«Qalamqas» ken ornynda būrǧylau kezınde oryn alǧan apatqa bailanysty qytailyq «Si Bu «İnjenerlık būrǧylau kompaniiasy» JŞS-ǧa aiyppūl salynyp, lisenziiasy uaqytşa toqtatyldy. Būl turaly Energetika ministrlıgınıŋ baspasöz qyzmetı habarlady.
«2018 jyldyŋ 3 nauryzy künı saǧat 17:30-da Maŋǧystau oblysyndaǧy «Qalamqas» mūnai-gaz ken ornynda «Si Bu «İBK» (Aqtau) JŞS-nyŋ №8237 ūŋǧymany būrǧylauy kezınde apat oryn alǧan bolatyn. Osy faktı boiynşa Energetika ministrlıgınıŋ Mūnai-gaz keşenındegı memlekettık inspeksiiasynyŋ batys öŋıraralyq basqarmasy 2019 jyldyŋ 8-19 säuırı aralyǧynda serıktestıkke jospardan tys tekseru jürgızdı», - delıngen ministrlık habarlamasynda.
Ministrlıktıŋ aqparaty boiynşa, «Si Bu «İBK» JŞS qytailyq kompaniiasy mūnai jäne tabiǧi gaz öndıru kezınde tehnikalyq qoldau körsetumen ainalysady.
Tekseru nätijelerı serıktestıktıŋ bırşama talaptardy oryndamaǧanyn anyqtaǧan. Atap aitqanda, kömırsutek salasyndaǧy qyzmetti jüzege asyru üşın qoiylatyn bılıktılık talaptary men olarǧa säikestiktı rastaityn qūjattar tizbesıne säikessızdıgı, tehnologiialyq reglamentterdıŋ säikessızdıgı, menşık qūqyǧynda nemese özge de zaŋdy negızde keibır jabdyqtar men aspaptardyŋ boluyn rastaityn qūjattardyŋ bolmauy, arnaiy qyzmetter qūru nemese jauapty tūlǧalardy taǧaiyndau turaly būiryqtardyŋ bolmauy, sondai-aq zaŋdy jäne «rūqsattar jäne habarlamalar turaly» zaŋ talaptarynyŋ oryndalmauy belgılı bolǧan.
«Äkımşılık ıstı qarau nätijelerı boiynşa 150 AEK mölşerınde äkımşılık aiyppūl salyndy. Sondai-aq, «İBK» SiBu» JŞS-nıŋ kömırsutekter salasyndaǧy qyzmet türlerıne memlekettık lisenziianyŋ qoldanyluy belgılengen būzuşylyqtar joiylǧanǧa deiın toqtatyldy», - delıngen habarlamada.
Aita keteiık, tötenşe jaǧdai 13 nauryz künı Maŋǧystau audanyndaǧy «MaŋǧystauMūnaiGaz» AQ-nyŋ «Qalamqas» mūnai-gaz ken ornynda bolǧan edı. «Si Bu» injenerlık būrǧylau kompaniiasy» JŞS №8237 ūŋǧymasyn būrǧylau barysynda gaz-su qospasy atqylady.
Al 25 nauryz künı saǧat 07:10-da Maŋǧystau oblystyq TJD kezekşı-dispetcherlık qyzmetıne «Qalamqas» ken ornyndaǧy ūŋǧymadan şyqqan gaz janyp, biıktı 10 metrge deiın jalyn atqylap tūrǧandyǧy habarlandy.
QR Prezidentı Qasym-Jomart Toqaev ken ornyndaǧy jaǧdaidy öz baqylauyna alyp, Ükımetke tiıstı tapsyrmalar jüktegen bolatyn.
Ört 25 nauryz künı söndırıldı.
"Adyrna" ūlttyq portaly
