Şymkentte üş jaŋa önerkäsıptäk alaŋ aşylyp, ekeuınıŋ auqymy keŋeitıledı

Şymkent qalasynda önerkäsıptı damytu jäne halyqty tūraqty jūmyspen qamtu maqsatynda jaŋadan 3 önerkäsıp alaŋy qūrylyp, taǧy 2-euınıŋ aumaǧy keŋeitıledı. Būl turaly Äl-Farabi audanynyŋ halqymen kezdesıp, esep bergen Şymkent qalasynyŋ äkımı Mūrat Äitenov mälımdedı. –Qalaǧa köptep investisiia tartu, sol arqyly önerkäsıp salasyn odan ärı damytyp, halyqty tūraqty jūmyspen qamtamasyz etu üşın jaŋadan 3 industrialdy aimaq aşyp, 2 aimaqty keŋeitudı közdep otyrmyz. Atap aitqanda, biyl «Jūldyz» jäne «Bozaryq» industrialdy aimaqtarynyŋ infraqūrylym jelılerınıŋ qūrylysy aiaqtalady. Būl aimaqtarda 2024 jyly alǧaşqy käsıporyndar aşylady. Oǧan qosa biyl «Isker qala» baǧdarlamasy arqyly jūmys ısteitın «Standart» industrialdy aimaǧy öz jūmysyn bastaidy. Aldaǧy uaqytta «Oŋtüstık» arnaiy ekonomikalyq aimaǧy men Şymkent kölık-logistikalyq ortalyǧynyŋ aumaǧyn keŋeitudı közdep otyrmyz, – dedı qala äkımı M.Äitenov. Onyŋ aituynşa, qoldanystaǧy 5 öndırıstık alaŋda 80 100-den astam jūmys orny qūrylǧan. Al, jaŋa industrialdy aimaqtarda da 8 myŋnan astam jūmyspen qūrylady degen jospar bar. –Memleket basşysy halyqty jūmyspen qamtu mäselesıne erekşe nazar audaru jönınde tapsyrma berdı. Osy oraida, Şymkent qalasynda 2022 jyly 65 799 adam jūmyspen qamtu şaralaryna qatysty. Sonyŋ ışınde 7 myŋǧa juyǧy uaqytşa jūmys oryndaryna joldansa, 18 azamat käsıptık qaita daiarlau kurstarynda oqyp şyqty. Sondai-aq, 40 myŋnan astam azamat tūraqty jūmysqa ornalasty. Halyqty tūraqty jūmyspen qamtuǧa şaǧyn jäne orta käsıpkerlık pen önerkäsıp salalary ekerşe yqpalyn tigızude, – dedı Mūrat Düisenbekūly. Qala äkımınıŋ aituynşa, atqarylǧan jūmystardyŋ nätijesınde 2021 jyly Şymkentte atauly äleumettık kömek alatyndardyŋ sany 51 myŋnan assa, 1 jyldyŋ ışınde būl körsetkış 16 myŋ adamǧa deiın qysqarǧan.