Búgin Oraldaǵy mektepterdiń birinde gaz ballony jarylyp, órt shyqty. Bul týraly «Adyrna» ulttyq portaly KTK telearnasyna silteme jasap habarlaıdy.
Oqıǵa Oraldyń shetindegi Derkól eldi mekeninde bolǵan. Mekteptiń shatyryna jumysshylar qara qaǵaz tósep, bıtým quıyp jatqan. Jumysshylar bıtýmdy ot jaǵyp eritpekshi bolypty. Ot tutanǵanda sol jerdegi gaz ballonyna tıip jarylys bolǵan.
Abyroı bolǵanda, ol kúni óner mektebinde sabaq aıaqtalyp, ǵımaratta eshkim bolmapty. Bilim oshaǵyna japsarlas ornalasqan bes qabatty úıge de zalal tıgen. Degenmen órt sóndirýshiler jalyndy der ýaqytynda sóndirip úlgergen.
Qazir mekteptiń ishi dym bolmaǵandaı tap‑taza. Tek ystyń ıisi ǵana bar. Jumysshylar órt sóndirý kezinde synǵan terezelerdi qaıta jańartyp jatyr. Al órttiń kimniń kesirinen shyqqanyn tergeýshiler anyqtaıdy.
«Shatyr materıalyn tósegende jarylys bolǵan. Órt sóndirýshilerdiń jedel áreketiniń arqasynda kórshi ornalasqan ǵımarttarǵa ótýine jol berilmedi. Sebepteri anyqtalýda. Qaza tapqandar men zardap shekkender joq» , – dedi BQO TJD aǵa anyqtaýshy Álisher Rafıh.
«Adyrna» ulttyq portaly
