"Qazaqstandyq atom elektr stansiialary" JŞS direktory Timur Jantikin atom elektr stansiiasyn salu tärtıbın tüsındırdı, dep habarlaidy Sputnik Qazaqstan.
Byltyr atom salasyn damytu jönındegı vedomstvoaralyq komissiianyŋ otyrysynda AES-ty Almaty oblysynyŋ Ülken auylynda saluǧa ūsynys jasaldy. Stansiianyŋ quaty - 2800 MVt. Zaŋ boiynşa atom elektr stansiiasy ornalasyn jerdı ükımet şeşımımen bekıtu kerek. Ondai şeşım aldymen jergılıktı ökıldılık organymen kelısıledı.
"Osyǧan bailanysty 2022 jyly 15 qaraşada bız Qonaev qalasyna baryp, Almaty oblysynyŋ mäslihat deputattaryna barlyq aqparatty jetkızdık. Olar maqūldady. Osydan keiın Ülken auylynda qoǧamdyq tyŋdaular ötkızuge şeşım qabyldandy", - dedı Jantikin atom energetikasyn damytu mäselelerıne arnalǧan jiynda.Onyŋ aituynşa, qazırgı kezde jergılıktı jäne şeteldık ūiymdardyŋ tarapynan AES-tyŋ ornalastyn jerıne qarai sipattama jasau boiynşa baǧa ūsynystary tüstı. Ol ūiymdardyŋ ışınde KHNP (Koreia), Assystem (Fransiia), Qazaqstannyŋ jobalau jäne energoönerkäsıp instituty, sondai-aq ūlttyq iadrolyq ortalyq bar. Būǧan deiın qytailyq CNNC, reseilık "Rosatom", fransuzdyq EDF pen koreialyq KHNP kommersiialyq ūsynystaryn jasaǧan. Qazaqstan ükımetı atom reaktorlaryn sumen suytu tehnologiialaryn qarastyryp jatyr. Sol sebeptı osy tört kompaniianyŋ ūsynystaryn qarastyruǧa şeşım qabyldandy. Negızgı basymdyq – qauıpsızdık. Biyl nauryz aiynda Qazaqstanǧa MAGATE sarapşylary kelıp kettı. Olar bızdıŋ atom elektr stansiiasyn saluǧa qanşalyqty daiyn ekenımızdı 19 baǧyt boiynşa baǧalaidy. MAGATE-nyŋ tärtıbıne säikes, būl jūmys üş kezeŋnen tūrady. Bırınşı kezeŋı öttı. Sonyŋ qorytyndysy boiynşa halyqaralyq sarapşylar Qazaqstannyŋ daiyndyǧyna joǧary baǧa berdı. Timur Jantikinnıŋ sözıne qaraǧanda, biyl ükımettıŋ AES-tyŋ ornalasu jerıne qatysty qaulysy şyqsa, sondai-aq tehnologiiany jetkızetın kompaniia anyqtalǧan jaǧdaida tehnikalyq-ekonomikalyq negızdeme 2025 jylda daiyn bolady. Sosyn ony memlekettık saraptamadan ötkızu kerek.
"Saraptamanyŋ oŋ qorytyndysy şyqsa, tehnikalyq-ekonomikalyq negızdeme ükımetke jıberıledı. Osy qūjattyŋ negızınde AES-ty salu turaly qauly qabyldanady. Būdan keiın jobalyq-smetalyq qūjattardy äzırleu jäne saraptamadan ötkızu jūmystary bastalady", - dep atap körsettı Jantikin.Qūrylys jūmystary 2034 jyly aiaqtalsa, bır jyldan keiın AES-ty paidalanuǧa bere alady.
"Nege bız 2,8 GVt-qa deiıngı stansiialardy taŋdadyq? Bızdıŋ 2018 jylǧy esebımızge säikes, oŋtüstıkte bazalyq quat közderınıŋ tapşylyǧy 2,7 GVt-qa deiın bolady. Sol kezde qūral-jabdyqtardyŋ tozuy da eskerıldı. Osylaişa, 2030 jyly energiia tapşylyǧy 1,8 GVt, 2035 jylǧa qarai 3,2 GVt, al 2050 jyly 5 GVt bolady degen boljam bar. Demek, ekı bloktan tūratyn jäne ärbıreuınıŋ quaty 1400 MVt bolatyn AES salu qajet", - dedı Jantikin.
