Aqtöbede oblystyq sottyŋ aldyna jiyrmaǧa juyq azamat talap tılekterın aityp şyqty. Olar prezidenttıkke kandidat saiasatkerler men ükımet basşysy Asqar MAMİN jäne Bılım jäne ǧylym ministrı Küläş ŞÄMŞİDİNOVAǦA hidjab mäselesın şeşudı sūrady.
Jinalǧandar qyzdarymyzdyŋ basynan oramal şeşkızgen bılım ministrlıgı konstitusiiaǧa qarsy şyǧarǧan būiryqty özgertsın deidı. Biyl Aqtöbe oblysynda hidjabsyz mektepke barǧysy kelmegen segız oquşy jyl boiy sabaqqa qatyspaǧan. Keibır ata-analar balalaryn Reseide qaşyqtyqta oqytypty.
- Bızdıŋ qūqymyz nege aiaq asty bolady? Qazır ükımet özgereiın dep jatyr, prezident sailanaiyn dep jatyr. Bızdıŋ de problemamyzdy şeşsın. Qazaqstan tūrǧyndarynyŋ 75 paiyzy mūsylman. Ol kerek pa, kerek emes pa, äiteuır sondai qauym bar. Ony eşkım joqqa şyǧara amaidy. Bızdıŋ qūqyǧymyz da bar. Bız de aqysyz oquǧa qūqylymyz. Bızge mektep aşyp bersın, - deidı Güljan SÄBENOVA.
Güljan Säbenova ekınşı synypty bıtırmegen kışkentai qyzy oramalyn şeşıp mektepke barsa, ülken qyzy üiınde Reseiden qaşyqtyqta oqyp jatqanyn aitady.
- Bılım ministrlıgınıŋ zaŋy dep mektep kırgızbeidı. Sol kezde köp balalardyŋ yntasyn psihologiialyq tūrǧyda syndyryp tastady. Balalardyŋ köbısı sabaqty beske oqityn balalar. Hidjabqa tiısıp jatyr. Balalarymyzdy mektepke kırgızulerı kerek. Bızge basqa eşteŋe kerek emes. Hidjabqa qatysty zaŋdy şyǧarǧan Bılım ministrlıgı me, bız endı talapty ministrge qoiamyz, - deidı Merǧali TILEPİN.
Oblystyq bılım basqaramasy mektep formasyna könbei bır jyl boiy sabaqqa qatyspaǧan segız balanyŋ baryn rastady. Sözderınşe būl segız oquşynyŋ ata-analarymen jyl boiy kelssöz jürgızıp kelgen. Alaida railarynan qaitara almapty. Endı tört toqsan boiy mektepke kelmegen balalardy synyptan synypqa köşıruge mümkındık joq. Alaida jazǧy demalysta oqyp, synaq tapsyrymyn degenderge keşırım bar dep otyr.
- Bır jyl boiy sabaqqa kelmegen balalardy kelesı synypqa köşıruge mümkındık joq. Bız zaŋdy özgerte almaimyz. Ekınşıden bala memlekettık standartqa sai kiınu tiıs. Sondyqtan qazırgı taŋda bız ata-analarmen jūmys jasap jatyrmyz. Olardy şaqyryp jatyrmyz. Balalarǧa kesır tigızbeu kerek. Qai uaqytta, tıptı jazǧy ailarda äkelemız dese de bız daiynbyz. Balalardy qabyldaimyz, - deidı Aqtöbe oblystyq bılım basqarmasynyŋ basşysy Läzzat ORAZBAEVA.
Dın salasynyŋ mamandary dınde baliǧat jasqa tolǧan qyz şaşyn, qolyn jauyp jüru kerek degen mäselenıŋ baryn aitady. Alaida Qazaqstan islam memleketı bolmaǧandyqtan zaŋǧa baǧynu kerek.
- Bız zaiyrly memleketpız. Zaiyrly memlektke zaŋ bar, konstitusiia bar. Kez kelgen azamat zaŋǧa baǧynu tiıs. Bız islam memleketı emespız, - deidı Aqtöbe oblystyq dın ıster basqarmasynyŋ basşysy Älımbek TŪRALİEV.
Ata analardyŋ talabyn tyŋdauǧa kelgen bılım basqarmasynyŋ basşysy mektep formasyna özgerıstıŋ enbeitının, sondyqtan da barlyq bala mektep formasyn saqtauy qajet ekenın aitty. Aitpaqşy, bilıkke talap qoiǧandardy polisiia alyp ketken joq. Tek onǧa juyq tärtıp saqşysy baqylap jürdı.
Janar Qojanova
"Jas Alaş"
