Qazaqstan bas prokýratýrasy azamattardy zańsyz mıtıngige shyqpaýǵa shaqyryp, qatysqandardyń "qatań jaýapqa tartylatynyn" eskertti. Bas prokýror orynbasary Bolat Dembaevtiń úndeýi prokýratýranyń resmı saıtynda 8 mamyr kúni jarııalandy.
Prokýratýra úndeýinde "Áleýmettik jeliler men messendjerlerde erteń, 9 mamyrda zańsyz mıtıngige qatysýǵa úgitteý júrip jatqanyn" aıtady. Biraq vedomstvo narazylyq bildirýge naqty kimniń shaqyryp jatqanyn kórsetpegen.
"Quqyq buzýshylyqqa kináliler zań aldynda qatań jaýap beredi. Qoǵamdyq qaýipsizdik pen quqyqtyq tártipti qamtamasyz etý, sondaı-aq azamattardyń quqyqtary men bostandyqtaryn qorǵaý maqsatynda Bas prokýratýra arandatýshylyqqa ermeýge jáne memleket zańdaryn buzbaýǵa shaqyrady" dep jazylǵan úndeýde.
Úndeý Nur-Sultan elde tyıym salǵan "Qazaqstannyń demokratııalyq tańdaýy" qozǵalysynyń jetekshisi, qýǵyndaǵy bankır Muhtar Áblıazov 9 mamyrda azamattardy birneshe qalada mıtıngige shyǵýǵa shaqyrǵan soń jarııalandy.
Prokýratýra budan buryn da zańsyz mıtıngige shyqpaýǵa shaqyrǵanyn eskertkenin, alaıda "keıbir azamattar organdardyń eskertýin elemeı, zańsyz mıtıngilerge shyǵyp, ákimshilik jaýaptylyqqa tartylǵanyn" aıtady.
Vedomstvo 1 mamyrda narazylyqqa shyqqandar "azamattardyń demalýyna jáne tynyshtyǵyna qaýip tóndirdi" dep jazady.
6 mamyrda Qazaqstan ishki ister mınıstrligi 6-12 mamyrda ishki ister organdarynyń jeke quramy kúsheıtilgen jumys rejımine kóshetinin habarlaǵan. Mınıstrlik qoǵamdyq tártipti buzý, sharalardyń ótýine kedergi keltirý faktileri bolsa, polıııa zańǵa saı jedel áreket etetinin eskertken.
1 mamyrda Qazaqstannyń birneshe qalasynda bılikke qarsy narazylyq sharasy ótti. Narazylar "Bizdiń óz tańdaýymyz bar!", "Toqaev bizdiń prezıdent emes!", "Darıǵa spıker emes!", "Nur-Sultan astanamyz emes!", "AES-ke qarsymyz!", "Halyq pikirimen sanasyńyzdar", "Kóp balaly analarǵa járdem berilsin!", "Shyndyqtan qashyp qutylmaısyń!", "Shal, ket!" dep aıqaılady.
Ishki ister mınıstrligi 1 mamyrda Nur-Sultan men Almatyda shamamen 80 adamnyń ustalǵanyn habarlady. Alaıda jalpy qansha adamnyń ákimshilik jaýapqa tartylǵany týraly derek joq. 2 mamyrdan beri narazylyqqa shyqqan ondaǵan azamat ákimshilik jazaǵa tartyldy.
"Azattyq" radıosy
