Şeteldegı 1 mln qazaq tarihi Otanyna qaituǧa niet tanytyp otyr. Būl turaly keşe Aqparat jäne qoǧamdyq damu ministrlıgınıŋ keŋeitılgen alqa mäjılısınde Düniejüzı qazaqtary qauymdastyǧy töraǧasynyŋ bırınşı orynbasary Zauytbek Tūrysbekov aitty, dep habarlaidy QazAqparat tılşısı.
«Şette jürgen qazaqtar 4-5 mln. dep jürmız. Bız barlyǧyn aralap şyqtyq. 1 mln adam elge kelemız dep otyr. Bır jobany Saryaǧaş audanynda, Taşkent töŋıregınde jasamaqpyz. Özbek aǧaiyndarmen aqyldasyp, kelısıp jatyrmyz. Sol jerden 400 gektar jer alyp, Özbekstan jäne basqa elderden bastapqyda 35 jasqa deiıngı mamandyǧy bar jastardy äkelıp, jūmys ornyn qūryp, et, süt öndırıp, ony Taşkentke jetkızemız. Artyq önımdı Europaǧa ne Sıbırge ötkızemız. Qazaqta «Elge el qosylsa - qūt» degen söz bar. Elbasynyŋ saiasatynyŋ arqasynda 27 jylda 1 mln bauyrymyz elge oralyp otyr. Olardyŋ bırazy üisız-küisız, jūmyssyz jürgen jaǧdaiy bar. Şet memlekette jürgen qazaqtardyŋ köbı osy jaǧdaidyŋ barlyǧyn bıledı. Sol sebepten aldymen elge kelgen bauyrlarymyzdyŋ jaǧdaiyn jöndesek degen nietpen bıraz jūmys jasap jatyrmyz», - dedı Zauytbek Tūrysbekov.Sonymen qatar şeteldegı qazaqtardyŋ qazaq tılın saqtap qaluyna qatysty pıkırımen bölıstı.
«Bız erıktılerdı daiyndap, şette ömır sürıp jatqan qazaq balalarynyŋ ana tılın 2 jasynan boiyna sıŋırudı közdep otyrmyz. Degenmen ana tılın bılu - qazaq bolu emes. Onyŋ namysy, ary boluy kerek. Sol sebepten qazaqtyŋ boiyna sony sıŋıru qajet. Sondyqtan qysqa-nūsqa üş minuttyq rolikter daiyndap jatyrmyz», - dedı ol.