Tört ret prezident sailauyna qatysatynyn aityp, bıraq eşbırınde sailaudyŋ soŋyna deiın barmaǧan Jaqsybai Bäzılbaev 9 mausymda ötetın Qazaqstannyŋ kezekten tys prezident sailauyna qatysatynyn aitty. Būl turaly ol 19 säuırde Almatyda ötken baspasöz jiyny kezınde mälımdedı.
Ol sailauǧa "Qazaqstandaǧy orys qauymdastyǧy" qoǧamdyq ūiymynyŋ atynan tüspek.
"Qazaqstandaǧy orys qauymdastyǧy" Bäzılbaevtyŋ ūiym atynan sailauǧa tüsu nietın "jiyn barysynda bılgen". Jiynǧa kelgen ūiym ökılı "būl ötınıştı endı ǧana estıgenderın, bır apta ışınde aqyldasyp, şeşım qabyldaityndaryn" aitty.
Jiyn kezınde Bäzılbaev sailaualdy baǧdarlamasymen tanystyrdy.
- Qorǧanys qabıletın nyǧatudan bastaimyn. Europa odaǧy men Şanhai yntymaqtastyq ūiymyn qoldaimyn. Euraziialyq odaq aiasynda Reseige qorǧanys koalisiiasyn qūrudy ūsynamyn, - dedı ol.
Bäzılbaevtyŋ ekı bettık sailaualdy baǧdarlamasynda zeinetkerlerdı kommunaldyq tölemnen bosatu, köp balaly analarǧa tegın baspana beru, oqu men medisinany tolyqtai tegın etu men är qalada zauyt-fabrika salu jospary bary jazylǧan.
1998 jylǧy prezident sailauynda Bäzılbaev bäsekelesı Nūrsūltan Nazarbaevtyŋ paidasyna sailaudan şyǧatynyn mälımdegen. Azattyqtyŋ "Osy joly sailauda äldebır kandidattyŋ paidasy üşın sailaudan şyǧyp qalmaisyz ba?" degen sūraǧyna Bäzılbaev "şyqpaimyn" dep jauap berdı.
- Şyqpaimyn. Zaŋda qozǧalys ne partiia atynan tüsseŋ, sen şeşpeisıŋ, senı kım, qai partiia tüsıredı – solar şeşedı. Sol sebeptı menı ūsynsa, men tüsemın, täuekel, - dep jauap berdı.
67 jastaǧy Jaqsybai Bäzılbaev būǧan deiın tört ret – 1998, 2005, 2011 jäne 2015 jyldary ötken Qazaqstan prezidentı sailaularyna özın-özı ūsynǧanymen, saiasi bäsekenıŋ soŋǧy kezeŋıne jetpei, öz erkımen şyǧyp ketken.
