Belsendı Timur Dänebaev özı uaqytşa qamauda otyrǧan Kökşetaudaǧy uaqytşa ūstau izoliatorynan Astananyŋ tergeu izoliatoryna auystyryldy. Būl turaly Işkı ıster ministrlıgınıŋ Qylmystyq-atqaru jüiesı komitetı Azattyq radiosynyŋ saualyna bergen jauabynda habarlady, dep jazady "Adyrna".
Dänebaev 30 qyrküiekte Astanadaǧy №64 mekemege tergeu izoliatoryna jetkızıldı.
3 qyrküiekte äleumettık jelılerde Aqmola oblysyndaǧy koloniia qyzmetkerlerınıŋ sottalǧan belsendı Timur Dänebaev pen basqa da tūtqyndardy ūryp-soqqany beinelengen video tarai bastady. Taratylyp jatqan videoda koloniia qyzmetkerlerı belsendıge onyŋ «qarsylyq körsetıp», «kündelıktı tärtıp pen qamau rejimın saqtaudan» bas tartyp otyrǧanyn aitady. Sondai-aq olar Dänebaevtan juynatyn bölmenı tazalaudy talap etedı, oǧan ol tek ūiyqtaityn bölmenı juuǧa daiynmyn dep jauap beredı. Videoda koloniia qyzmetkerı ekı ret «arnaiy qūraldardy qoldanyŋyz» degen pärmen berıp, sodan keiın Dänebaevty ūryp-soǧady.
Qyrküiektıŋ 4-ı künı Qylmystyq-atqaru jüiesı komitetı «äleumettık jelıde jariialanǧan videoǧa» qatysty qyzmettık tekserıs jürgızılıp jatqanyn, öitkenı «qyzmetkerlerdıŋ qyzmettık babyn asyra paidalanu belgılerı bar» dep mälımdedı.
Qyrküiektıŋ 8-ı künı Qylmystyq atqaru jüiesı komitetınıŋ töraǧasy Janat Eşmaǧambetov Atbasardaǧy koloniianyŋ tūtqyndardy ūryp-soǧuǧa qatysy bar toǧyz qyzmetkerı jūmystan bosatylǧanyn, al taǧy ekeuı eŋbek demalysynan kelgen soŋ jūmystan şyǧarylatynyn habarlady. Koloniia bastyǧy men onyŋ orynbasary, oblystyq QAJ departamentı bastyǧynyŋ orynbasary da qyzmetterınen bosatyldy. Oblystyq qylmystyq-atqaru jüiesınıŋ basşysyn da jūmysynan şyǧaru ūsynyldy.
Mausym aiynda Astananyŋ Almaty audandyq No2 soty Timur Dänebaevty ūltaralyq arazdyqty qozdyru baby boiynşa üş jylǧa bas bostandyǧynan aiyrdy.
Belsendı Timur Dänebaev prezident Qasym-Jomart Toqaevty 2022 jylǧy qaŋtar oqiǧasy kezındegı «20 myŋ laŋkes» turaly mälımdemesı üşın jauapqa tartudy talap etkenımen tanymal boldy.
Ūqsas jaŋalyqtar
