بۇگىن ءماجىلىس وتىرىسىندا دەپۋتات ەرمۇرات باپي تەرىس اعىم وكىلدەرىنە بايلانىستى دەپۋتاتتىق ساۋال جولدادى، - دەپ حابارلايدى "ادىرنا" ۇلتتىق پورتالى.
جيىننان كەيىن جۋرناليستەر دەپۋتاتتان ء“سىز دەپۋتاتتىق ساۋالدا ء"ۋاحابيزمنىڭ شوعىن ەسكى قازاقستان ۇرلەۋدە" دەپ ايتتىڭىز. بۇل ءسوزدى قانداي نەگىزگە سۇيەنىپ ايتتىڭىز؟” دەپ سۇرادى.
“وعان دالەلدىڭ الىستان ىزدەپ قانداي قاجەتى بار؟ كەشەگى قازاقستاندا پايدا بولعان، قازىر دامىپ، وركەندەپ ءدىني ەمەس، ساياسي كۇشكە اينالعان ۋاحابيزم، سالافيزم يدەياسىنىڭ نەگىزگى قولداۋشىلارى، دەم بەرىپ قارجىلاندىرۋشىلارى قايرات ساتىبالدى بولدى. مۇنى جۇرت ايتىپ جاتىر عوي. بۇدان ارتىق قانداي دالەل كەرەك؟ ال قايرات ساتىبالدى ءوزىنىڭ اعاسىنىڭ، ياعني “ەسكى قازاقستاننىڭ” قولداۋىنسىز ەشقانداي باتىل شاراعا بارمايدى. سوندىقتان دا قوعامدا وسىنداي پىكىر بار. جالپى، قازاقتانداعى تەرىس ءدىني اعىمدار شامامەن 2002-2004 جىلدارى نۇرسۇلتان نازارباەۆتىڭ يشاراسى، ىمداۋىمەن كەلگەن. سەبەبى ۋاحابيزمدە “پاتشاعا قارسى شىقپاۋ كەرەك” دەگەن ءسوز بار عوي. وسىنىڭ ءوزى جەكە دارا بيلىكتى قولداۋدىڭ قۇرالى رەتىندە پايدالانىلدى. سوندىقتان دا قازىر قازاقستاندى ءدىني نەگىزدە بولشەكتەۋ باستالىپ كەتتى. مىنا جاقتان سالافيزم، ۋاحابيزم شىقتى جانە ەكىنشى جاقتان قۇرانيتتەر قازاق حالقىن ۇلتتىڭ دەڭگەيدە بىرىكتىرمەۋگە كۇش سالدى. ءدىني نەگىزدە بولشەكتەپ جىبەرىپ جەكە دارا بيلىك جۇرگىزۋدىڭ يدەولوگياسىن جاسادى”، - دەدى ول.
