Májilis depýtaty Aıdos Sarym eks-prezıdenttiń inisi Bolat Nazarbaevtyń týǵan qyzy Aqbota Nazarbaevaǵa qatysy bar «Tolaǵaı-2050» kompanııasymen jasalǵan mıllıardtardy synady, dep habarlaıdy "Adyrna" ulttyq portaly.
«Qazaqstan Respýblıkasynyń aýmaqtyq qaýipsizdigin qamtamasyz etý maqsatynda 50 shekara zastavasyn salý josparlanǵan bolatyn. 2022 jyly 20 shekara zastavasyn salý boıynsha jumystardy satyp alýǵa tender jarııalandy jáne 53 894 mıllıard teńge somasyna merdigerlik uıymdar «Kapital construction» JShS-men jáne «TOLAGAI-2050» JShS-men jalpy sharttar jasaldy. Jasalǵan shartqa sáıkes «TOLAGAI-2050» JShS 40 350 mıllıard teńge somasyndaǵy 15 shekara zastavasyn salýǵa tıis edi. Jumysty oryndaý merzimi 2023 jylǵy 31 jeltoqsanǵa deıin», - dedi Sarym sársenbi kúni Májilis otyrysynda.
Ol jyl sońyna deıin 17 kún qalǵanyn atap ótti.
«Alaıda, joǵaryda kórsetilgen shart boıynsha merzim óreskel buzyldy. Budan basqa, júrgiziletin jumystardyń sapasyna shaǵymdar túsýde. Qolda bar aqparat boıynsha aǵymdaǵy jyldyń 1 qazanynda «TOLAGAI-2050» JShS tek 13 960 mıllıard teńgeni ıgerdi, bul sharttyń jalpy somasynyń 35 %-y ıgerildi degen sóz. Osy obektiler boıynsha «TOLAGAI-2050» JShS shartty oryndaý merzimin taǵy 9 aıǵa uzartýdy suraıdy, bul jobanyń aıtarlyqtaı qymbattaýyna alyp kelýi múmkin» – dep basa aıtty depýtat.
Ol «Tolaǵaı-2050» kompanııasy sýarý júıelerin qaıta jańǵyrtý, Saıran sý qoımasyn mehanıkalyq tazalaý jobalary, sondaı-aq Almaty men Pavlodar oblysyndaǵy basqa da jobalar úshin BAQ-ta birneshe ret synǵa ushyraǵanyna» nazar aýdardy.
«Kompanııa 80-nen astam azamattyq jáne ákimshilik sot tergep-tekserýine qatysty, onyń 10-nan astamy 2023 jyly ótti, onyń ishinde memlekettik satyp alý rásiminde mindetin adal oryndamaýshy dep tanyldy (Pavlodar oblysynyń soty)», - dedi parlamentarıı.
Onyń aıtýynsha, «osyǵan oraı, Kólik mınıstrliginiń Avtomobıl joldary komıteti jobaǵa tapsyrys berýshi bola otyryp, kelisim-shartty buzýǵa barlyq zańdy negiz bolǵanymen, búgingi kúnge deıin eshqandaı shara qoldanbaǵan».
«2022 jyldyń 3 aqpanyna deıin bul kompanııanyń quryltaıshylary arasynda marqum Bolat Nazarbaevtyń qyzy (Nursultan Nazarbaevtyń inisi - "Adyrna") Aqbota Nazarbaev bolǵanyn atap ótemiz», - dep naqtylady májilismen.
Ol sondaı-aq shekara zastavalaryn salý óńirlik qaýipsizdikti qamtamasyz etýdiń irgeli quramdas bólikteriniń biri bolyp tabylatynyna erekshe nazar aýdardy.
«Qurylys merzimderiniń buzylýy eldiń aýmaqtyq tutastyǵyn buzý, esirtki tasymaly men basqa da tyıym salynǵan ónimderdiń zańsyz aınalymy, jeke tulǵalardyń Qazaqstan Respýblıkasynyń aýmaǵyna zańsyz kóship-qoný qaýpiniń artýyna alyp kelýi múmkin. Osyǵan baılanysty, Sizden osy joba boıynsha «TOLAGAI-2050» JShS-qa qatysty tergep-tekserý júrgizýdi jáne Qazaqstan Respýblıkasynyń qoldanystaǵy zańnamasyna sáıkes qajetti sharalardy qabyldaýdy suraımyz», - dep túıindedi sózin Sarym.
