Elbasy aıtqan 21 myń teńgeni kimder alady

2045
Adyrna.kz Telegram

"Nur Otan" partııasynyń sezinde memleket basshysy Nursultan Nazarbaev kópbalaly otbasylardaǵy ár balaǵa 21 myń teńge tóleýdi tapsyrdy. Qarjy mınıstri Álıhan Smaıylov atalǵan kómekti kimder alatynyn aıtty.

"Elbasy aıtqandaı, turmysy nashar otbasylardaǵy ár balaǵa eń tómengi kúnkóris deńgeıiniń 70%-i nemese shamamen 20 800 teńge tólenedi. Kópbalaly otbasy bolyp 4 nemese odan da kóp bala tárbıelenip jatqan otbasylar esepteledi", - dedi ol.

Turmysy tómen otbasyǵa ondaǵy jıyntyq tabysty ár múshege bólgen kezde eń tómengi kúnkóris deńgeıiniń 50%-inen aspaıtyn, ıaǵnı ár adamǵa 15 myń teńgeden az tıetin otbasy jatady.

"Osyndaı otbasylardyń jıyntyq tabysyn esepteı kelgende, olar  járdemaqynyń 3 túrinen qaǵylady. Mundaı járdemaqyny alatyndardy kóbirek qamtý úshin erteń úkimet otyrysynda atalǵan máseleni keńirek talqyǵa salamyz. Sondyqtan muny sol kezde tolyǵyraq aıtyp beremin",- dedi Álıhan Smaıylov "Nur Otan" partııasynyń szinen soń jýrnalısterge.

Qarjy mınıstri prezıdent halyqtyń turmysyn kóterý maqsatynda olarǵa beriletin áleýmettik kómekti kúsheıtýdi tapsyrǵanyn aıtýdy umytpady.

"Jalpy bıýdjetten bólinetin qarjyny áleýmettik salaǵa baǵyttaý jaıly keshe-búgin ǵana aıtylyp jatqan joq. Ásirese, bul másele sońǵy jyldary kóp kóterildi. Bizdiń halyqtyń áleýmettik kóńil kúıine áser etetin jaǵymsyz jaıttardyń kúsheıýine baılanysty áleýmettik qoldaý kúsheıtildi.

Aıtap aıtqanda, sońǵy eki jylda respýblıkalyq bıýdjetten áleýmettik salaǵa bólinetin shyǵyndar 34%-ten 45%-ke ósti. Aldaǵy 3 jylda atalǵan kórsetkish 49%-ke artady. Áleýmettik salaǵa basymdyq berilgeni anyq kórinip tur", - dedi vedomstvo basshysy.

Ár balaǵa 21 myń teńge alamyz dep alaqaılaǵan Analar bul jańalyqqa qýana qoımaǵany anyq. Úkimet zarymyzdy tyńdap, talabymyzdy eskerdi ma degende bundaı habardy kútpegeni de ras. Sol kómektik qarajat taǵy da barmaq basty, kóz qystyǵa aınalmasa degen tilekteri bar.

 

"Adyrna" ulttyq portaly

 

Pikirler