bolashaq azamat, bolashaq qaıratker jáne bolashaq kúresker ósip keledi» dál osy sóz áli kúnge deıin ózektiligin joıǵan joq. Qalaı alyp qaraǵanda da otbasy barlyq bastamanyń bastaý bulaǵyna uqsaıdy. Qazaqstanda talaı jyldan beri «Mereıli otbasy», «Baqytty otbasy» syndy áleýmettik, mańyzǵa ıe jobalar úzdiksiz iske asyrylyp keledi.
Arnaıy baıqaýlar uıymdastyrylyp otbasylar jaqsy jaǵynan bir-birimen synǵa túsedi. Bul óskeleń urpaqty tárbıeleýde erekshe mańyzǵa ıe faktor. Óıtkeni, osyndaı úlgili isterdi kórip, túısigimen túsinip ósken jastar tolqyny qoǵamǵa jańa lep alyp keledi desek artyq emes.
Eń bastysy, bundaı jobalarǵa memlekettik saıasat, onymen qoımaı, memleket basshysynyń tikeleı ózi qoldaý kórsetetini mereıimizdi tasytpasa, jasytpaıtyny aıdan anyq.Ótken jyly ótken «Mereıli otbasy» otbasylyq baıqaýynyń qarsańynda Qasym-Jomart Kemeluly arnaıy sóz arnaǵany sol kezdegi úlgili otbasylardan bastap báriniń júregine jylylyq quıǵan edi.
Sol jıynda «Mereıli otbasy» baıqaýy jeńipazdaryn marapattaý rásimine qatysýshylarǵa shyn júrekten sálem joldaımyn! Bul otbasy ınstıtýtynyń jáne otbasy qundylyqtaryn dáripteýge, ultymyzdyń áleýetin arttyrýǵa orasan zor úles qosyp kele jatqan biregeı joba. Jyl saıyn ótkiziletin baıqaý shańyraǵy shattyqa bólenip, berekeli birlik pen tatýlyqqa uıyǵan ónegeli otbasylar kúlli elge tanytady. Mundaı úlgili áýletter elimizde az emes, óte kóp. Halqymyz qaı zamanda otbasy dástúrin berik ustanyp, qadirleı bilgen.
«Úlkenge qurmet, kishige izet» bizdiń qanymyzǵa sińgen qasıet. Árbir azamattyń adamgershilik bolmysyn qalyptasýyna otbasyndaǵy ahýal aıryqsha áser etedi. Áke-sheshesiniń, ata-ájesiniń tárbıesin kórip, úlkenderden taǵylym alyp ósken bala eseıgende otanshyl, bilimpaz, eńbekqor azamatqa aınalady. Berekeli ári baqytty otbasy qýattyń eldiń tiregi. Sondyqtan memleket ár shańyraqtyń ál-aýqatyn arttyryp, ár azamattyń ósip órkendeýi úshin barlyq jaǵdaıdy jasaıdy. Baıqaýdyń jeńipazdaryn quttyqtaımyn! Barshańyzǵa zor densaýlyq, baq bereke tileımin, – dedi Memleket basshysy Qasym-Jomart Kemeluly.
Rasymen de Prezıdentimiz atap ótkendeı, «Úlkenge qurmet kórsetý, kishige izet bildirý» bizdiń qanymyzǵa sińgen qasıet. Áke men shesheniń, ata men ájeniń tárbıesin kórip, úlkenderden taǵylym alyp ósken bala eseıgende otanshyl, bilimpaz, eńbekqor azamatqa aınalsa onyń ıgiligin ózi ǵana emes qoǵam da kórip, jaqsy baǵytqa betburys bolar edi. Sondyqtan, aldaǵy ýaqytta otbaslyq qundylyqtardy dáripteýge arnalǵan memlekettik baǵdarlamalar kóbeıtilse nur ústine nur bolar edi. «Otbasy qundylyqtary jáne qoǵam» atty taqyryptyń júgi bir maqalamen jeńildemesi anyq. Áıtse de, bizdiń maqsat tıisti qulaqqa jetkizý boldy.
