Úshinshi oryn úshin bolǵan básekede Janarbek Áshimjan, Jandos Aıtbaıuly bastaǵan Almatynyń jigitteri «Habar» agenttiginiń komandasyn 7:2 esebimen oısyrata jeńdi.
Fınalda «Syǵanaq» pen «Taraz-Press» kezdesti. Bul matchta negizgi ýaqyt 2:2 esebimen teń aıaqtaldy. Oıyn sońyndaǵy penaltıde «Syǵanaq» komandasy taǵy da jeńiske jetip, «Jańarǵan Túrkistan» respýblıkalyq týrnıriniń chempıony atandy.
Jeńimpaz ben júldegerlerdi Túrkistan oblystyq ishki saıasat basqarmasynyń basshysy Beısenbaı Tájibaev marapattady. Jeńimpaz «Syǵanaq» (Qyzylorda oblysy) komandasy kýbokpen, medaldarmen jáne 500 myń teńge kóleminde aqshalaı syılyqpen marapattaldy. Ekinshi oryndy jeńip alǵan «Taraz-Press» – 300 myń, al, qola júldeger atanǵan Almaty quramasy 150 myń teńgege ıe boldy.
Týrnırdiń «Úzdik oıynshysy» syılyǵymen belgili sport jýrnalısi, Almaty qalasynyń ókili Jandos Aıtbaıuly marapattalsa, «Habar» agenttiginiń kapıtany Nursultan Qurman týrnırdiń úzdik shabýylshysy dep tanyldy. Jastarmen teń dárejede oınap, sheberligin pash etken Shoqan Mahanov (Almaty) úzdik qaqpashy atansa, týrnırdiń «Úzdik qorǵaýshysy» syılyǵymen Almaty oblysynan kelgen Rústem Qanapııanov marapattaldy.
«Jańarǵan Túrkistan» dodasynda eń ardager oıynshy atanǵan «Oral óńiri» gazetiniń bas redaktory Baýyrjan Ǵubaıdýllınge (BQO) Oktıabr Jarylǵapov atyndaǵy syılyq tapsyryldy. Al ádil ári taza oınaǵany úshin Ábdisalan Nurmahanov atyndaǵy syılyqqa «Soltústik Qazaqstan» gazetiniń bas redaktory Erbaqyt Amantaı (SQO) laıyq dep tanyldy. Kórermen kózaıymyna aınala bilgen «Qazaq sporty» gazetiniń jýrnalısi Bek Tóleýge Bekzat Sattarhanov atyndaǵy júlde tapsyryldy.
Jalpy 130-daı adam qatysqan «Jańarǵan Túrkistan» respýblıkalyq týrnırine qatysýshylar qonaqjaı Túrkistan jurtshylyǵyna rızashylyqtaryn bildirip, qasıetti shahardan kóterińki kóńil-kúımen attandy.
