Prezıdent saılaýy qarsańynda sekirip ólgim keldi. Anyǵyn aıtsam, sýıd jasap, qoǵamdy dúr silkindirmesem de, titirkendirgim, bılikke narazylyǵymdy bildirgim keldi. Biraq men kimmin? Men o dúnıege attanǵanda, aspan jyrtylep–jyrtylep keter me?
Úlken kópirdiń ústinde turmyn. Oılanyp. Tolǵanyp. Sekirsem be, sekirmesem be? Bir kezde kópir qorshaýynan aıaǵymdy asyp, butymdy kótere bergenimde, shatym shym ete qaldy. Burylyp qarasam, bir ádemi kelinshek tur. Sanymnan shymshyp alypty.
–Keshirińiz, sıgaretińiz bar ma? –dep surady. Qap mynany–aı, á? Qaltamnan temeki alyp berdim. Sóıttim de, eki aıdan keıin bolatyn saılaýdyń ádil ótpeıtinine narazylyǵymdy bildireıin degen oımen aıaǵymdy temir qorshaýǵa asyp, ekinshi aıaǵymdy kótere bergenimde, shatym taǵy shym ete qaldy. Qarasam, jańaǵy sulý kelinshek.
–Keshirińiz aǵaı, ottyǵyńyzdy bere turyńyzshy, báribir sizge keregi joq qoı? –dep surady. Ózi tákappar. Ózi sulý. Ózi sondaı... Meniń óleıin dep jatqanyma pysqyrmaıdy da. Ottyqty bere salyp, oılanyp qaldym. Sekirip ólsem be, ólmesem be? Al, óldim. Ne bolady? Jooq, sheshingen sýdan taıynbas. Sekirip ólemin! Myna saılaý ádil óte me, ótpeıdi me? Álde prezıdenttiń týysy, ne qyzy patsha bola ma? Eeh, jańashyl, eline jaqsylyq jasaýdan sharshamaıtyn prezıdent kelse ǵoı? Áı, qaıdam, odan da óle salaıyn da... Aıaǵymdy asyp, temir qorshaýdyń arǵy betinde turmyn. Bir, eki, úsh! Sekirip ólemin! Qulaı bergenimde, kýrtkamnan bireý tartyp qaldy. Jańaǵy bıkesh:
–Keshirińiz aǵaı, siz báribir ólesiz ǵoı, uıaly telefonyńyzdy bere turyńyzshy, qurbymmen sóılesip alaıyn, –degeni. Qap, mynany aı, á? Uıaly telefonymdy aldy. Joq, endi eshteńege qaramaımyn! Sekirip ólemin! Prezıdenttik saılaýda demokratııa joq bolýy múmkin! Endi sekire bereıin degenimde, sulý kelinshek:
–Keshirińiz, sizben súıisýge bolady ma? –dep qoıyp qalǵany. Jalt qarappyn. Ol bilegin moınyma asyp, ábirjip turǵanyma qaramastan, ernimnen súıip–súıip aldy. Sóıtti de, kóshe boılap kete bardy. Sońynan tamsana qarap qalyppyn. Ádemi kelinshektiń ádemi erniniń dámi aýzymnan ketpeı, ómirge qushtarlyǵym oıanyp, temir qorshaýdy tastaı, sońynan ilese berdim. Saıasat, saılaý, bárin oıymnan shyǵaryp, mahabbat tenderimen aınalyssam deımin! Joq, men sekirip ólmeımin, kim bolsa da, kelesi prezıdentti kórgim keledi!
Muhtar ShERIM. SEKIRIP ÓLEM!
11.04.2019
2093
Pikirler
Basqa materıaldar
Adyrna.kz ұлттық порталының маңызды ақпараттарына жазылу
Соңғы жаңалықтар туралы хабардар болыңыз