دەپۋتات ەدىل ءجاڭبىرشيننىڭ الەۋمەتتىك جەلىگە نازارباەۆ تۋرالى بۇرىن جانە تاياۋدا عانا جاريالاعان پوستى قىزۋ تالقىلانىپ جاتىر، دەپ حابارلايدى “ادىرنا” ۇلتتىق پورتالى Ulysmedia.kz. سايتىنا سىلتەمە جاساپ.
بۇرىن نۇرسۇلتان نازارباەۆتى ماقتاپ جازعان دەپۋتات سوڭعى پوستىندا ونى «شالعا» تەڭەگەن. جۋرناليستەر ماجىلىسمەننەن وسى ارەكەتىنىڭ ءمانىن سۇراپ ءبىلدى.
2021 جىلدىڭ 1 جەلتوقسانىندا ەدىل جاڭبىرشين نازارباەۆ تۋرالى «ونى قۇداي تاڭدادى، ەلگە سونداي ەردى بەردى، ەل سوڭىنا ەردى» دەپ پوست جازعان.
ال تاياۋدا جازعان پوستىندا ول ءبىر جىل بۇرىنعى ويلارىنان اينىپ قالعانعا ۇقسايدى.
«ادىلدىك قۇرۋ ءۇشىن! ءادىل مەملەكەت قۇرۋ ءۇشىن - شالدىڭ جۇيەسىن وزگەرتۋ كەرەك! ءادىل ەكونوميكا قۇرۋ ءۇشىن - قىز-كۇيەۋدىڭ جۇيەسىن بۇزۋ كەرەك! ءادىل قوعام قۇرۋ ءۇشىن - ءىنىسىنىڭ سەكتاسىن جوق قىلۋ كەرەك!» - دەپ جازدى دەپۋتات.
جۋرناليستەر «بۇل ەكىجۇزدىلىك ەمەس پە؟ ءبىر جىلدا نە وزگەردى؟» دەگەن سۇراق قويدى دەپۋتاتقا.
«ءبىر جىلدا كوپ زات وزگەردى. مىنانى ءتۇسىنۋ كەرەك. ول ء(بىر جىل بۇرىنعى – اۆت) پوست – ەلباسىنىڭ جەكە باسىنا ايتىلعان پوست. ال كەشە جاريالاعان پوست – قالىپتاسقان جۇيەنى وزگەرتۋگە قاتىستى پوست. سوندىقتان، قازىر ۇلكەن ساياسي وزگەرىستەر بولىپ، كونستيتۋتسياعا وزگەرىستەر ەنگىزىلدى. سۋپەرپرەزيدەنتتىك بۇرىنعى جۇيەدەن كەتۋىمىز كەرەك. مىقتى پرەزيدەنت، ىقپالدى پارلامەنت جانە ەسەپ بەرەتىن ۇكىمەت دەگەن مودەل بار. ەگەر ەكىنشى رەسپۋبليكانى ىسكە اسىرامىز دەسەك، بۇرىنعى جۇيەدەن كەتۋىمىز كەرەك. ماسەلە، سوعان قاتىستى. سوڭعى جازعان پوستىم – ادامنىڭ جەكە باسىنا قاتىستى پوست ەمەس. وسى قالىپتاسقان جۇيەنى وزگەرتىپ، سوعان جۇمىستانۋىمىز كەرەك دەگەندى بىلدىرەدى»، - دەپ جاۋاپ بەردى ول.
سونداي-اق، ەدىل جاڭبىرشين بۇرىنعى جانە بۇگىنگى پوستى «ەكىجۇزدىلىكتىڭ بەلگىسى ەمەس» دەپ جاۋاپ بەردى.
«بۇل جەردە ەكىنشى پوست ادامنىڭ جەكە باسىنا قاتىستى ايتىلماعان زات. قالىپتاسقان مەملەكەتتەگى جۇيە تۋرالى. سوندىقتان، كونتەكستتەن ءسوزدى جۇلىپ الماي، دۇرىس وقۋ كەرەك. ءادىل مەملەكەت قۇرامىز دەسەك، شالدان قالعان جۇيەنى وزگەرتۋىمىز كەرەك. بۇل ەلدىڭ ايتىپ جۇرگەن اڭگىمەسى»، - دەيدى ەدىل جاڭبىرشين.
ودان بولەك، جاڭبىرشين بۇل پوستار “ەسكى جۇيەگە” ارنالعانىن ايتىپ تاعى ءبىر پوست جازدى.
“كەشەگى پوست مەملەكەتتە، ەكونوميكادا جانە قوعامدا ابدەن قالىپتاسىپ قالعان ەسكى جۇيەگە ارنالعان. ماعىناسىنا ءمان بەرىڭىز! جۇيە وزگەرمەي ءادىل قازاقستان قۇرۋ قيىن.
وزگەرىستەر باستالىپ جاتىر، بىراق ەسكى جۇيە ساحنادان كەتكىسى كەلمەي ارپالىسۋدا. پوستىمدى جەكە تۇلعاعا قاتىستى جازعان پىكىرلەرىمە قاراي بۇرمالاپ، اقپاراتتىق شابۋىلدار جاساۋدا سونىڭ ءبىر كورىنىسى! بۇل زاڭدىلىق! بيلىگى مەن بايلىعىن كىم وڭاي بەرە قويادى؟!
قولداۋ ءبىلدىرىپ وتىرعان قازاقستاندىقتارعا راحمەت! اۋىزبىرشىلىكپەن، اقىلمەن، بىلىممەن، سابىرلىقپەن، تاباندىلىقپەن جانە مىقتى رۋحپەن ەسكى جۇيەنى وزگەرتە الامىز! ەلدە بەيبىتشىلىك، باسىمىز امان بولعاي!”،- دەپ جازدى ول.
