Jaza merzımın qamauda ötep jatqan azamattyq belsendı Timur Dänebaevty türme qyzmetkerlerı ūryp jatqan video äleumettık jelıde tarady, dep habarlaidy "Adyrna".
Videoda şaşy alynǧan, sottalǧandarǧa arnalǧan kiım kigen adam men bırneşe türme qyzmetkerınıŋ qaraŋǧy bölmede tūrǧany anyq baiqalady.
Ortada tūrǧan azamattyŋ keudesındegı oŋ jaqtaǧy jazuda "Timur Dänebaev" degen esım bolǧan. Videoda jazasyn öteuşıge ekınşı bıreu öktem dauyspen: "Türme tärtıbıne baǧynbadyŋyz, bırneşe ret eskertu jasaldy, ony oryndamai qoidyŋyz" deidı de, qasyndaǧy özge adamdarǧa būrylyp: "Arnaiy qūraldy qoldanyŋdar!" dep būiyrady.
Būiryqtan soŋ türme qyzmetkerınıŋ kiımın kigen alty adam älgı jazasyn öteuşını tas edenge etpetınen jatqyzyp, aiaq-qolyn qaiyryp, küşpen ūstap otyrady. Videodan bır türme qyzmetkerı tūtqynnyŋ janyna tızerlep otyryp, arnaiy qūral – rezeŋke taiaqpen qūiymşaqtan tömen tūsty közdep, bar küşımen qūlaştap tūryp tört ret ūrǧanyn baiqauǧa bolady.
Qatty tigen soqqydan tas edende jatqan adamnyŋ janūşyra aiǧailaǧany estıledı. Bıraq ūryp jatqan adam ony eş elemeidı.
Jazasyn öteuşını azaptauǧa qatysty beinede oqiǧa Aqmola oblysy Atbasar qalasyndaǧy jaza öteu mekemesınde 24 tamyzda bolǧan dep jazylǧan.
Qyzmetker belsendıge «sanitariia-gigiena normalaryn saqtau» turaly mındetın aityp, küş qoldanuǧa būiryq bergen. Video soŋynda būiryq beruşı qyzmetker belsendıge äkımşılık hattama toltyrylatynyn aitady.
Taralǧan videoda tūtqyndy ūruǧa qatysqan keibır qyzmetkerlerdıŋ bet-älpetı de anyq körınıp qalǧan. Odan bölek arnaiy kiımdegı bıreuınıŋ iyǧyndaǧy aǧa leitenanttyŋ pogony da közge şalynady.
Bilık "qyzmet ökıletın asyra paidalanu" faktısı boiynşa tekseru bastaǧanyn mälımdedı.
Bıraq "saiasi tūtqyn" atanǧan Timur Dänebaevtyŋ qazırgı jaǧdaiy qalai ekenın aitpady.
Ūqsas jaŋalyqtar
