"Baqyt Sūltanov auyryp qaldy": astanalyq tülekter äkımnıŋ keluıne qalai daiyndaldy

NŪR-SŪLTAN, 25 mamyr – Sputnik, Arman Asqar. Bügın elordanyŋ №58 mektep-gimnaziiasynyŋ tülekterı üşın soŋǧy qoŋyrau soǧyldy. Saltanatty jiynǧa qala äkımı Baqyt Sūltanov ta kelemın degen. Bıraq şaranyŋ bastaluyna bırneşe minut qalǧanda baspasöz qyzmetı äkımnıŋ auyryp qalǧanyn habarlady. Onyŋ ornyna Malika Bektūrova keldı. Sputnik Qazaqstan tılşısı de soŋǧy qoŋyrauǧa qatysyp, oquşylardyŋ "äkım keledı" degen künge qalai daiyndalǧanyn körıp qaitty.

"Äkımmen kezdespegenımızge ökınbeimız"

Bügıngı jiynda bärı boldy. Mektep tülekterı än de aitty, bi de biledı. Bastauyş synyp oquşylarynyŋ önerın tamaşalap, mektepke qalai kelgenderın eske aldy. Osydan keiın dästürlı valsqa şyǧyp, şyr ainaldy. Taǧy oqyŋyz: Bılım ministrlıgı tülekter keşın ötkızuge bailanysty ūsynys aitty Saltanatty jiynda äkımnıŋ alǧys hattary da tabystaldy. Bıraq onyŋ bärın qala basşysynyŋ orynbasary Malika Bektūrova berdı. Äkımnıŋ alǧysyna bır ǧana oquşy ie boldy. Ol – oqu üzdıgı Abai Esenbaev. Sputnik Qazaqstan tılşısıne bergen sūhbatynda Abai alǧys hatty äkımnıŋ qolynan almaǧanyna eş köŋılı tüspegenın jetkızdı. "Onda tūrǧan eşteŋe joq. Bolaşaqta konferensiialarda nemese basqa da jiyndarda kezdesemız dep oilaimyn. Negızı, bız aldyŋǧy künı daryndy balalarmen bırge äkımmen jüzdeskenbız. Ekı jyl būryn Äset İsekeşevpen de kezdestık. Sondyqtan ondai kezdesuler älı de bolyp tūrady", - deidı Esenbaev. Mektep būl jiynǧa bır ai boiy daiyndalǧan eken. Oquşylar künde jinalyp, ssenariidı pysyqtap otyrdy. "Bız būl şaraǧa qatty daiyndaldyq. Künde jinaldyq. Bärı oidaǧydai boldy dep oilaimyn. Endı, mekteppen qoştasqym kelmeidı. Osy jerde 11 jyl boiy oqydyq. Mūǧalımderdı, dostarymdy qimaimyn. Bırtürlı auyr bolyp tūr", - dedı taǧy bır tülek Tolǧanai Qylyşeva.

13 innovasiialyq joba jasaldy

№58 mektep-gimnaziiasyn äkımge körsetetındei bıraz jetıstıkterı bar eken. Biyl oqudy 70 tülek tämamdap otyr. Olardyŋ ışınde respublikalyq jarystarda top jaryp, Reseide ötken ǧylymi konferensiiada bırınşı oryn alǧandar da bar.

"Biyl 70 tülektıŋ ışınde 2 altyn belgı jäne 5 üzdık attestattan ümıtker bolyp otyr Osy oqu jylynda mektebımızde ekotehnikalyq baǧytta 13 innovasiialyq joba ıske asyryldy", - deidı mektep direktory Samal Nugumanova.

"Būryn bärı ǧaryşker bolǧysy kelse, qazır olai eşkım aitpaidy"

Bügınde mektepte bırneşe zerthana bar. Mäselen, ǧylym men tehnologiia zerthanasynda oquşylar öz qolymen şaǧyn zauyt-fabrikalardy jasai alady. Al zymyran qūrastyru kabinetınde jeŋıl raketalardy jinap, aspanǧa ūşyruǧa mümkındık bar. "STEM+ zerthanasynda balalar robottardy ǧana emes, şyn ömırde bolatyn zauyttardyŋ şaǧyn nūsqasyn da qūrastyra alady. Sosyn Qazaqstanda Baiqoŋyr siiaqty ülken ǧaryş ailaǧy bar. Bıraq bızde ǧaryş salasy aqsap tūr ǧoi. Būryn bärı ǧaryşker bolǧysy keletın. Qazır olai eşkım aitpaidy. Balalardyŋ osy yntasyn oiatu üşın raketa modeldeu kabinetı aşyldy", - dep atap körsettı fizika mūǧalımı Erǧali Nauatbek. Bügın ol da äkımıŋ alǧysyna ie boldy.

Oquşylar kokteil men sous jasaidy

Mektepte jasyl tehnologiialar kabinetı bar. Ol jerde oquşylar ösımdıkterge san aluan täjıribe jasaidy. Gidroponikalyq qūrylǧynyŋ negızınde qūlpynaidy da ösırıp otyr. Al bır top oquşy kokteil men sousty jasap şyqqan. Bügın ony kelgen barlyq qonaqtarǧa taratty. Al mektep dälızınde mynandai senım jäşıgın baiqauǧa bolady. Mūǧalımderdıŋ aituynşa, oquşylar oǧan öz aryz-şaǧymdaryn, sondai-aq, ūsynystaryn salyp otyrady. Psiholog mamandarǧa hat jazatyn balalar da bolady. Aitpaqşy, mektepke äkım keledı degennen keiın kommunaldyq qyzmetter ainalanyŋ bärın tazalap qoidy. Tıptı, gülzarǧa jatpaityn şöptı de qyrqyp, tegıstep tastady. Alaida joldy jöndeudı ülgermedı.