Şyǧys Qazaqstan oblysynda Semei qalasyna jaqyn jerdegı Suyqbūlaq auylynda jantürşıgerlık örtten ekı bala qaza tapty. Oqiǧanyŋ män-jaiy tergelıp jatyr.
"Qazır örttıŋ bastapqy sebepterı qarastyrylyp jatyr: otty paidalanuda qauıpsızdık erejesın saqtamau, balalardyŋ tentektıgı nemese ädeiı ört qoiu", - dep habarlady tötenşe jaǧdailar basqarmasynyŋ basşysy Qanat Äbdılov.
Semei äkımı Ermak Sälımov balalardyŋ qazasy turaly habar şyqqan boida oqiǧa ornyna attanyp, anyq-qanyǧyn bıldı.
"Qala äkımdıgınıŋ mälımetınşe, balalardyŋ anasy - 28 jastaǧy kelınşek qazır jūmyssyz, aiaǧy auyr eken. Ört bolǧan künı esıktı qūlyptap, därıgerge qaraluǧa ketken. Qyryq alty jastaǧy otaǧasy Nūr-Sūltan qalasynda qūrylysşy bolyp ısteidı, qaiǧyly oqiǧa kezınde Semeide bolmaǧan", - dep mälımet berdı Sälımov.
Otbasyǧa äkımdık järdem körsetken
Qala äkımdıgınıŋ mälımetınşe, otbasy äleumettık tölem aluǧa ötınış bermegen, jūmyssyz retınde de tırkelmeptı. Alaida otbasynyŋ qiyndyqqa tap bolǧanyn äkımdık bılıp, barynşa järdem körsetuge tyrysqan.
"Şaǧyn audan №48 orta mektepke qaraidy. Mektep qyzmetkerlerı jylyna tört ret üi-üidı aralaidy. Qyrküiek, qaraşa jäne qaŋtarda ata-anaǧa balalardy qoǧamǧa beiımdep, mektepke daiarlau kerektıgı tüsındırıldı. Reidterdıŋ bırınde ülken ūly äkesımen bırge elordada ekenı belgılı boldy, al kenjesı böten adamdardyŋ qolynda tūrǧan eken"- dedı Sälımov.
Balalar tūryp jatqan sanitarlyq-tūrmystyq jaǧdaidyŋ tömendıgıne bailanysty, üidıŋ kenjesı Balalar üiıne jıberıluı tiıs edı. Alaida anasynyŋ aryzy men polisiia organdarynyŋ ötınışıne bailanysty balany otbasyǧa qaitarypty.
"Otbasy tūratyn mekenjai "Jolaman" otbasylyq därıgerlık ambulatoriiasynyŋ uchaskesıne kıredı. Mekeme otbasyǧa ünemı medisinalyq aqyl-keŋes berıp, därıgerler balalardy uaqytyly qarap otyrǧan. "Salamatty ana men bala" ailyǧynyŋ aiasynda otbasy köpbalaly bolmasa da, tiıstı medisinalyq kömek aldy", - dep atap öttı äkım.
Marqūm balalardyŋ anasy daǧdarys ortalyǧynda
Şyǧys Qazaqstan oblysy äkımınıŋ orynbasary Äsem Nüsıpova aitqandai, jüktı äieldı daǧdarys ortalyǧyna ornalastyrdy. Qazır psihologtar kömektesıp jatyr. Jergılıktı bilık ökılderı otaǧasymen de kezdesıptı, ol qazır Semeide tuystarynyŋ üiınde tūryp jatyr. Qala äkımdıgı balalardy jerleu räsımın ūiymdastyrudy moinyna aldy.Naryn Qali
