Jelide Atyraýdaǵy «Shańyraq» balalar úıiniń tárbıelenýshisiniń vıdeosy tarady, dep habarlaıdy “Adyrna” ulttyq portaly.
Vıdeoda Nurdáýlet esimdi balalar úıiniń tárbıelenýshisi halyqtan kómek suraıdy. Ol onda balalardy uratynyn, ýnıtazdyń sýyn ishkizetinin aıtady.
Dırektor Asyljan men psıhologqa “shyǵa turyńyzdar” dedi. Sosyn maǵan “Nurdáýlet, mynanyń bárin ótirik dep aıt, sonda ǵana Shańyraqqa kelgennen keıin lıder qylamyn, 3 kún batýt, 3 kún kafe-restoranǵa aparamyn, jańa telefon, jańa kıimder alyp beremin”, dedi. Meni ózine satyp alǵysy keldi. Joq, mynanyń bári shyndyq.
Myna vıdeony sizder kórip otyrsańyzdar, men Shańyraqta ádildik ornaǵanyn qalaımyn. Ár balanyń qınalǵanyn qalamaımyn. Men kórgen qorlyqty olar kórgenin qalamaımyn. Mysaly, meni uryp-soǵyp, ýnıtazdyń sýyn ishkizdi. Erteń ósip kele jatqan balalarǵa qandaı tárbıe, ónege bolady. Maǵan sol qyzyq. Ana jaqta búkil bala qoryqqannan úndeı almaı otyr. Dırektor qorqytyp qoıǵan. Sol úshin sizderden kómek suraımyn, - dedi vıdeoda.
Bul týraly jýrnalıst Armangúl Toqtamurat Facebook paraqshasyna jarııalap, mundaı is atalǵan balalar úıinde birinshi ret emes ekenin aıtty.
Jerde jetim jylasa, kókte perishte kúńirenedi. Atyraýdaǵy “Shańyraq” balalar ınternaty taǵy nazarda. Esterińizde me, osy jyldyń basynda taǵy da “Shańyraqta” balalardyń biri qatty taıaq jep, senim telefonyna habarlasqanyn “nemolchı.kz” jazǵan edi. Dırektor balalardyń esh zábir kórmegenin aıtqan al, komıssııa eshqandaı zańbuzýshylyq anyqtamaǵan.
Mine, taǵy dál osy “Shańyraqtyń” balasy shyryldap otyr. Anyq-qanyǵyn quzyrly organdar anyqtaı jatar, eger balanyń aıtqany ras bolsa, jaýaptylar jazalanady dep seneıik! Aıtpaqshy, qazir depýtattar jer-jerdi aralap júr. Osy óńirden saılanǵan depýtattar eskerseńizder!
Bir aıtpaǵym, eldegi balalar úıi bireýdiń jeke úıi emes. Memlekettik mekeme. Iaǵnı, dırektordyń, tárbıeshilerdiń óz mindetteri bar. Sol úshin aılyq alady memleketten, - dep jazdy jýrnalıst.
