Alǧaşqy kölıgım "Golf 3" bolatyn. Ūzaq mındım. Özı sändelgen, naǧyz boidaqtarǧa arnalǧan maşina edı. Keiın qimai sattym. Dollarmen tölenetın kez. Qalai sattym, solai dollar qymbattady. Qolymda 3400$. Qazaqstannan būl baǧaǧa jönı dūrys kölık tappaisyŋ. Qossaŋ da jetpeidı. Sodan naǧaşylaryma baryp, Subaru forester aldym. Jaryqtyq jaqsy kölık edı. Gazdy säl bassaŋ asau aiǧyrlardai oqyranatyn. Bıraq, "pravarulka" degenıŋ bärıbır qiyn eken. Taǧy Bişkekke baryp, Toyota Camry 30 degenge aiyrbastadym. Naǧyz şaruanyŋ kölıgı ǧoi. Synu degen joq, benzin qūiasyŋ da jüre beresıŋ. Uaqytyn ötkızıp baryp maiyn auystyrsaŋ da qyŋq demeidı. Dymyn şyǧarmai jüre beredı. Almatyda da kışkene aidadyq, Qyzylordada da mındık, Astanaǧa da alyp kelıp, bertınge deiın sol toiotamen jürdım. Jolda qaldyrǧan joq. Oiǧa da bırge tüsıp, qyrǧa da bırge şyqtyq. Bala-şaǧamdy salyp alyp, osy toiotamen Qazaqstannyŋ bıraz jerın aralaǧanmyn. Bır ǧana minusy boldy. "Azamattyǧy" qyrǧyz edı. GAİ-dıŋ de közıne jyldam ılınesıŋ, nömırı böten bolǧandyqtan özıŋ de tolyqqandy kölık mıngendei bolmaisyŋ. Satylauy da qiyn. "Po-svoiski maǧan ber" degen soŋ ınıme pihat etıp jıbergem. Jaqynda kölıgınıŋ "azamattyǧyn" qazaqqa auystyryp, süiınşı sūrap tūr. Nömırı qazaq bolsa, kölıktıŋ de bırden ajary kırıp qalady eken. Qūddy bır, jaŋasyn mıngendei şattanyp jür. Al erteŋ kölıktı legalizasiialaudyŋ soŋǧy künı. Odan keiın ötınışter qabyldanbaidy. Degenmen, ötınış berıp ülgergenderdıŋ kölıkterı eş kedergısız "qazaq" boluǧa qūqyly eken. Jalpy, 23 qaŋtardan bastalǧan aksiianyŋ da soŋyna taiappyz. Ötkende 161 myŋnan astam şeteldık kölıktıŋ "qazaqqa" ainalǧanyn oqyǧanmyn. Taǧy 13 myŋy kezegın kütıp tūrǧan. Orasan sifr. Ülken mümkındık berıldı. Kölıgın legalizasiiadan ötkızgenderdıŋ qatarynda tarazdyq dostarym da bar. Barlyǧy mümkındıktı paidalanyp, kölıkterın räsımdep aldy. Bır sözben aitqanda, halyqtyŋ rahmetı zor. Endı nauqandy aiaqtai beruge bolady..
Aziz Jūmadıl
