Almaty oblysyndaǵy tutas bir aýyldyń turǵyndary aqsha jınap, aýylǵa aparatyn jalǵyz joldy ózderi jóndep jatyr, dep habarlaıdy «Adyrna» ulttyq portaly InformBuro saıtyna silteme jasap.
Aýyl turǵyndarynyń aıtýynsha, olar joldy tym bolmasa tegisteýdi surap, ákimdikke birneshe ret hat jazǵan. Alaıda sheneýnikter jaqyn mańdaǵy 100 úı aýyldyq okrýgke qaramaıdy dep otyr. Jergilikti bılikten úmitin úzgen aýyl turǵyndary oblys basshylyǵynan kómek kútýde.
Bir qaraǵanda kóshege qum tósep, ony tegistep, joldy jóndep jatqan top jaldamaly jumysshydaı kórinýi múmkin. Negizi bular Aqkent aýylynyń turǵyndary. Aıtýlarynsha, bul aýylǵa aparatyn jalǵyz jol bolǵandyqtan, basqa amaldary bolmaǵan. Jyl saıyn kóktem men kúzde osylaı joldy ózderi jóndeıdi.
«Olar bir jıyn nemese basqa birdeńe ótkizse, Belbulaq aýyldyq okrýginiń qaramaǵyna kirmeıdi deıdi, ol qalaı kirmeıdi, Talǵar HQKO barsań: «Sen Belbulaq aýylynda tirkelgensiń», deıdi. Biz munda kelemiz, joqpyz. Sonda biz Amerıkadan keldik pe? Jyl saıyn kóktem men kúzde bul joldy ózimiz birtindep jóndeımiz», – dep ashýlandy Belbulaq aýylynyń turǵyny Qudaıbergen Áýbákirov.
Halyqtyń ózi aıtqandaı, ákimdik ókilderi bul máseleden habardar. Alaıda olar ártúrli sebeptermen kómek kórsetýden qashady.
«Aýyl turǵyndary 10-20 myńnan jınaıdy. Mysaly, men 30 myń berdim. Bul aqshaǵa kólik jaldap, búkil aýyl jol jóndeýmen aınalysady», - deıdi Belbulaq aýylynyń turǵyny Qanat Dúısenbekov.
Al ákimdiktegiler saraptamaǵa qujattardy daıyndap jatqanyn habarlady.
«Jol kelesi jyly aıaqtalady dep naqty aıta almaımyn. 50/50. Aldymen saraptamaǵa jiberemiz. Saraptama daıyn bolǵan soń, jol jóndeýge bıýdjettik ótinim beremiz. Eger bıýdjettik ótinim maquldandy, qarajat bólinedi dese, jospar kelesi jyldyń ekinshi jartyjyldyǵyna qosylady. Al eger olar kelesi jyldyń ekinshi jartyjyldyǵynyń joparyna engizbese, onda bul is 2025 jyldyń birinshi jartyjyldyǵyna qalady», - dep túsindirdi Belbulaq aýyldyq okrýginiń ákiminiń orynbasary Abzal Sabalıev.
«Adyrna» ulttyq portaly
