Oralda alaıaqtyq jasady dep aıyptalǵan bloger Aslan Ótepov tergeý ızolıattorynda ashtyq jarııalady. Bul týraly "Ýralskaıa nedelıa" jazdy, dep habarlaıdy “Adyrna” ulttyq portaly.
Oralda belgili blogerdiń soty júrip jatyr. Sot talqylaýy barysynda prokýror Ótepovty 7,5 jylǵa bas bostandyǵynan aıyrýdy surady.
Ótepov túrme kamerasynan vıdeoúndeý jasap, 3 kúndik ashtyq jarııalaǵanyn málimdedi. Bloger óz málimdemesinde birqatar quqyq qorǵaý organdary qyzmetkerin kináli dep sanaýdy surady.
Qorǵaýshy tarap azamattyq belsendige qarsy qylmystyq istiń astarynda tramadoldy zańsyz satýǵa qarsy kúresine baılanystyryp otyr.
Eske salaıyq, Aslan Ótepov alaıaqtyq jasady jáne para berýge shaqyrdy dep aıyptalǵan. Sot otyrysynda ol balalar úıiniń tárbıelenýshisi jáne kámeletke tolmaǵan úsh balany tárbıelep otyrǵandyqtan, ózin bas bostandyǵynan aıyrmaýdy surady.
"Men resmı túrde úsh kúnnen beri ashtyq jarııalap otyrmyn. Eger ashtyq jarııalaǵan soń basyma qandaı da bir qıyndyq tússe, myna adamdardy kinálaýyńyzdy suraımyn: birinshiden, ótinishke zańsyz qol qoıǵan Oral qalasynyń prokýrory Sátbaev Azamatty. Sodan soń Semılıdı Anastasııany. 1976 jyly týǵan sýdıa Karpov Nıkolaı da bar", - deıdi Ótepov vıdeoda.
Ótepov bul sheshimdi ózi qabyldaǵanyn jáne ózi qamaýda otyrǵan mekeme ákimshiligine eshqandaı talaptary joq dep sendirdi.
