Qazaqstandyq fem-belsendiler áıelderge kórsetiletin zorlyq-zombylyqqa qarsy fleshmob bastady. Bul týraly Myqty Women Instagram jelisi jarııalady, dep habarlaıdy “Adyrna” ulttyq portaly.
Vıdeoda olar zańdy ózgertip, qylmyskerlerge jazany qatańdatýdy talap etken.
Bizdiń talap: Áıelderge qatysty zorlyqty toqtatý,- degen uranmen birneshe qyz-kelinshek úndeý jasady.
“Kún saıyn jańalyqtardan áıelderdi uryp-soǵyp, zorlap, óltirip jatqan jaǵdaılardy kóremiz. Zorlyq-zombylyq qurbandaryna kómek kórsetý qorlary tipti olardyń barlyǵyna kómektesip úlgermeı jatyr. Qylmyskerler jaýapkershilikten únemi jaltaryp ketedi. Sebebi zalymdarǵa qatysty zańnama jumsaq. Qazaqstanda turmystyq zorlyq-zombylyq dekrımınalızaııalanǵan”, – delingen jeli jazbasynda.
Fem-belsendiler zańǵa qatysty úkimetke birneshe talaptar qoıdy:
- Jasalǵan qylmystardyń aýyrlyǵyna sáıkes jazanyń neǵurlym qatań normalaryn engizý, zorlyq kórsetkenderge jazany qataıtý. Zorlyq-zombylyq áreketine birinshi ret baryp tursa da qatań jazalaý;
- Turmystyq zorlyq-zombylyqqa qylmystyq quqyq buzýshylyq mártebesin berý jáne ony buzýshylarǵa qatań jazalar engizý arqyly qylmys retinde qaraý;
- Zorlyq-zombylyq qurbandarynyń qaýipsizdigin qorǵaýdyń tıimdi tetikterine qoljetimdiligin qamtamasyz etý. Sondaı-aq áleýmettik qyzmetter tarapynan qoldaý men kómek kórsetý;
- Jańa zańdardyń saqtalýyna tıimdi baqylaý jáne monıtorıng tetikterin qurý. Sondaı-aq quqyq qorǵaý organdaryn áıelderge qatysty zorlyq-zombylyqpen kúresý boıynsha oqytýdy qamtamasyz etý.
Belsendiler barlyq áıelderdi zorlyq-zombylyqqa qarsy birigip, erkin ómir súrý úshin ózderin qoldaýǵa shaqyrdy.
Biz, Qazaqstan áıelderi, úkimetten dereý jaýap berýdi talap etemiz. Bizdiń maqsatymyz – áıelder qorǵalǵan jáne ózderin teń sezinetin qoǵam qurý, – dep jazdy olar.