Búginde jastardyń arasynda ajyrasý kóbeıip ketti. Jastardyń dám-tuzynyń jaraspaı, aıyrylysýyna ne sebep? Áleýmettik jaǵdaıdyń tómendigi me, joq álde munyń basqa da bir sebebi bar ma? Jazýshy, qazaqy dástúrlerdi nasıhattaýshy Zeınep Ahmetovanyń aıtýynsha, jastardyń til tabyspaýyna enelerdiń yqpaly basym. Sondyqtan da ol ene men kelinniń ózara baılanysyna basymdyq berý kerek degen pikirde.
«Mysaly ózim ómir súrgen áýlet kópbalaly otbasyna jatady. Alla taǵalanyń maǵdaıǵa jazǵany sol shyǵar turmysqa shyqqan jerim uldan jalǵyz bolyp shyqty. Atamyzdyń ómirine serik bolǵan apalar bolǵanymen Baqytjan jalǵyz boldy. Qudaıdyń jazǵany bolar Erjanym bir tal bolyp qaldy, men jalǵyz dep aıtpaımyn. Erjan er jetip, oqýyn bitirdi. Álgi «Taqııaly perishte» fılmindegi Taılaqtyń sheshesi sııaqty boı turǵysy durys qyz bolsa qaraımyn da júremin. Bir kúni qurbymnyń úıine aýyldan bir ádemi qyz kelipti. Ol qyz maǵan qatty unady. Úıge kelgennen keıin Bákeńe «Jámılániń úıinen keremet bir qyz kórdim. Kózi moıyldaı, shashy qaraqattaı, muryny pistedeı, erni shıedeıı» dep aıtyp jatsam «Toqta, sen ózi qyz aıtyp jatsyń ba, joq álde jemis-jıdekti aıtyp jatsyń ba?» dep ázildeıdi. Balam ol qyzǵa emes, ózi súıgen basqa qyzǵa úılendi.
Ene retinde men óz-ózimdi tárbıeledim. Sebebi jalǵyz balanyń sheshesi ózimshil, egoıst bolady. Kóp jaǵdaıda balasy men kelinin atystyryp, shatystyryp qoıý egoıst enelerden shyǵady. Bir tal balany ólip tirilip baqtyń, qaqtyń, endi oǵan bóten bir áıel ıe bolyp shyǵa keledi. Qyzǵanasyń ǵoı. Osy qyzǵanyshty basý kerek boldy. Sodan men óz-ózimdi tárbıeleı bastadym», – deıdi ol.
Zeınep Ahmetovanyń aıtýynsha, «kelinimdi qyzymdaı kóremin» degen durys emes. Sebebi ol qyzdyń aty qyz, kelinniń aty kelin bolýy kerek degen pikirde.
«Balam úılengennen keıin toı bitip, aýyldan kelgen týystar ketip ózimiz qalǵanda kelinim óleńniń sazymen yńyldap úı jınap júr eken. Sol kezde men bir jańalyq ashtym. «Myna balanyń ósip jetilýine meniń ne eńbegim sińdi? Toǵyz aı kóterip, omyrtqasy talyp, ay tolǵaqpen ómirge keltirdi. Tún uıqysyn tórt bólip, baqty, qaqty. Aýyrǵanda júregi aýyryp, kóterip balabaqshaǵa apardy. Oqytty, shoqytty. Materıaldyq jaǵdaıdy bylaı qoıǵanda qanshama rýhanı eńbegi sińdi. Álpeshtep ósirgen bireýdiń balasy ǵoı. Meniń tıtteıde eńbegim sińbegen. Endi men qolyma ákelip bergen daıyn dúnıege ıe bolmasam kim bolǵanym» dep oıladym. Kez kelgen qatyn ene bola alady, biraq kelinge ana bolý jaǵy jetpeıdi. Sondyqtan kelin men balanyń ortasyna syzat túsedi.
Osydan qorytyndy shyǵardym da, kelinin jamandaıtyn áıelderge «Áı, seniń ne eńbegiń sińdi oǵan? Saǵan daıyn kúıinde berdi ǵoı. Eger ár adamdy bir álem deıtin bolsaq, seniń qolyńa bir álemdi berdi. Endi sen soǵan ıe bola almasań, kem-ketigin túzep, óziń tárbıe bere almasań kimsiń sen? Erteńgi kúni seniń ókshe basaryń, seniń áýletińdi ary qaraı ósiretin adam ǵoı» dep enelerdi basamyn.
Al enesin jamandaıtyn kelinderge «Súıip qosyldyń ba?» desem «Iá, súıip qosyldym. Kúıeýim sondaı jaqsy adam, biraq enem jaman» deıdi. Sodan keıin «Sen súıip qosylǵan jaqsy jigitti ómirge keltirgen, tárbıelegen sol. Eger ol jaqsylap tárbıelemese saǵan jaqsy jigit qaıdan shyǵady. Saǵan dap-daıyn etip berip otyr. Olaı bolatyn bolsa, basy elge, aıaǵy jerge syımaıtyn adam bolatyn bolsa, seniń kúıeýińdi týyp bergeni úshin sen onyń aldynda basyńdy ııýýiń kerek» deımin. Boldy. Meniń kelinder men enelerge aıtarym osy», – deıdi Zeınep Ahmetova.
