Qazaqstan komandasy robotehnıkadan Panama-Sıtıde ótken Dúnıejúzilik olımpıadada júzden júırik shyǵyp, jeńis tuǵyrynan kórindi. Bul týraly Habar 24 jazdy, dep habarlaıdy «Adyrna» ulttyq portaly.
Arna málimetinshe, tuńǵysh ret el qorjyny 2 kúmis, 4 qola medalmen tolyqty. Saıysqa álemniń 81 eliniń órenderi qatysty. Dúnıejúzilik dodaǵa Qazaqstan komandasy bıyl osymen 5-shi ret qatysty.
Ulttyq qurama sapynda el namysyn Taıland, Vengrııa jáne Germanııada ótken olımpıadalarda júzden júırik shyqqan jas órender qorǵady.
Janarys Qaparov, jarys júldegeri:
– Bul meniń osyndaı halyqaralyq saıysqa 2-shi ret kelýim. Osyǵan deıin Dortmýnda bolǵan saıysqa qatystym. Shynymdy aıtsam, bıyl ózimdi erkin ári senimdi ustadym. Jarystyń 1-shi kúni-aq jaqsy nátıje kórsettim. Jalpy robotehnıkada eń bastysy, logıkań myqty bolý kerek.
– Robotehnıka elimizde endi ǵana qanatyn jaıyp keledi. Qyzyǵatyndar jyl sanap artyp jatyr. Ásirese mektep oqýshylarynyń arasynda keńinen tanymal. Panamadaǵy jeńis – sonyń jemisi, – deıdi qazaqstandyq bapker.
Mıras Murathanov, Qazaqstan quramasynyń bapkeri:
– Álemniń túkpir-túkpirinen kelgen myńdaǵan oqýshylar, barlyǵy osy bir olımpıada úshin, barlyǵy bir osy maqsat úshin, barlyǵy bir báseke úshin kelip otyr jáne bul men úshin óte áserli bolyp keledi. Halyqaralyq saıysta Qazaqstan tarapy AQSh, Qytaı jáne Ázerbaıjannyń tanymal robototehnıka mektep klýbtarymen birlesip jumys isteýge ózara memorandýmǵa qol qoıdy.
Ýılıam Ýong, saıysty uıymdastyrýshy:
- Aldaǵy ýaqytta Qazaqstanmen birge jumys isteýge nıettimiz. Sebebi qazaqstandyq oqýshylar óte talantty. Búgingi jarysta bizdi tánti etti. ıfrlyq tehnologııa, jasandy ıntellekt – búgingi zaman talaby.
Jerlesterimiz Qazaqstandy jahandyq IT keńistikte úzdik tanytyp, elimizde álemdik standartqa saı jobalar jasaýǵa laıyqty ekenin taǵy bir dáleldedi.
«Adyrna» ulttyq portaly
