Qazaqstan Jazuşylar odaǧy Almaty oblystyq filialynyŋ töraǧasy Qanat Äbılqaiyr mūzbalaq aqyn Mūqaǧali Maqataev meken etken Qarasazdaǧy üi qaŋyrap tūrǧanyn jazdy, dep habarlaidy "Adyrna" tılşısı.
Qarasazdaǧy kezektı poeziia keşterınıŋ bırıne barǧanda Qanat Äbılqaiyr auyldy aralap, Maqataevtar äuletınıŋ üiıne joly tüsedı. Onyŋ aituynşa aqyn üiın bügınde kısıler baspana etıp otyr.
"Ekı bölmelı üidıŋ töbesınen börenelerdıŋ dını körınıp tūr. Bylǧarydan qaptalǧan esık pen qalyŋ taqtaily edenı de kemı 60-70 jyldan berı kädege jarap tūrǧany baiqalady. Tereze de baiaǧy zamandy eske tüsıredı" dep jazdy ol.
Auyl adamdary men äkımdıkten sūrastyrǧan aqparat boiynşa qonaq etken üilerı Mūqaǧali Maqataevtyŋ Qarasazǧa kelgen saiyn osy üige qonyp, aunap-qunaǧan, Mūqaǧalidy ömırge äkelgen Naǧiman anamyzdyŋ osy üide ömırınıŋ bıraz bölıgın ötken, Mūqaǧalidyŋ bauyry Toqtarbaidyŋ qasiettı ordasy bolǧan qara şaŋyraq ekenı belgılı boldy.
Orys aqyny Puşkinnıŋ Oral qalasynda az uaqyt aialdaǧan kezde tūrǧan üiı qazır Puşkinnıŋ mūrajaiy, al Almatydaǧy Ahmet Baitūrsynūlynyŋ mūrajaiy bolyp tūrǧan baspanada Ahmet atamyz az uaqyt qana ömır sürgendıgın aityp, būl baspananyŋ da eleusız qalmaǧanyn qalaitynyn jetkızdı qoǧam belsendısı.
Qanat Äbılqaiyr Maqataevtar äuletınıŋ közınıŋ qaraşyǧyndai bolyp saqtalǧan köne aǧaş üi memleket qorǧauyna alynyp, üidıŋ qabyrǧasyna būl üidıŋ Maqataevtar äuletıne tiesılı üi ekenı turaly taqtaişa ornatylyp, muzei balansyna satyp alyp, muzei filialyna ainaldyryp, Mūqaǧalidyŋ üi jaǧdaiynda qoldanǧan jädıgerlerı qoiylyp, aqynnyŋ ruhani ordasyna ainalǧanyn qoldap otyr. Jazba astyna pıkır qaldyrǧan ädebiet janaşyryna ainalǧan jūrtşylyq, aitylǧan ideiany qos qoldap qoldauda.
Ūqsas jaŋalyqtar
