Astana. 02 qyrkúıek 2023 jyl. Qazaqstannyń keńistiginde álemde teńdesi joq uzyn qashyqtyqtarǵa arnalǵan at sportynyń múldem jańa túri - Joryq paıda boldy. Ol alǵash ret 2022 jyly ótken «Uly dala joryǵy» marafon-báıgesiniń nátıjesinde dúnıege keldi.
Qazaqstanda taı-báıge, qunan-báıge, alaman báıge, jorǵa báıge sekildi at jarystarynyń birneshe túri belgili. Alaıda olardyń bireýi de Joryq sııaqty uzaq qashyqtyqty baǵyndyrmaıdy.
2022 jyly «Uly dala joryǵy» marafon-báıgesiniń alǵash maýsymy oıdaǵydaı ótti. Bul oqıǵa at sporty álemindegi naǵyz jańalyq boldy. Birinshi marafonnyń qashyqtyǵy 1200 shaqyrymdy qurady. Onyń qashyqtyǵy men qıyndyǵyna qaramastan, 95 tulpardyń 26-sy oıdaǵydaı márege jetti. Bul jetistik Joryqtyń ómirsheńdigin dáleldep, álemdik at sportyna ózindik jańashyldyq engizip otyr.
Mońǵolııada osyndaı at marafony ótkiziletini belgili. Alaıda onda qashyqtyq 1000 shaqyrymdy quraıdy. Bul rette ár 40 shaqyrym saıyn jylqy aýystyrylyp otyratynyn eskergen jón. Al bizdiń jaǵdaıda marafon qashyqtyǵynyń jartysy - 650 shaqyrymnan keıin bir ret qana at aýystyryý ruqsat etiledi. Bul taǵy bir márte qazaqtyń jylqy tuqymdarynyń erekshe tózimdiligin rastaıdy.
Qazaqstanda Joryq bıyl erekshe nazar aýdarýǵa laıyq. Sebebi aǵymdaǵy maýsymda qashyqtyq 1300 shaqyrymdy quraıdy. Shabandozdar Astanadan Túrkistanǵa deıingi baǵytty 14 kún ishinde ótýi tıis. Bul mindetti az ýaqyt ishinde oryndap shyǵatyn komanda «Uly dala joryǵy» marafon-báıgesiniń absolıýtti jeńimpazy atanady.
«Uly dala joryǵy - 2023» marafon-báıgesiniń maýsymy 3 kúnnen keıin - 6 qyrkúıekte saǵat 14:00-de Qarajar (Ilınka) aýylynda bastalady. Bul tek at sporty jankúıerleriniń ǵana emes, sondaı-aq, jańa syn-tegeýrinder men emoııalarǵa qushtar qazaqstanydqtardyń da nazaryn ózine aýdaratyn tyń oqıǵa bolmaq.
- Bastalý kúni: 2023 jylǵy 6 qyrkúıek
- Ótetin orny: Qarajar aýyly (Ilınka)
- Qashyqtyq: 1300 kılometr
- Uzaqtyǵy: 14 kún
- Resmı saıty: www.joryq.kz
«Uly dala joryǵy» marafon-báıgesiniń uıymdastyrý komıteti
"Adyrna" ulttyq portaly
