Búgin Májilis otyrysynda depýtat Ermurat Bapı teris aǵym ókilderine baılanysty depýtattyq saýal joldady, - dep habarlaıdy "Adyrna" ulttyq portaly.
Jıynnan keıin jýrnalıster depýtattan “Siz depýtattyq saýalda "ýahabızmniń shoǵyn eski Qazaqstan úrleýde" dep aıttyńyz. Bul sózdi qandaı negizge súıenip aıttyńyz?” dep surady.
“Oǵan dáleldiń alystan izdep qandaı qajeti bar? Keshegi Qazaqstanda paıda bolǵan, qazir damyp, órkendep dinı emes, saıası kúshke aınalǵan ýahabızm, salafızm ıdeıasynyń negizgi qoldaýshylary, dem berip qarjylandyrýshylary Qaırat Satybaldy boldy. Muny jurt aıtyp jatyr ǵoı. Budan artyq qandaı dálel kerek? Al Qaırat Satybaldy óziniń aǵasynyń, ıaǵnı “Eski Qazaqstannyń” qoldaýynsyz eshqandaı batyl sharaǵa barmaıdy. Sondyqtan da qoǵamda osyndaı pikir bar. Jalpy, Qazaqtandaǵy teris dinı aǵymdar shamamen 2002-2004 jyldary Nursultan Nazarbaevtyń ısharasy, ymdaýymen kelgen. Sebebi ýahabızmde “Patshaǵa qarsy shyqpaý kerek” degen sóz bar ǵoı. Osynyń ózi jeke dara bılikti qoldaýdyń quraly retinde paıdalanyldy. Sondyqtan da qazir Qazaqstandy dinı negizde bólshekteý bastalyp ketti. Myna jaqtan salafızm, ýahabızm shyqty jáne ekinshi jaqtan quranıtter qazaq halqyn ulttyń deńgeıde biriktirmeýge kúsh saldy. Dinı negizde bólshektep jiberip jeke dara bılik júrgizýdiń ıdeologııasyn jasady”, - dedi ol.
