Qazaqstan men Özbekstan arasyndaǧy şekarada ūzyn-sonar kölık kezegı joiyldy, dep habarlaidy “Adyrna” ūlttyq portaly Ferǧanaǧa sıltep.
Özbekstanda ornalasqan «Navoi» baqylau-ötkızu beketınde keptelıs mäselesı şeşılgenı habarlandy.
Özbekstan Keden komitetınıŋ baspasöz hatşysy Husan Tangriev saǧat 20:20-da tüsırılgen bos baqylau aimaǧynyŋ suretın jariialap, bekettegı keptelıster qabyldanǧan şaralardyŋ nätijesınde joiylǧanyn atap öttı.
Būǧan deiın osy künı qos memlekettıŋ şekara jäne keden organdary ökılderı «Navoi» ötkızu punktınde kezdesıp, Qūrban ait merekesı qarsaŋynda paida bolǧan jeŋıl kölık keptelısın joiu mäselesın talqylaǧan.
Nätijesınde taraptar qosymşa resurstardy jūmyldyryp, reversivtı qozǧalys engızu turaly şeşım qabyldaǧan.
Tangrievtıŋ aituynşa, soŋǧy bes jylda Qazaqstan men Özbekstan arasyndaǧy kölık pen jolauşylar legı ekı esege artqan. Qazırdıŋ özınde «Navoi» beketı arqyly kün saiyn şamamen 40 myŋ jolauşy men 2 myŋ kölık şekaradan ötedı.
Degenmen, keden qyzmetkerı keptelıstıŋ tolyq joiyluyna kepıldık joq ekenın aitty. Sebebı bır kölıktı tekseruge orta eseppen 5-10 minut ketedı. Osyǧan bailanysty azamattarǧa Syrdariia oblysyndaǧy halyqaralyq emes «Oq altyn» jäne «Mälık» sekıldı balama ötkızu punktterın paidalanuǧa keŋes berdı. Būl beketter arqyly kün saiyn 1500-ge juyq adam jäne 250 kölık ötedı.
Sondai-aq bırqatar ötkızu beketterınıŋ jöndeu jūmystary da jaǧdaidy kürdelendırıp otyr. Atap aitqanda, «Giştkuprik» beketı uaqytşa jabylǧan. Özbekstan tarapy būl bekettegı jöndeu jūmystarynyŋ aiaqtaluǧa taiau ekenın aitsa, Qazaqstan jaǧyndaǧy «Jıbek joly» beketınde jöndeu endı ǧana bastalǧan.
Eske salsaq, osyǧan deiın şekarada jürgızuşıler bır täulıkten asa uaqyt şekaradan öte almai tūrǧany turaly habarlaǧan edık.
Ūqsas jaŋalyqtar
