Qazaqstanda ekı jyl ışınde mügedek balalarǧa qosymşa sabaq beretın 15 myŋnan asa mūǧalım jalaqysyna qosylyp tölenuı tiıs aqşany almaǧan. Bas prokuratura baspasöz qyzmetınıŋ habarlauynşa, mūǧalımderge tölenbegen üstemeaqynyŋ jalpy somasy - 176,2 million teŋge.
"Prokuratura jalpy bılım beretın mekemeler qyzmetkerlerınıŋ eŋbek qūqyqtarynyŋ saqtaluyn taldau barysynda Qazaqstan boiynşa 15 305 pedagogke 2016-2018 jyldardaǧy oqu kezeŋınde erekşe bılım beru qajettıgı bar balalarmen jūmys ıstegenı üşın üstemeaqy tölenbei kelgenın anyqtady" dep jazady.
Vedomstvonyŋ jazuynşa, inkliuzivtı bılım beru aiasynda jūmys ıstegenı üşın pedagogke jalaqysynyŋ 40 paiyz şamasynda üstemeaqy tölenuı tiıs.
"Zaŋ būzuşylyqtar joiylyp, mūǧalımderge 176, 2 mln teŋge mölşerınde üstemeaqy audaryldy" dep jazady prokuratura.
Qazaqstanda Bılım turaly zaŋǧa 2010 jyly engızılgen tolyqtyrular men özgertuler boiynşa, kez kelgen mektep erekşe mūqtajdyǧy bar balany qabyldauǧa mındettı. Bıraq ıske kelgende qūral-jabdyq pen arnaiy mamannyŋ joqtyǧynan būl saiasat jüzege asa bermeidı. Resmi derek boiynşa, eldegı kämelet jasyna tolmaǧan balalardyŋ üş paiyzy, iaǧni 148 myŋy inkliuziiaǧa zäru. Olardyŋ 40 myŋǧa juyǧyna ǧana arnaiy bılım beretın jaǧdai jasalǧan.
