QR Bala quqyqtary jónindegi ýákili Dınara Zákıeva Astana qalasynda saýda ortalyǵynda bolǵan tóbeleske qatysty oıymen bólisti, dep jazady "Adyrna".
18 maýsym kúni Astana qalasyndaǵy saýda ortalyqtarynyń birinde kishkentaı balany kóterip turǵan azamatqa boksshy Beıbit Shúmenov judyryq ala júgirip, tóbeles oryn alǵan bolatyn.
Keıinnen Shúmenov soqqyǵa jyqqan er adamnyń ulynda aýtızm belgileri bar ekendigi aıtyldy.
Kadrlardan balanyń qaýipsizdigine qaýip tóný faktisi áleýmettik jelilerde jarııalanǵan beınemen rastalatynyn aıtty Dınara Zákıeva.
"Bul jaǵdaıda tulǵany jaýapkershilikke "Qorqytý" atty QR QK-niń 115-baby boıynsha tartý qajet dep oılaımyn. Qoldanystaǵy zańnamada balanyń qaýipsizdigi men densaýlyǵyna qaýip tóndiretin jaǵdaı týǵyzý úshin jaýapkershilikti kózdeıtin bap joq. Balalardyń qaýipsizdigin qamtamasyz etý máseleleri boıynsha zańnamaǵa daıyndalǵan ózgerister blogyna tıisti usynys engizetin bolamyn" dep jazdy ol áleýmettik jelidegi paraqshasynda.
Sondaı-aq, ol kez-kelgen jaǵdaıda eresekter balalar týraly oılaýy qajet ekenin jetkizdi.
Esterińizge sala keteıik, atalǵan jaǵdaıdan soń Beıbit Shúmenovtyń qandaı jaza arqalaıtyny jaıly habarlanǵan bolatyn. Oǵan eki jylǵa deıin bas bostandyǵynan aıyrylý jazasy tónip turǵany aıtyldy.
