Jaraqat alǧan äiel oblystyq auruhanaǧa jetkızıldı
Atyrau äuejaiynda polisiia qyzmetkerı abaisyzda äiel adamnyŋ aiaǧynan oq atqan, dep habarlaidy jergılıktı Aqjaiyq basylymy.
29 nauryz künı saǧat 16.30 kezınde jolauşylar terminalynda atylǧan oq ünı şyqty. Boljam boiynşa, polisiianyŋ jelılık bölımınıŋ qyzmetkerı tabeldık qaruyn teksermek bolyp, baiqausyzda şürıppenı basyp jıberıptı.
Atylǧan oq kütu zalynda otyrǧan Atyrau tūrǧynynyŋ aiaǧyna tigen. Jas äiel äuejaiǧa Astanadan kele jatqan tuystaryn qarsy aluǧa barǧan eken.
Zardap şeguşı oblystyq auruhanaǧa jetkızıldı. Polisiia sotqa deiıngı tergeu jūmystaryn jürgızıp jatyr.
