"Äkem tün jarymynda tūryp ökırıp jylaidy": säläfittık aǧymnyŋ jetegınde ketken jıgıttıŋ äpkesı köpşılıkten kömek sūrady

Säläfittık aǧymnyŋ jetegınde ketken Aizadanyŋ ınısı 1995 jyly tuǧan jap-jas jıgıt. Ol 12 jasynan bastap namazǧa jyǧylǧan. Bıraq, äkesınıŋ aituynşa, Erkebūlan esımdı körşı bala terezenı jauyp qoiyp, oǧan namaz oqytatyn. Būnymen qoimai, Daryn degen jıgıttıŋ YouTube-tegı uaǧyzdaryn tyŋdatqan eken. «Osylardy tyŋdap ösken ınım bır künı Aiagözdegı meşıtke baryp şu şyǧardy. Ony jergılıktı imamdar tanidy. Qazır ol auylda tūryp jatyr. Oǧan bärın tüsındırıp, qatelesıp jürgenın aitsaq bızdı müldem tyŋdaǧysy kelmeidı. İmamdar būny «säläfizm» degen mūsylmanşylyqtyŋ bır türı» deidı. Ol tıptı äkemdı tyŋdamaidy. Aitqanyn tyŋdata almaǧan äkem tünnıŋ bır uaqytynda tūryp: «A, qūdai, saǧan ne jazdym?!» dep ökırıp jylaidy»,-deidı Aizada. Jas jıgıt ata-anasyn jylatqanymen qoimai, soŋǧy kezderı tıptı äpkesıne qol köteretın bolypty. Ol anasy men äpkesıne oramal taǧyŋdar dep, olardy tūmşalap qoimaqşy eken. Äke-şeşesı men tuǧan äpkesın äbden qinaǧan jıgıt ne moldalardy mensınbeidı. Al äielı men balasy ol üşın ekınşı sottarǧy adamdar. Bauyrynyŋ osyndai jat aǧymnyŋ jetegınde ketkenıne qapa bolǧan boijetken ınım tıptı şelpek saldyrpaidy deidı. «Ne teledidardan öleŋ tyŋdatpaidy, ne  jetı şelpek pısırtpeidı. Kündız-tünı aitatyny qorqynyşty uaǧyzdar. Onyŋ üstıne ol öte qyzǧanşaq. Dınge erte kezden bet būrǧandyqtan  ba, psihikasyna zaqym kelgen siiaqty»,- deidı Aizada. Aituynşa, ınısı byltyr köterılıp, qatty auyrǧan eken. Sonda ony Almatydan qol-aiaǧyn bailap äreŋ äkelıptı. Miy ulanǧan  jıgıttıŋ äpkesı ınıme dın mamandarynyŋ emes, käsıbi psihologtardyŋ kömegı qajet siiaqty deidı. Bıraq, olar köpbalaly otbasy bolǧan soŋ, bauyryn emdetuge äzır qarajattary joq. Kımnen kömek sūraryn bılmei basym qatqan Aizada osyndai jaǧdaiǧa tap bolǧan kısıler  bolsa, öz keŋesterın berse eken deidı. Aita ketetını, Aizadanyŋ bauyry köpbalaly otbasynan şyqqandyqtan joǧary bılım ala almaǧan. Bügınde jat aǧymnyŋ jetegınde ketken jıgıt jūmyssyz. Tuystarynyŋ aituynşa, mınezı qiyn bolǧandyqtan, eşqandai jerde jūmys ıstei almaidy.